SuperAngkor News | Cambodia News | Khmer News | World News | News | Health | Technoloy | Star | Travel

ក្រុមអ្នកស្រាវជ្រាវអាមេរិកបាននិយាយថា បណ្តាស្ត្រីមានផ្ទៃពោះដែលហាត់ប្រាណទៀងទាត់រាល់ថ្ងៃ អាចជួយបង្ការកូនរបស់ពួកគេពីការកើតជំងឺលើសឈាមទៅថ្ងៃមុខ ។ អ្នកស្រាវជ្រាវដដែលបានបន្តថា ក្មេងៗកើតពីម្តាយដែលធ្វើសកម្មភាពរាងកាយជាប់ជាប្រចាំអំឡុងពួកគេនៅក្នុងផ្ទៃ ជាពិសេសអំឡុង៣ខែចុងក្រោយនៃការពពោះ សម្ពាធឈាមបានធ្លាក់ចុះនៅពេលឈានចូលដល់អាយុ១០ឆ្នាំ ។

នេះជាការសិក្សារបស់អាមេរិកលើកដំបូងគេហើយដែលបានពិនិត្យមើលលើទំនាក់ទំនងរវាងទម្លាប់ស្ត្រីជាម្តាយ និងឱកាសកើតមានបញ្ហាលើសឈាម ។ លើសឈាមជារឿយៗត្រូវគេដឹងថា ជាកត្តាសំខាន់មួយនាំឱ្យកើតជំងឺបេះដូង ។

សាស្ត្រាចារ្យ James Pivarnik អ្នកដឹកនាំការសិក្សាមកពីសាកលវិទ្យាល័យ Michigan State University ថ្លែងថា៖ «យើងបានពិនិត្យមើលជាហូរហែបណ្តាទារកដែលមានទម្ងន់ធម្មតានៅពេលចាប់កំណើត ហើយមួយចំនួនបានធ្លាក់មកនៅចំណុចទាបបំផុតនៃឧបករណ៍វាស់សម្ពាធឈាម ។ កាន់តែភ្ញាក់ផ្អើលជាងនេះគឺពួកយើងបានរកឃើញថា ការធ្លាក់ចុះ និងទំនាក់ទំនងបញ្ហាលើសឈាមចំពោះក្មេងទាំងនេះគឺសឹងតែគ្មាន ប្រសិនស្ត្រីជាម្តាយធ្វើសកម្មភាពរាងកាយ» ។

តាមអង្កេតវាយតម្លៃរយៈពេល៥ឆ្នាំលើស្ត្រី៥១នាក់បានបង្ហាញថា ក្រុមស្ត្រីមានផ្ទៃពោះដែលហាត់ប្រាណរាល់ថ្ងៃ ជាពិសេសអំឡុង៣ខែចុងក្រោយ ហានិភ័យបញ្ហាលើស ឈាមលើកូនៗរបស់ពួកគេបានថយចុះគួរឱ្យកត់សម្គាល់ ពោលគឺ នៅពេលឈានចូលដល់អាយុចាប់ពី៨ទៅ១០ឆ្នាំ ។

សាស្ត្រាចារ្យ Pivarnik បានបន្ថែមថា លទ្ធផលនេះប្រាប់យើងឱ្យដឹងថា ការហាត់ប្រាណអំឡុងពេលគភ៌ស្ថិតក្នុងដំណាក់កាលអភិវឌ្ឍដ៏សំខាន់គឺអាចផ្តល់ផលប៉ះពាល់ដោយផ្ទាល់ទៅលើទារក ។ នេះជារឿងល្អខណៈវាបានបង្ហាញថា ទម្លាប់ហាត់ប្រាណទៀងទាត់របស់ម្តាយគឺផ្តល់ផលល្អដល់សុខភាពបេះដូងកូនពួកគេពេលក្រោយនៃជីវិត។

យ៉ាងណាក៏ដោយ ក្រុមអ្នកស្រាវជ្រាវបានបញ្ជាក់ថា ការហាត់ប្រាណច្រើនពេល(ចាប់ពី១ម៉ោងឡើងទៅក្នុងមួយថ្ងៃ)អាចបណ្តាលឱ្យស្ត្រីជាម្តាយក៏ដូចជាកូនក្នុងផ្ទៃប្រឈមនឹងបញ្ហាគ្រោះថ្នាក់ ។ ការហាត់ប្រាណមានដូចជា ដើរ ឈរលើកដៃលើកជើង...ច្រើនបំផុត៣០នាទីក្នុងមួយថ្ងៃនឹងផ្តល់អត្ថប្រយោជន៍ចំពោះស្ត្រីមានផ្ទៃពោះច្រើនយ៉ាង៕