SuperAngkor News | Cambodia News | Khmer News | World News | News | Health | Technoloy | Star | Travel

យោងតាមការសិក្សាស្រាវជ្រាវថ្មីមួយដែលទើបចុះផ្សាយក្នុងព្រឹត្តិបត្រសមាគមជំងឺបេះដូងអាមេរិកបានបង្ហាញថា បុគ្គលដែលនិយមមើលទូរទស្សន៍៣ម៉ោងឬច្រើនជាងនេះក្នុងមួយថ្ងៃប្រឈមនឹងមរណភាពមុនអាយុទ្វេដងធៀបទៅនឹងបុគ្គលដែលមើលតិចតួច ខណៈការចំណាយពេលអង្គុយធ្វើការនៅមុខកុំព្យូទ័រ មិនទាន់រកឃើញពីការបង្កឱ្យមានគ្រោះថ្នាក់ដល់អាយុជីវិតនោះនៅឡើយទេ ។

ការពិសោធវាយតម្លៃសកម្មភាព៣ផ្សេងគ្នា(មើលទូរទស្សន៍ លេងកុំព្យូទ័រ និងបើកបរ)រយៈពេលជាង៨ឆ្នាំលើអ្នកស្ម័គ្រចិត្តអេស្ប៉ាញ ១៣៣៨៤នាក់ក្នុងនោះ៦០ភាគរយជាស្ត្រីបានរកឃើញថា ក្រុមដែលមើលទូរទស្សន៍៩៧នាក់ត្រូវបានរាយការណ៍ថាស្លាប់ ក្នុងនោះ១៩នាក់ស្លាប់ដោយជំងឺបេះដូង ៤៦នាក់ស្លាប់ដោយជំងឺមហារីក និង៣២នាក់ស្លាប់ដោយបុព្វហេតុផ្សេងៗ ។ ការពិសោធបានបង្ហាញទៀតថា ហានិភ័យនៃការស្លាប់មុនអាយុនេះគឺបានកើនឡើងទ្វេដងចំពោះអ្នកដែលមើលទូរទស្សន៍ចាប់ពី៣ម៉ោងឡើងទៅក្នុងមួយថ្ងៃប្រៀបធៀបនឹងក្រុមផ្សេងឬក្រុមដូចគ្នា តែមើលតិចជាង១ម៉ោងក្នុងមួយថ្ងៃ ។

ដោយឡែក ចំពោះក្រុមដែលប្រើប្រាស់ម៉ាស៊ីនកុំព្យូទ័រ និងក្រុមបើកបររថយន្ត ការពិសោធមិនបានរកឃើញពីការជាប់ពាក់ព័ន្ធគ្នារវាងពេលវេលាដែលពួកគេចំណាយពេលអង្គុយធ្វើការ និងការស្លាប់មុនអាយុនោះទេ ។

លោកសាស្ត្រាចារ្យ Miguel Martinez-Gonzalez អ្នកដឹកនាំការសិក្សាមកពីសាកលវិទ្យាល័យ University of Navarra ប្រទេសអេស្ប៉ាញបានថ្លែងថា ការមើលទូរទស្សន៍គឺជាទង្វើមួយដែលនាំឱ្យរាងកាយគ្មានសកម្មភាព ហើយទង្វើនេះបានបង្កើននូវអត្រាប្រឈមនឹងបញ្ហាផ្សេងៗ ។ ការរកឃើញរបស់យើងលើកនេះឈរលើមូលដ្ឋានមួយរឹងមាំអមស្របទៅនឹងភស្តុតាងនៃការស្រាវជ្រាវលើកមុនៗដែលបង្ហាញពីការចំណាយពេលច្រើនមើលទូរទស្សន៍ជាប់ពាក់ព័ន្ធនឹងការស្លាប់មុនអាយុ ។

ទោះជាយ៉ាងនេះក្តី ក្រុមអ្នកស្រាវជ្រាវបានកំណត់ថា ការសិក្សាពិសោធបន្ថែមទៀត ចាំបាច់ត្រូវធ្វើដើម្បីរកឱ្យឃើញថា តើវាពិតជាគ្មានការជាប់ពាក់ព័ន្ធគ្នារវាងការចំណាយពេលប្រើប្រាស់ម៉ាស៊ីនកុំព្យូទ័រ ការបើកបរទៅនឹងមរណភាពមុនអាយុដែរឬយ៉ាងណា ។

សាស្ត្រាចារ្យ Gonzalez បន្តថា ខណៈបុគ្គលមានវ័យកាន់តែចាស់ទៅ ភាពទំនេរគ្មានសកម្មភាពរឹតតែក្លាយជារឿងសាមញ្ញនិងកើតមានជាញឹកញាប់ ។ នេះជាបន្ទុកដ៏ធ្ងន់ដែលចូលរួមចំណែកបង្កើតបញ្ហាដល់សុខភាព ។ លទ្ធផលនៃការរកឃើញលើកនេះបានទទូចដល់បណ្តាជនទាំងឡាយពិចារណាបង្កើនកម្រិតសកម្មភាពរាងកាយ និងកាត់បន្ថយពេលវេលាមើលទូរទស្សន៍មិនឱ្យច្រើនជាង១ម៉ោងឬ២ម៉ោងក្នុងមួយថ្ងៃ ៕