សណ្ឋាគារ​នេះ​ត្រូវការ​អ្នក​រចនា​ម៉ូត ៦០ នាក់​ដើម្បី​បង្កើត​វា​ឡើង​, ប្រើប្រាស់​កម្មករ ៩.៣០០ នាក់ ដើម្បី​សាងសង់ និង ដាក់​កញ្ចក់​អស់​ចំនួន ១ ម៉ឺន​ផ្ទាំង​។ ប៉ុន្តែ​សណ្ឋាគារ Yanqi Lake Kempinski ដ៏​គួរ​ឲ្យ​ភ្ញាក់ផ្អើល​របស់​ក្រុង​ប៉េកាំង​មួយ​នេះ​ទីបំផុត​ជិត​បើកទ្វារ​ស្វាគមន៍​សាធារណជន​ហើយ​។​

​ដោយមាន​រាង​ដូច​ព្រះអាទិត្យ​រះ សណ្ឋាគារ​នេះ​ត្រូវគេ​និយាយថា​ជា​សញ្ញា​តំណាង​ឲ្យ​ភាព​ចំរុងចម្រើន ខណៈ​ច្រកចូល​រាង​ដូច​ឌី​ស​ចម្រៀង​ដ៏​ប្លែក​តំណាង​ទ្រព្យ​លាភ​ក្នុង​វប្បធម៌​ចិន​។ សំណង់​សណ្ឋាគារ ដែល​ត្រូវបាន​អភិវឌ្ឍ​ឡើង​ដោយ​ក្រុមហ៊ុន​សណ្ឋាគារ​ប្រណីត​របស់​អឺរ៉ុប Kempinski នេះ មាន​កម្ពស់ ៩៧ ម៉ែត្រ​, មាន ២១ ជាន់​, ព្រមទាំង​មាន​កន្លែង​ស្ប៉ា បន្ទប់​ប្រជុំ និង​ភោជនីយដ្ឋាន​ចំនួន ១៤​។ សណ្ឋាគារ​នេះ​ត្រូវគេ​និយាយថា​នឹង​ចាប់ផ្តើម​បើក​ដំណើរការ​ក្នុង​រយៈពេល ៤៦ ថ្ងៃ​ទៀត​។

​សណ្ឋាគារ ដែលមាន​ទីតាំង​លើ​ផ្ទៃដី ១៤ គីឡូម៉ែត្រ​ការ៉េ​នៅ​ចំ​កណ្តាល​បឹង Yanqi ដ៏​ស្រស់ត្រកាល​ក្នុង​ក្រុង​ប៉េកាំង​នេះ មាន​បន្ទប់​ភ្ញៀវ​សរុប​ចំនួន ៥៩៥ បន្ទប់​។ ​បឹង Yanqi ខ្លួនឯង​ផ្ទាល់​មាន​ទីតាំង​ស្ថិតនៅ​ជើងភ្នំ Yanshan ស្ថិតនៅ​ប្រមាណ ៨ គីឡូម៉ែត្រ​ពី​ភាគ​ខាងជើង​ខេត្ត Huairou​។ តំបន់​នេះ​ទាក់ទាញ​ទេសចរ​ចម្រុះ​ជាតិ​សាសន៍​រៀងរាល់ឆ្នាំ​។ មហា​កំផែង Mutianyu ដែលជា​កន្លែង​ទាក់ទាញ​ទេសចរណ៍វប្បធម៌ និង​ប្រវត្តិសាស្ត្រ​ដ៏​ពេញនិយម បាន​ស្វាគមន៍​ភ្ញៀវ ២,៧៩ លាន​នាក់​ជា​កាលពី​ឆ្នាំមុន​៕