SuperAngkor News | Cambodia News | Khmer News | World News | News | Health | Technoloy | Star | Travel

ពិតណាស់ ស្ត្រីដែលមានផ្ទៃពោះភាគច្រើនសុទ្ធតែឡើងទម្ងន់ខ្លួន ហើយការឡើងទម្ងន់នេះក៏អាចប្រឈមនឹងហានិភ័យផងដែរ ព្រោះហេតុនោះហើយបានជាក្នុងកំឡុងពេលមានផ្ទៃពោះ គ្រូពេទ្យតែងណែនាំឲ្យស្ត្រីចេះគ្រប់គ្រងទម្ងន់ខ្លួនឲ្យបានល្អ ពិសេសទទួលទានអាហារទៅតាមការណែនាំរបស់ជំនាញ ។

មានហានិភ័យមួយចំនួនចំពោះស្ត្រីពពោះដែលឡើងទម្ងន់ខ្លាំងដូចជា ៖
-អាចបណ្តាលឲ្យកើតមានបញ្ហាជាតិស្ករក្នុងឈាមឡើងខ្ពស់
-កើតជំងឺទឹកនោមផ្អែមក្នុងកំឡុងពេលមានផ្ទៃពោះ
-កើតមានជំងឺទឹកនោមប្រៃ និងបញ្ហាជាច្រើនទៀតនៅក្នុងផ្ទៃពោះ ។

ដូច្នេះការគ្រប់គ្រងទម្ងន់ខ្លួនបានត្រឹមត្រូវ នឹងធ្វើឲ្យសារធាតុអាហារផ្សេងៗដែលទៅចិញ្ចឹមទារកនៅក្នុងផ្ទៃមានមាតុល្យភាព និងមិនធ្វើឲ្យប៉ះពាល់ដល់សុខភាពអ្នក និងទារករថែមទៀតផង ។ ក្នុងកំឡុងពេលមានផ្ទៃពោះ គ្រប់ផ្នែកនៃរាងកាយតែងតែប្រែប្រួលទៅតាមសរីរាង្គដែលបានផ្លាស់ប្តូរ ។

ការទទួលទានអាហារដែលមានអត្ថប្រយោជន៍សម្រាប់ទារកក្នុងផ្ទៃ ក៏មិនត្រូវទទួលទានច្រើនពេកដែរ អ្នកត្រូវចេះគ្រប់គ្រងទម្ងន់ខ្លួនឲ្យបានសមស្រប ដោយក្នុងពេលមានផ្ទៃពោះស្ត្រីគួរតែឡើងទម្ងន់ក្នុងចន្លោះពី១២ទៅ១៥គីឡូក្រាមបានហើយ បើលើសឬតិចជាងនេះ ក៏មិនមែនជារឿងល្អដែរ ព្រោះអាចបណ្តាលឲ្យស្ត្រីជួបនូវហានិភ័យដូចដែលបានរៀបរាប់ខាងលើ ។

អ្វីដែលល្អជាងនេះ ត្រូវឧស្សាហ៍ថ្លឹងទម្ងន់ខ្លួនប្រាណឱ្យបានញឹកញាប់ ដើម្បីតាមដានរាល់ទម្ងន់ដែលកើនឡើង ។ យ៉ាងណាមិញក្នុងកំឡុងពេលមានផ្ទៃពោះ ដើម្បីគ្រប់គ្រងទម្ងន់ខ្លួនឱ្យបានល្អ ស្ត្រីគ្រប់រូបមិនគួរទំពានំ ឬចំណីអាហារដែលមិនចាំបាច់ ឬអត់មានផលប្រយោជន៍ដល់សុខភាពនោះទេ ព្រោះអាចធ្វើឲ្យទម្ងន់ខ្លួនកើនឡើងខុសពីធម្មតាដែលអាចបង្កឱ្យប៉ះពាល់ទៅដល់ទារកនៅក្នុងផ្ទៃ ។

ស្ត្រីគ្រប់រូបដែលមានផ្ទៃពោះ ក៏ត្រូវចងចាំផងដែរថា ក្នុងកំឡុងពេលមានផ្ទៃពោះ ស្ត្រីក៏មិនគួរបង្អត់អាហារដើម្បីគ្រប់គ្រងទម្ងន់ខ្លួននោះដែរ គឺត្រូវទទួលទានអាហារណាដែលមានអត្ថប្រយោជន៍ដល់សុខភាព និងទារកនៅក្នុងផ្ទៃ ព្រោះប្រសិនបើទម្ងន់ខ្លួនឡើងតិចពេក ទារកនៅក្នុងផ្ទៃអាចនឹងមានការលូតលាស់យឺត ឬទារកកើតមកមិនគ្រប់លក្ខណៈ ៕