SuperAngkor News | Cambodia News | Khmer News | World News | News | Health | Technoloy | Star | Travel

(ដើមអម្ពិល) ភ្នំពេញ៖ នៅក្នុងសារ របស់នាយកប្រតិបត្តិអង្គការ UNAIDS មីសែល ស៊ីឌីបេ ក្នុងឱកាសទិវាអន្តរជាតិប្រឆាំងការស្អប់ខ្ពើម មនុស្សស្រឡាញ់ភេទដូចគ្នា និងមនុស្ស បំលែងភេទ ដែលនឹងធ្វើឡើងនៅថ្ងៃទី១៧ ខែឧសភា ឆ្នាំ២០១៤ បានឲ្យដឹងថា ការដាក់ទោស ដល់មនុស្សស្រីស្រឡាញ់ភេទដូចគ្នា មនុស្សប្រុសស្រឡាញ់ភេទដូចគ្នា មនុស្សស្រឡាញ់ភេទទាំងពីរ មនុស្សបំលែងភេទ និងមនុស្សភេទពីរ ធ្វើឲ្យសហគមន៍ទាំងមូលប្រឈមមុខនឹងគ្រោះថ្នាក់។

សេចក្តីប្រកាសព័ត៌មាន របស់អង្គការ UNAIDS ដែលមជ្ឈមណ្ឌលព័ត៌មាន យើង ទទួលបាននៅថ្ងៃទី១៦ ខែឧសភានេះ បានឲ្យដឹងថា “យើងត្រូវតែគោរព សេរីភាពរបស់មនុស្សគ្រប់រូប ក្នុងការស្រឡាញ់អ្នក ដែលគេចង់ស្រឡាញ់ និងសំដែងអត្តសញ្ញាណរបស់ពួកគេ។ មនុស្សស្រីស្រឡាញ់ភេទដូចគ្នា មនុស្សប្រុស ស្រឡាញ់ភេទដូចគ្នា មនុស្សស្រឡាញ់ភេទទាំងពីរ មនុស្សបំលែងភេទ និងមនុស្សភេទពីរ បានបង្ហាញពីសេចក្តីក្លាហានយ៉ាងច្រើន និងកំពុងតែជំរុញឲ្យមានការ ផ្លាស់ប្តូរក្នុងសង្គមមួយ”។

ប្រភពបន្តថា ការដាក់ទោសដល់មនុស្សស្រី ស្រឡាញ់ភេទដូចគ្នា មនុស្សប្រុស ស្រឡាញ់ ភេទដូចគ្នា មនុស្សស្រឡាញ់ភេទទាំងពីរ មនុស្សបំលែងភេទ និងមនុស្ស ភេទពីរ ធ្វើឲ្យសហគមន៍ ទាំងមូលប្រឈមមុខ នឹងគ្រោះថ្នាក់ ដោយវាធ្វើឲ្យអ្នក ដែលត្រូវការសេវាបង្ការ និងព្យាបាល មិនអាចទទួល បានអន្តរាគមន៍ សង្គ្រោះជីវិត។

សេចក្តីប្រកាសបន្ថែមថា “នៅក្នុងឆ្នាំ២០១៤ ខណៈដែលយើងមានអ្វីៗ ទាំងអស់ ដែលយើងត្រូវការ ដើម្បីយកឈ្នះលើជំងឺអេដស៍នោះ យើងនៅតែប្រយុទ្ធនឹង បុរេនិច្ឆ័យ ការប្រមាថមាក់ ងាយ ការរើសអើងដ៏សកម្ម និងច្បាប់ដែលប្រឆាំងនឹងអ្នកស្រឡាញ់ភេទដូចគ្នានៅក្នុង ៧៨ ប្រទេស ជុំវិញសកលលោក”។

ទោះបីជាយ៉ាងណាក៏ដោយ នៅក្នុងសេចក្តីប្រកាសដដែលបានបញ្ជាក់ថា ការប្រមាថមាក់ងាយ និងការរើសអើងដោយផ្អែកលើទំនោរផ្លូវភេទ និងអត្តសញ្ញាណភេទ បង្កឲ្យមានការចម្លងមេរោគអេដស៍ថ្មីៗទៀត។ យើងអាចមានសេរីភាពនៅពេលយើង គោរពសេរីភាពបងប្អូនប្រុស និងបងប្អូនស្រីរបស់យើង ដែលជាមនុស្សស្រី ស្រឡាញ់ភេទដូចគ្នា មនុស្សប្រុសស្រឡាញ់ភេទដូចគ្នា មនុស្សស្រឡាញ់ទាំងពីរភេទ មនុស្សបំលែងភេទ និងមនុស្សភេទពីរ៕