SuperAngkor News | Cambodia News | Khmer News | World News | News | Health | Technoloy | Star | Travel

ការសិក្សាថ្មីមួយបានបង្ហាញថា ក្មេងដែលចំណាយពេលតិចនៅមុខទូរទស្សន៍ឬស្គ្រីនកុំព្យូទ័រ និងដេកបានច្រើន មានរាងស្លីមជាង រៀនពូកែជាង និង មានឥរិយាបថប្រសើរជាង។

ពួកអ្នកស្រាវជ្រាវបានរកឃើញថាការត្រួតពិនិត្យរបស់ឪពុកម្តាយទៅលើពេលវេលាដែលកូនៗ ចំណាយមើលទូរ ទស្សន៍ លេងវីដេអូហ្គេម និងលេងអ៊ីនធឺណេត ត្រូវបានផ្សារភ្ជាប់នឹងការដេកកាន់តែច្រើន ធ្វើឲ្យការរៀនសូត្របានប្រសើរ និង មានឥរិយាបប្រសើរឡើងចំពោះក្មេងៗ។

ការសិក្សាថ្មីដែលចេញផ្សាយក្នុងទស្សនាវដ្តី JAMA Network Journals រួមមានទាំងទិន្នន័យបានមកពីសិស្សសា លាចំនួនជាង ១.៣០០ នាក់ពីសហគមន៍ចំនួន ២ ក្នុងរដ្ឋអាយអូវ៉ា និង មីនណេសូតា ក្នុងសហរដ្ឋអាមេរិកអមជាមួយនឹងទិន្នន័យអំពីសិស្សានុសិស្សផ្តល់ឲ្យដោយអ្នកមើលថែក្មេង និងគ្រូសាលាបឋមសិក្សា។ ទិន្នន័យទាំងនេះត្រូវបានប្រមូល ជាផ្នែកមួយនៃកម្មវិធីទប់ស្កាត់ជំងឺធាត់។

អ្នកនិពន្ធដឹកនាំការសិក្សានេះ លោកបណ្ឌិត ឌូក្លាស ជែនថាល (Douglas Gentile) នៃសាកលវិទ្យាល័យ Iowa State University បានឲ្យដឹងថា "លទ្ធផលនេះបង្ហាញថាការត្រួតពិនិត្យខ្លាំងឡើងដោយឪពុកម្តាយកាត់បន្ថយពេលវេលាមុខអេក្រង់សរុបរបស់ក្មេង ដែលជាលទ្ធផលនាំឲ្យក្មេងដេកបានច្រើន រៀនសូត្របានពូកែ និង ពុំសូវប្រ ព្រឹត្តិអាកប្បកិរិយាឆ្គាំឆ្គង"។

"លទ្ធផលនេះបានបង្ហាញថាការគេងកាន់តែច្រើនត្រូវបានផ្សារភ្ជាប់ជាមួយនឹងសន្ទស្សន៍ម៉ាសរាងកាយទាប។ ការត្រួត ពិនិត្យច្រើនឡើងរបស់ឪពុកម្តាយក៏នាំទៅដល់ការមើលឃើញអំពើហិង្សាតិចតួចនៅលើទូរទស្សន៍ និងក្នុងវីដេអូហ្គេម ដែលត្រូវបានផ្សារភ្ជាប់ទៅនឹងឥរិយាបថវិជ្ជមាន និង ការថយចុះអាកប្បកិរិយាឆ្គាំឆ្គងផងដែរ"។

លោកបានបន្ថែមថា "វេជ្ជបណ្ឌិតឯកទេសជំងឺកុមារ គ្រូពេទ្យប្រចាំគ្រួសារ គិលានុបដ្ឋាយិកា និងអ្នកជំនាញផ្នែកថែទាំសុខភាពដែលជម្រុញទឹកចិត្តឪពុកម្តាយឲ្យចូលរួមកាន់តែច្រើនក្នុងប្រព័ន្ធ Media របស់កូនៗពួកគាត់អាចនឹងមានប្រសិទ្ធិភាពជាងក្នុងការធ្វើឲ្យប្រសើរឡើងឥរិយាបថប្រកបដោយសុខភាពដ៏ទូលំទូលាយច្រើនជាងការរំពឹងទុករបស់ពួកគាត់ទៅទៀត"។

លទ្ធផលសិក្សានេះគាំទ្រលទ្ធផលនៃការសិក្សារបស់អាមេរិកថ្មីៗនេះមួយផ្សេងទៀតដែលបង្ហាញថា ក្មេងៗដែលចំណាយពេលច្រើននៅមុខអេក្រង់មានឱកាសកើតជំងឺធាត់ខ្ពស់។

ការសិក្សាដោយក្រុមអ្នកស្រាវជ្រាវនៅមជ្ឈមណ្ឌលសិក្សាសង្គមនៃរដ្ឋអូរីហ្គោន (Oregon Social Learning Center) ក្នុងទីក្រុង Eugene បានបង្ហាញថាក្មេងៗរបស់ឪពុកម្តាយដែលមិនបានត្រួតពិនិត្យពេលវេលាមុខអេក្រង់មានឱកាសខ្ពស់ក្នុងការឡើងទម្ងន់។ ការសិក្សាមួយទៀតដោយអ្នកស្រាវជ្រាវក្នុងប្រទេសអូស្ត្រាលី បានបង្ហាញថាក្មេងៗដែលមើលទូរទស្សន៍ច្រើនមានបញ្ហាគ្រួសារច្រើន។

អ្នកស្រាវជ្រាវនៅសាកលវិទ្យាល័យ Deakin University ក្នុងទីក្រុងមែលប៊ន បានរកឃើញថារៀងរាល់បួនម៉ោងនៅមុខអេក្រង់ ហានិភ័យនៃជីវិតគ្រួសារដែលរងការរំខានអាចនឹងកើនឡើងទ្វេដង។ ពួកគេក៏រកឃើញដែរថាក្មេងៗទាំងនេះមានសុខភាពផ្លូវចិត្តខ្សោយជាង៕