(ដើមអម្ពិល) របាយការណ៍ របស់ក្រសួងទេសចរណ៍ បានឱ្យដឹងថា កម្ពុជាទទួលបាន ភ្ញៀវទេសចរ បរទេស ប្រមាណ ១.២៦៧.៩២២ នាក់ នៅក្នុងត្រីមាសដំបូង ឆ្នាំ២០១៤ ដែលតួលេខនេះ បានកើនឡើង ៨,២ ភាគរយ បើប្រៀបទៅនឹង ត្រីមាសទីដំបូង ឆ្នាំមុន ដែលទទួលបាន ភ្ញៀវទេសចរប្រមាណ ១.១៧២.០៧២នាក់ ។

របាយការណ៍ដដែលនេះ បានឱ្យដឹងថា ភ្ញៀវទេសចរវៀតណាម បានឈនៅចំណាត់ថ្នាក់កំពូលគេ ក្នុងចំណោម ភ្ញៀវបរទេស ដែលមកកម្សាន្ត នៅកម្ពុជា ចាប់ពីខែមករា ដល់ខែមីនា ឆ្នាំ២០១៤ ហើយបន្ទាប់ពីនោះ មានភ្ញៀវ ទេសចរកូរ៉េ ចិន ឡាវ ជប៉ុន អាមេរិក រុស្ស៊ី ថៃ បារាំង និង ជនជាតិអង់គ្លេស ជាដើម ។

របាយការណ៍ខាងលើ បានឱ្យដឹងទៀតថា ក្នុងត្រីមាសទី១នេះ កម្ពុជាទទួលបាន ភ្ញៀវទេសចរវៀតណាម ចំនួន ១៨៩.៨១៦នាក់ កើនឡើង១៥% បើប្រៀប ត្រីមាសទី១ឆ្នាំមុន, កូរ៉េ ១៧៧.៧១៦នាក់ កើន១៤%, ចិន ១៦២. ៨៦៨នាក់ កើន១២,៨% , ឡាវ ៩៩.០២៣នាក់ កើន៧,៨% , ជប៉ុន ៦៦.៨៩៣នាក់ កើនឡើង ៥,៣% ,អាមេរិក ៦០.៤៦០នាក់ កើនឡើង ៤,៨% , រុស្ស៊ី ៥៥.៤៨៦នាក់ កើនឡើង ៤,៤% , ថៃ ៥២.១៩៣នាក់ កើនឡើង ៤,១% , បារាំង ៤៧,៥១០នាក់ កើនឡើង ២,៧% និងជនជាតិអង់គ្លេស ៤១.៨០៦ កើនឡើង ៣,៣% ផងដែរ ។

ចំណែកឯភ្ញៀវកម្ពុជា ទៅកម្សាន្តទៅក្រៅប្រទេស ក្នុងត្រីមាសទី១ ឆ្នាំនេះ មានចំនួនតែ ២០៨.៩៧២នាក់ ប៉ុណ្ណោះ គឺកើនឡើង ៣,៧% បើប្រៀបទៅនឹង ត្រីមាសដំបូងឆ្នាំមុន ដែលមានប្រមាណ ២០១.៥៤៤ នាក់ ។

ក្នុងឆ្នាំ២០១៣ កន្លងទៅ កម្ពុជា ទទួលបានភ្ញៀវទេសចរ អន្តរជាតិ ប្រមាណ ៤.២១០.១៦៥នាក់ ដែលកើនឡើង ១៧,៥% បើប្រៀប កាលឆ្នាំ២០១២ ជាមួយនឹង ចំណូល ពីវិស័យនេះ ២៥០០លានដុល្លារ សហរដ្ឋអាមេរិក ។

សម្តេចនាយករដ្ឋមន្រ្តី ហ៊ុន សែន ក្នុងពិធីបិទសន្និបាតប្រចាំឆ្នាំ របស់ក្រសួងទេសចរណ៍នៅកោះពេជ្រ កាលពីខែ កុម្ភៈកន្លងទៅ បានចាត់ទុកថា វិស័យទេសចរណ៍ ជាមាសបៃតង ដែលជួយរកចំណូលបានយ៉ាងច្រើន ដល់ ប្រទេសកម្ពុជា ជាពិសេសបានចូលរួមចំណែកក្នុង GDP របស់កម្ពុជា ប្រមាណ១៥% ។

សម្តេចមានប្រសាសន៍ថា “នៅកម្ពុជា រាជរដ្ឋាភិបាល បានចាត់ទុកវិស័យទេសចរណ៍ គឺជា មាសបៃតង ដោយ នៅក្នុងឆ្នាំ២០១៣ កន្លងទៅនេះយើងសម្រេចបាន កំណើនក្នុងអត្រា ១៧,៥% ជាមួយនឹងការមកដល់នៃទេសចរ អន្តរជាតិ ប្រមាណ ៤លាន ២សែននាក់ និងប្រាក់ចំណូល ប្រមាណ ២៥០០ដុល្លារ សហរដ្ឋអាមេរិក ចាក់ចូល ក្នុងសេដ្ឋកិច្ចជាតិ” ។

តាមការព្យាករណ៍ របស់ក្រសួងទេសចរណ៍ នៅឆ្នាំ២០១៥ កម្ពុជានឹងទទួលបាន ភ្ញៀវទេសចរ ៤,៨លាននាក់ ។ ដោយឡែកនៅឆ្នាំ២០១៨ អាចនឹងកើនដល់ ៦,១លាននាក់ ហើយនិង បន្តកើន រហូតដល់ ៧,៥លាននាក់ នៅឆ្នាំ២០២០ ជាមួយនឹងចំណូល ៥០០០លានដុល្លារ សហរដ្ឋអាមេរិក ព្រមទាំង បង្កើតការងារ ដល់ពលរដ្ឋខ្មែរ ប្រមាណ ៨០ម៉ឺននាក់ ផងដែរ ៕