SuperAngkor News | Cambodia News | Khmer News | World News | News | Health | Technoloy | Star | Travel

ភ្នំពេញ ៖ សត្វស្វាមួយប្រភេទនៅក្នុងចំណោមអំបូរសត្វស្វាដែលមាននៅកម្ពុជា គឺប្រភេទសត្វស្វាដែលគេដាក់ឈ្មោះថា ស្វាក្រវាត់ស ឫ ស្វាកន្ទុយស ត្រូវបានគេអះអាងថា រកឃើញដែនជំរករបស់វាធំនៅភូមិភាគឥសាន្តនៃប្រទេសកម្ពុជា។

សត្វស្វាប្រភេទនេះ គឺត្រូវបានគេចាត់ទុកថា គឺជាប្រភេទសត្វស្វាកម្រមួយប្រភេទ នៅលើពិភពលោក ប៉ុន្តែគេបានរកឃើញដែនជំរករបស់វាធំនៅភូមិភាគឥសាន្តនៃប្រទេស កម្ពុជា។

វត្តមានរបស់សត្វនេះត្រូវបានកត់ត្រានៅក្នុងប្រទេសកម្ពុជាតាំងពីឆ្នាំ១៩៦៩ មកម្ល៉េះ ប៉ុន្តែតាមការសិក្សាថ្មីៗ វានៅតែបន្តមានវត្តមាននៅក្នុងប្រទេសកម្ពុជាដដែល ខណៈដែលចំនួនរបស់វានៅតំបន់ឥណ្ឌូចិនគឺត្រូវបានអ្នកអភិរក្សរាយការណ៍ថា កំពុងតែ ធ្លាក់ចុះ។

តាមឯកសារកំណត់ត្រា នៃការរកឃើញកាលពីឆ្នាំ១៩៦៩ ស្វាក្រវាត់ស ឫ ស្វាកន្ទុយស នេះត្រូវបានគេកត់ត្រាថា មានតែនៅភាគខាងកើត ទន្លេមេគង្គតែប៉ុណ្ណោះ ប៉ុន្តែតាមការសិក្សាស្រាវជ្រាវកន្លងមកគឺវាត្រូវបានគេរកឃើញនៅភូមិភាគឥសាន្តនៃប្រទេសកម្ពុជាផងដែរ។

តំបន់ដែលគេរកឃើញនាពេលបច្ចុប្បន្ននេះគឺស្ថិតនៅក្នុងតំបន់ចន្លេះ ពីស្រុក វឺនសាយ ខេត្តរតនៈគីរី និង តំបន់នៅក្នុងស្រុកសៀមប៉ាង ខេត្តស្ទឹងត្រែង ជាប់នឹងព្រំដែន កម្ពុជា និង ប្រទេសវៀតណាម និង ឡាវ។

តាមរយៈឯកសារ ដែលគេបានធ្វើការសិក្សាដោយដាក់កាមេរាបង្កប់នៅក្នុងព្រៃ ពពួកសត្វស្វាស្វាក្រវាត់ស ឫ ស្វាកន្ទុយស ប្រភេទនេះ គឺកំពុងតែរស់នៅជាហ្វូង មានមេ មានឈ្មោល មានកូនតូចៗនៅក្នុងចន្លោះតំបន់ទាំងពីរ ប៉ុន្តែនៅកន្លែងផ្សេងជាពិសេសនៅខាងកើតទន្លេមេគង្គក៏ត្រូវបានគេអះអាងថា នៅតែបន្តមានវត្តមាននៅទីនោះដែរ។

ចំនួនសត្វនេះ មិនត្រូវបានគេកំណត់ច្បាស់នៅឡើយទេ ប៉ុន្តែគេដឹងថា វាគឺជាប្រភេទ សត្វដែលនៅមានសុពលភាពបន្តនិងបង្កាត់ពូជដោយធម្មជាតិបាននៅឡើយទេ។

សត្វស្វាដ៏កម្រនេះ ត្រូវបានគេកំពុងតែអភិរក្ស ដោយថ្មីៗកន្លងទៅនេះ រដ្ឋបាលព្រៃ ឈើ និង អង្គការអភិរក្សអន្តរជាតិ បានបង្កើតតំបន់ត្បាតមួយ ដើម្បីអភិរក្សសត្វស្វាកម្រ និង សត្វព្រៃឯទៀតៗនៅក្នុងតំបន់ វឺនសាយ និងសៀមប៉ាង នេះ។

តំបន់នេះត្រូវបានគេដឹងថា គឺជាដំបន់ដែលសំបូរសត្វព្រៃកម្រជាច្រើនប្រភេទនៅក្នុង ភូមិភាគឥសាន្តនៃប្រទេសកម្ពុជា៕