SuperAngkor News | Cambodia News | Khmer News | World News | News | Health | Technoloy | Star | Travel

ហូជីមិញ-វៀតណាម: ព្រះវិហារ ស្ថិតក្នុងសួនកំសាន្ដ DIANAM បានជាប់ចំណាត់ថ្នាក់ ជាព្រះវិហារធំជាងគេបំផុត នៅប្រទេសវៀតណាម ដែលមានប្រជាជន ជាង៩០លាននាក់ ហើយព្រះវិហារនេះ គឺគ្មានព្រះសង្ឃគង់នៅទេ។ ប៉ុន្ដែអ្វីដែលអស្ចារ្យនោះ គឺបានកសាងអស់ថវិកា លើផ្នែកសំណង់រួម ចំនួនជាង ៣០ លានដុល្លារ ព្រោះថា វត្ថុមានតំលៃ នៅក្នុងព្រះវិហារ ស្រោបទៅដោយ មាសទាំងអស់។

ក្នុងដំណើរទស្សនកិច្ច តបតាមការអញ្ជើញរបស់ក្រសួងព័ត៌មាន និងទូរគមនាគមន៍វៀតណាម មានអ្នកកាសែតកម្ពុជាមួយក្រុម ដឹកនាំដោយលោក ផុស សុវណ្ណ អគ្គនាយករងសោតទស្សន៍ នៃក្រសួងព័ត៌មាន នៃព្រះរាជាណាចក្រកម្ពុជា បានអញ្ជើញទៅទស្សនកិច្ច នៅសួនកំសាន្ដ DIANAM។ សួននេះ ស្ថិតនៅក្នុងសង្កាត់ Binh Doung ក្រុង Thudau Mot ខេត្ដ Binh Duong ដែលមានចំងាយ ៦០គីឡូម៉ែត្រ ប៉ែកខាងជើង ទីក្រុងហូជីមិញ។

កញ្ញា ដាំង ធីហ្វី អ្នកបកប្រែ និងជាអ្នកពន្យល់ប្រវត្ដិ នៅសួនកំសាន្ដ DIANAM បានបញ្ជាក់ថា សួននេះ បានកសាងនៅ ឆ្នាំ១៩៩៩ ហើយបញ្ចប់នៅឆ្នាំ២០០៨ មានន័យថា កសាងអស់រយៈពេល ចំនួន៩ឆ្នាំ លើផ្ទៃដីសរុប ២៥១ ហិកតា។ សួននេះចែកចេញជាកន្លែងកំសាន្ដធំៗ ចំនួន៦គឺ មានសណ្ឋាគារ សមុទ្រ សួនសត្វ កន្លែងបោះជំរុំ ទីសក្ការៈ និងព្រះវិហារ។

អ្វីដែលជាទីចាប់អារម្មណ៍បំផុត សំរាប់សួនកំសាន្ដដ៏ធំនោះ គឺជាព្រះវិហារ DIANAM។ ទីធ្លាព្រះវិហារនេះ កសាងនៅ លើផ្ទៃដីសរុប ចំនួន ១២ ហិកតា គ្រាន់តែព្រះវិហារ កសាងលើផ្ទៃដី ៥.០០០ ម៉ែត្រការ៉េ។

កញ្ញា ដាំង ធីហ្វី បានបញ្ជាក់ថា ព្រះវិហារដ៏ធំនេះ បានចំងាយអស់ទឹកប្រាក់ សរុបជាង ៣០ លានដុល្លារ ដើម្បីកសាងវា។ ព្រះវិហារនេះ គឺមានវត្ថុដែលមានតំលៃទាំងអស់ ហើយវត្ថុមានតំលៃទាំងនោះ បានស្រោបមាសទាំងអស់ និយាយរួមព្រះវិហារ ស្ទើរតែទាំងមូល បានស្រោបមាសទាំងអស់។

ក្នុងព្រះវិហារ រូបចំលាក់ជាច្រើន មានរូបព្រះពុទ្ធបដិមា មានរូបស្ដេចជាច្រើនអង្គ និងមានអ្វីៗ គ្រប់បែបយ៉ាង រាប់មិន អស់ ដោយមានតូច មានធំ។ ព្រះវិហារនេះ មានទ្វារចំនួន ២៨ ទ្វារ និងសសរនីមួយៗ មានទំហំ ១ ម៉ែត្រ ជារង្វង់ ហើយព្រះវិហារ ខាងក្រៅធ្វើអំពីថ្ម គឺលាយចំរុះជាមួយឈើប្រណិតៗ ហើយមានតំលៃបំផុត។ អ្នកខ្លះហៅថា ព្រះវិហារ ស្រោបមាស ព្រោះតែ ព្រះវិហារនោះ ស្រោបដោយមាស។ ព្រះវិហារនោះទៀតសោត គ្មានព្រះសង្ឃគង់នៅទេ គឺគេកសាងសំរាប់ តែជាទីសក្ការៈបូជា, សំរាប់ប្រជាជនវៀតណាមទូទៅ និងសំរាប់ជនបរទេស។

កញ្ញា ដាំង ធីហ្វី បានប្រាប់ទៀតថា ព្រះវិហារនេះ ពិតមែនតែ កសាងមានអាយុកាលតិចឆ្នាំ ក៏ពិតមែន ប៉ុន្ដែព្រះវិហារនេះ ត្រូវបានរដ្ឋាភិបាលវៀតណាម ចុះក្នុងបញ្ជីបេតិកភ័ណ្ឌជាតិវៀតណាមថា ជាព្រះវិហារធំជាងគេបំផុត នៅប្រទេសវៀតណាម។ នៅក្នុងព្រះវិហារនេះទៀត ក៏បានសរសេរជាក្រាំងមាស បញ្ជាក់ថា នៅប្រទេសវៀតណាម មានត្រកូលខុសៗគ្នា រាប់រយត្រកូល និងមានឈ្មោះជាង ១.៥០០ ខុសៗគ្នា។

ក្រៅពីព្រះវិហារដ៏ធំ ហើយកសាងអស់ទឹកប្រាក់ ជាង ៣០ លានដុល្លារ គឺសួនកំសាន្ដ DIANAM ទាំងមូលនេះ មានបុគ្គលិកបំរើការងារ ជាង ៥០០ នាក់ ហើយកន្លែងកំសាន្ដនីមួយៗ មានការលក់សំបុត្រ តំលៃជាង ១០ ដុល្លារឯណោះ។ ដោយឡែកសួនកំសាន្ដនោះដែរ មានការចាប់អារម្មណ៏ខ្លាំង គឺសត្វខ្លា ស តោ ស ក្របី ស ក្ងោក ស ថ្លាន់ ស និងសត្វមួយចំនួនទៀត ក៏ជាសត្វមានតំលៃនាំចូលពីអាមេរិក។ ភ្ញៀវទេសចរ ក្នុងមួយថ្ងៃៗ មានចំនួន ១.០០០ នាក់ ប៉ុន្ដែសំរាប់ថ្ងៃបុណ្យធំៗ មានរហូតចាប់ពី ១ ម៉ឺននាក់ ទៅ ១៥ ម៉ឺននាក់៕