SuperAngkor News | Cambodia News | Khmer News | World News | News | Health | Technoloy | Star | Travel

រាជធានីភ្នំពេញ ៖ ក្រសួងទេសចរណ៍នៅថ្ងៃទី១៥ ខែកុម្ភៈ បានរៀបចំកិច្ចពិភាក្សាមួយដោយមានការចូលរួមពីក្រសួងព័ត៌មាន ក្រសួងបរិស្ថាន សហភាពសហព័ន្ធយុវជនកម្ពុជា និងស្ថាប័នពាក់ព័ន្ធមួយចំនួនទៀត ដើម្បីពិភាក្សាអំពីការបញ្ជ្រាបការយល់ដឹងជាសាធារណៈអំពី «ទេសចរណ៍និងទីក្រុងស្អាត» តាមប្រព័ន្ធផ្សព្វផ្សាយ ទូរទស្សន៍ វិទ្យុ និងបណ្តាញសង្គម ។ កិច្ចពិភាក្សានេះ ត្រូវបានធ្វើឡើងនៅទីស្តីការក្រសួងទេសចរណ៍ ។

លោក ថោង ខុន រដ្ឋមន្ត្រីទេសចរណ៍ថ្លែងថា «កិច្ចប្រជុំនេះផ្តោតជាសំខាន់លើ ការបញ្ជ្រាបការយល់ដឹងជាសាធារណៈអំពី ទេសចរណ៍បៃតងនិងទីក្រុងស្អាត យុវជននិងទីក្រុងស្អាត ក៏ដូចជាការត្រៀមលក្ខណៈប្រកួតប្រជែងសម្អាតកម្ពុជា (Cambodia Clean up Challeges) ជ័យលាភី សម្តេចតេជោនានាយករដ្ឋមន្ត្រីនាពេលខាងមុខនេះ ។ ទន្ទឹមនោះ ក៏ជាការត្រៀមលក្ខណសម្បត្តិក្នុងការទទួលប័ណ្ណសរសើរ អាស៊ានទេសចរណ៍ ដែលនឹងប្រារព្ធធ្វើនៅទីក្រុងបាងកក ប្រទេសថៃ នៅឆ្នាំ២០១៨ខាងមុខផងដែរ» ។

លោករដ្ឋមន្ត្រីក្រសួងទេសចរណ៍ថ្លែងទៀតថា កិច្ចពិភាក្សានេះគឺដោយយោងតាមអនុសាសន៍របស់សម្តេចតេជោនាយករដ្ឋមន្ត្រី ដែលជំរុញឲ្យរួមគ្នាអនុវត្តផែនការយុទ្ធសាស្ត្រទេសចរណ៍បៃតង ទីក្រុងស្អាត សម្រាប់ប្រកួតប្រជែងជាមួយបណ្តាប្រទេសជាសមាជិកក្នុងតំបន់ ក៏ដូចជាប្រទេសនៅលើសកលលោក។ លោកបន្តថា ការបញ្ជ្រាបការយល់ដឹងជាសាធារណៈអំពីទេសចរណ៍បៃតងទីក្រុងស្អាតនេះ ក៏ដើម្បីឲ្យប្រជាពលរដ្ឋកាន់តែមានការយល់ដឹងបន្ថែមទៀត ប្រយោជន៍លើកកម្ពស់វិស័យទេសចរណ៍នៅកម្ពុជា ។

លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ថ្លែងថា នឹងជំរុញឲ្យបណ្តាញផ្សព្វផ្សាយជាតិ ទាំងរដ្ឋនិងឯកជន ខិតខំធ្វើយ៉ាងណាយកចិត្តទុកដាក់ជួយផ្សព្វផ្សាយអំពីទេសចរណ៍ បរិស្ថាន អនាម័យ ដល់សាធារណជនឲ្យចូលរួមលើកកម្ពស់ថែរក្សាបរិស្ថាន អនាម័យក្នុងទីក្រុងឲ្យបានស្អាតល្អ ធ្វើឲ្យទីក្រុងរបស់កម្ពុជាក្លាយជាទីក្រុងស្អាត បៃតងនាពេលខាងមុខ ។

លោករដ្ឋមន្ត្រី ក៏បានស្នើឲ្យក្រសួងទេសចរណ៍និងស្ថាប័នពាក់ព័ន្ធ មានការយកចិត្តទុកដាក់ និងលើកទឹកចិត្តចំពោះបណ្តាញផ្សព្វផ្សាយរដ្ឋ និងឯកជន ដែលបានរួមចំណែកក្នុងការផ្សព្វផ្សាយអំពីវិស័យទេសចរណ៍ និងបរិស្ថានទីក្រុង ដើម្បីឲ្យពួកគេមានការប្រកួតប្រជែងលើបញ្ហានេះ ។

តំណាងសហភាពសហព័ន្ធយុវជនកម្ពុជា ក៏បានសន្យាផងដែរថា នឹងជំរុញនិងលើកទឹកចិត្តដល់យុវជនឲ្យចូលរួមកាន់តែសកម្មថែមទៀតក្នុងការសម្អាតបរិស្ថាននៅតាមទីប្រជុំជន ទីសាធារណៈ និងនៅតាមរមណីយដ្ឋាននានា ក៏ដូចជាចូលរួមជាមួយក្រសួង ស្ថាប័នពាក់ព័ន្ធជាច្រើនទៀត លើកកម្ពស់ការយល់ដឹងដល់យុវជន និងប្រជាជនគ្រប់ផ្នែក ទាំងទេសចរណ៍ បរិស្ថាន សណ្តាប់ធ្នាប់សាធារណៈ សោភណ័ភាពទីក្រុង និងច្បាប់ចរាចរណ៍ជាដើម ។ នេះជាវត្ថុបំណងដែលទទូចចង់បាន ៕