SuperAngkor News | Cambodia News | Khmer News | World News | News | Health | Technoloy | Star | Travel

រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ ឱ្យដឹងកាលពីពេល ថ្មីៗកន្លងមកថា អង្គការទេសចរណ៍ពិភពលោកបានទស្សន៍ទាយ ថា ចិននឹងក្លាយជាគោលដៅទេសចរណ៍សម្រាប់ អនាគត គ្រាដែលប្រទេសនេះអះអាងថា ខ្លួននឹងបញ្ជូនអ្នកទេសចរចេញក្រៅប្រមាណជា ២០០លាននាក់ ហើយនឹងទទួលអ្នកទេសចរអន្តរជាតិ ចូលប្រមាណជា២០០លាននាក់វិញ ដែរនៅឆ្នាំ២០២០ ។ ទន្ទឹមនោះកម្ពុជាក៏កំពុងតែរៀបចំអភិវឌ្ឍន៍លើវិស័យទេសចរណ៍ដើម្បីត្រៀមទទួលអ្នកទេសចរចិនដែលមានកំណើនខ្ពស់គួរឱ្យកត់សម្គាល់ ។

លោកថោង ខុន រដ្ឋមន្ត្រីក្រសួងទេសចរណ៍បញ្ជាក់ថា គិតត្រឹមឆ្នាំ២០១៥នេះ ចិនបានទទួលទេសចរអន្តរជាតិប្រមាណ១២០លាននាក់ ហើយចិនក៏បានបញ្ជូនទេសចរចេញក្រៅ ប្រទេសប្រមាណជា១៣០លាននាក់ដែលមានចំនួនកើនឡើងជាលំដាប់ ។ ដូច្នេះអាចគិតថាដល់ឆ្នាំ២០៣០ចិនអាចបញ្ជូនទេសចររបស់ខ្លួនចេញក្រៅប្រមាណ៩០០លាននាក់ ។

លោករដ្ឋមន្ត្រីថ្លែងថា ជាមួយនឹងកំណើនក៏ខ្លាំងក្លានេះ អង្គការទេសចរណ៍ពិភពលោកបានឱ្យបណ្តាប្រទេសនៅលើសាកលលោកត្រៀមរៀបចំទទួលទេសចរចិនដែលមានកំណើនខ្ពស់នោះ ខណៈដែលបច្ចុប្បន្ននេះបណ្តាប្រទេសអាស៊ានទាំងមូលទទួលបានទេសចរចិនតែប្រមាណ១២លាននាក់ ក្នុងនោះថៃទទួលបានជាង៤លាននាក់ ម៉ាឡេស៊ីទទួលបានជាង២លាននាក់ សិង្ហបុរីជាង២លាននាក់ និងកម្ពុជាទទួលបានជាង៧០ម៉ឺននាក់ ។

លោកថោង ខុន អះអាងថា កម្ពុជាបានត្រៀមរៀបចំរួចជាស្រេចក្នុងការទទួលទេសចរចិន ព្រមទាំងបាននិងកំពុងសុំការបើកផ្លូវចូលទៅក្នុងវេបសាយរបស់ចិនដើម្បីផ្សព្វផ្សាយពីសក្តានុពលទេសចរណ៍នៅកម្ពុជា ។ ទន្ទឹមនោះភាគីទាំងពីរក៏បានធ្វើកិច្ចសហប្រតិបត្តិការយ៉ាងល្អផងដែរ ដូចជាការបើកការហោះហើរត្រង់ពីចិនមកកម្ពុជា ហើយទៅកាន់ខេត្តសៀមរាបដែលក្នុងមួយសប្តាហ៍មានជើងហោះហើររហូតដល់ទៅជាង៥០ជើង ។

តាមរយៈកិច្ចខិតខំប្រឹងប្រែងកន្លងមកនេះក្រសួងទេសចរណ៍មានសុទិដ្ឋិនិយមថា ទេសចរចិននឹងមកកម្ពុជា ក្នុងកំណើនទ្វេដងនៅឆ្នាំ២០១៦ ។ ក្រៅពីមហិច្ឆតាស្រូបយកទេសចរចិន កម្ពុជាក៏បាននិងកំពុងធ្វើកិច្ចសហប្រតិបត្តិការយ៉ាងស្អិតរមួត ជាមួយប្រទេសឥណ្ឌា ដែលកន្លងមកប្រទេសទាំងពីរហាក់ពុំបានគិតគូរលើបញ្ហានេះ ។ សម្រាប់ពេល ថ្មីៗ នេះតាមរយៈដំណើរទស្សនកិច្ចរបស់នាយករដ្ឋមន្ត្រីឥណ្ឌាមកកម្ពុជា បានគិតគូរលើការផ្លាស់ប្តូរទេសចររវាងប្រទេសទាំងពីរឱ្យកាន់តែមានកំណើនខ្ពស់ឡើង ៕