SuperAngkor News | Cambodia News | Khmer News | World News | News | Health | Technoloy | Star | Travel

ខេត្តកំពង់ឆ្នាំង ៖ «ផែបណ្តែតទឹក» មានសារសំខានខ្លាំងណាស់ សម្រាប់ភ្ញៀវទេសចរជាតិ និងអន្តរជាតិដែលទៅទស្សនាខេត្តកំពង់ឆ្នាំង តាមរយៈកប៉ាល់ ពួកគាត់នឹងត្រូវចុះពីកប៉ាល់ ជិះកាណូតឡើងលើផែដើម្បីឡើងដីគោក ម្យ៉ាងវិញទៀត ប្រជាពលរដ្ឋក៏បានចតទូក កាណូតពេលឡើងគោក ឬចុះពីលើគោកមកជិះកាណូតក្នុងទឹកវិញ តាមរយៈកំពង់ផែនេះដែលមិនអាចខ្វះបានឡើយ» ។

លោកឈួរ ច័ន្ទឌឿន អភិបាលខេត្តកំពង់ឆ្នាំង ថ្លែងបែបនេះនៅក្នុងពិធីក្រុងពាលីសម្ពោធដាក់ឱ្យប្រើប្រាស់ផែបណ្តែតទឹកថ្មីចំនួន២ នៅចំណុចដើមពោធិ៍មាត់ទន្លេ ផ្សារក្រោម ស្ថិតក្នុងឃុំផ្សារឆ្នាំង ក្រុងកំពង់ឆ្នាំង នាព្រឹកថ្ងៃទី១១ ខែកុម្ភៈ ឆ្នាំ២០១៦ ។

ចំពោះការប្រារព្ធពិធីក្រុងពាលីនេះ គឺជាទំនៀមទម្លាប់់ប្រពៃណីរបស់ដូនតាពីបុរាណកាលមក ដែលត្រូវធ្វើឡើងសែនព្រែនដល់អ្នកតា លោកយាយជាអ្នកថែរក្សាទឹកដី ព្រៃព្រឹក្សា និងស្តេចក្រុងពាលីជាម្ចាស់ទឹកដីព្រៃភ្នំ ដើម្បីសុំសេចក្តីសុខដល់កូនចៅ និងប្រជាពលរដ្ឋក្នុងការកសាងសមិទ្ធផលអ្វីមួយ ។ ពីធីនេះត្រូវបានសែនព្រែនឱ្យអារុក្ខអារក្ស អ្នកតា ម្ចាស់ទឹក ម្ចាស់ដី តាមប្រពៃណីបុរាណដើម្បីសុំសេចក្តីសុខជូនប្រជាពលរដ្ឋជាទូទៅនៅក្នុងខេត្តកំពង់ឆ្នាំង ដែលជាអ្នកប្រើប្រាស់ផែដែកនេះ ព្រោះថានៅរដូវចូលឆ្នាំខ្មែរ និងភ្ជុំបិណ្ឌម្តងៗមានប្រជាពលរដ្ឋឡើងចុះឆ្លងកាត់ច្រើនណាស់ មានពេលខ្លះបើយើងមិនជឿ និងមិនបន់ស្រន់សែនព្រែនឱ្យដូនតា ក៏យើងមិនសូវបានសេចក្តីសុខដែរ ។

លោកអភិបាលខេត្តបន្តថា ផែបណ្តែតទឹកសម្ពោធដាក់ឱ្យប្រើប្រាស់នៅថ្ងៃនេះមាន២ គឺមួយគ្រឿងដាក់នៅទីនេះ និងមួយគ្រឿងទៀតដូចគ្នានេះផងដែរដាក់នៅកំពង់ផែ ឃុំឆ្នុកទ្រូ ស្រុកបរិបូណ៌ ។ ផែទាំងពីរត្រូវបានមន្ទីរសាធារណការនិងដឹកជញ្ជូនខេត្តកសាងឡើងដាក់ឲ្យប្រើប្រាស់ ដើម្បីបម្រើសេចក្តីត្រូវការរបស់ប្រជាពលរដ្ឋ ដូចជាចតកាណូតដកាណូតដឹកផលនេសាទ កាណូតដឹកកសិផល ពីចម្ការទៅទីរួមស្រុក និងក៏មានសារប្រយោជន៍យ៉ាងសំខាន់ផងដែរសម្រាប់ប្រជាពលរដ្ឋដឹករបស់ប្រើប្រាស់ផ្សេងៗ និងគ្រឿងសំណង់ ពីលើគោកចុះមកលើកាណូតក្នុងទឹក បើគ្មានកំពង់ផែដែកនេះប្រជាពលរដ្ឋពិតជាជួបការលំបាកជាមិនខានឡើយ ។

លោកអភិបាលខេត្តបានផ្តាំផ្ញើផងដែរ ដល់អាជ្ញាធរក្រុង ស្រុក សមត្ថកិច្ច និងប្រជាពលរដ្ឋសូមរួមគ្នាជួយថែរក្សាផែដែកទាំង២គ្រឿងនេះឱ្យបានល្អ រឹងមាំយូរអង្វែរដើម្បីជួយសម្រួលដល់ការឈប់សំចតរបស់ពេលធ្វើដំណើរតាមផ្លូវទឹក ។

លោកកែវ ពៅ ប្រធានមន្ទីរសាធារណការនិងដឹកជញ្ជូនខេត្ត បានឱ្យដឹងថា ផែដែកទាំង២គ្រឿងនេះ ក្នុង១គ្រឿងៗមានបណ្តោយប្រវែង១២ម៉ែត្រ និងទទឹង៦ម៉ែត្រ កសាងឡើងដោយប្រាក់របស់ក្រសួងសាធារណការ ឧបត្ថម្ភជូនប្រជាពលរដ្ឋខេត្តកំពង់ឆ្នាំង ចំណែកកំពង់ផែចាស់បានពុកខូចអស់ទៅហើយមិនអាចជួសជុលប្រើប្រាស់បានឡើយ ៕