SuperAngkor News | Cambodia News | Khmer News | World News | News | Health | Technoloy | Star | Travel

ខេត្តកំពតគ្មានឆ្នេរខ្សាច់ គ្មានច្រករបៀងចេញចូល គ្មានកំពង់ផែ ដែលធ្វើឲ្យខេត្តនេះ ពិបាកទាក់ទាញភ្ញៀវទេសចរ ដូចខេត្តកែប និងខេត្តព្រះសីហនុ។ តែខេត្តនេះ មានសក្តានុពលខ្ពស់ណាស់ ទៅលើទេសភាព វប្បធម៌ ផ្ទះបុរាណ និងផលិតផលទេសចរណ៍ប្លែកៗ ដូចជាចំការម្រេច ជាដើម។ល។

ដើម្បីអភិវឌ្ឍន៍ផលិតផល ទេសចរណ៍ថ្មីមួយបាន នៅក្នុងខេត្តនេះ ក្រសួងទេសចរណ៍ រួមដៃគ្នាជាមួយអាជ្ញាធរ និងស្ថាប័នពាក់ព័ន្ធ បានតាំងចិត្តថា នឹងចាប់ដំណើរកសាង ក្រុងទេសចរណ៍កំពតថ្មីមួយ ដែលចេញដំណើរពីឆ្នាំ២០១៤ ដល់ឆ្នាំ២០១៨ អាចនឹងសំរេចគោលដៅនេះ។ ការតាំងចិត្តបែបនេះ បានធ្វើឡើងក្នុងកិច្ចប្រជុំអន្តរក្រសួង កាលពីថ្ងៃទី៣០ ខែមេសា កន្លងទៅនេះ ក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ នៅទីស្តីការក្រសួងទេសចរណ៍។

លោកទិត ចន្ថា រដ្ឋលេខាធិការក្រសួងទេសចរណ៍នេះ បានលើកឡើងថាៈ អនាគត ខេត្តកំពតចាំបាច់ ត្រូវតែមានឆ្នេរខ្សាច់ បំរើឲ្យភ្ញៀវទេសចរ មានកំពង់ផែ ទេសចរណ៍មួយ និងចាំបាច់ត្រូវមានច្រកចេញ - ចូលអន្តរជាតិមួយផងដែរ។ ហើយក្រុងទេសចរណ៍កំពតថ្មីនេះ នឹងគ្រោងបង្កើតឲ្យមានផ្ទះទេសចរ ឬក៏ហៅថា ផ្ទះទី២ សំរាប់អនុញ្ញាតឲ្យជនបរទេស ទិញសំរាប់ស្នាក់នៅថែមទៀត។

តើទីតាំងក្រុងទេសចរណ៍កំពតថ្មីនេះស្ថិតនៅឯណា? គឺផ្អែកតាមរបាយការណ៍ នៃសេចក្តីព្រាងផែនការអភិវឌ្ឍន៍ ក្រុងទេសចរណ៍កំពតថ្មីនេះ គឺមានទីតាំងស្ថិតនៅភាគខាងត្បូង នៃទីរួមខេត្តកំពតចាស់ ចម្ងាយប្រមាណ ៦ គីឡូម៉ែត្រ នៃភូមិសាស្ត្រ ភូមិបឹងតាព្រាម សង្កាត់ត្រើយកោះ ទីរួមខេត្តកំពត និងមួយផ្នែក ចូលទៅក្នុងដីភូមិជុំគ្រៀល ឃុំជុំគ្រៀល ស្រុកទឹកឈូ។ តំបន់គ្រោងនឹងសាងសង់ក្រុងថ្មីនេះ ជាប់មាត់សមុទ្រ មានឆ្នេរ ហើយតែត្រូវកែលំអ ឲ្យមានខ្សាច់ល្អសំរាប់កំសាន្ត មានកោះនិម្មិត ដែលជាកោះពីរ ស្ថិតនៅប៉ប្រះទឹក ពេលទឹកសមុទ្រនាច ក្លាយទៅជាកោះ ហើយទឹកសមុទ្រជោ វានឹងលេចកោះនេះបាត់។

ចំពោះទីក្រុងកំពត សព្វថ្ងៃ ត្រូវរក្សាទុកឲ្យទៅជាក្រុងប្រវត្តិសាស្ត្រ សំរាប់អភិរក្សនូវសំណង់ចាស់ ទុកឲ្យមនុស្សជំនាន់ក្រោយៗ ស្វែងយល់ និងភ្ញៀវទេសចរទស្សនាកំសាន្ត។ មិនត្រូវឲ្យមានការវិនិយោគមួយ បង្កើតស្ថាបត្យកម្មសំណង់ថ្មី ដោយវាយកំទេចចោលនូវ សំណង់បូរាណចោល ដូចរាជធានីភ្នំពេញឡើយ។ ក៏ប៉ុន្តែក្រុងថ្មីនេះ ទាមទារឲ្យមានហេដ្ឋារចនាសម្ព័ន្ធ ផ្លូវ ទឹក ភ្លើង ស្ពាន ឲ្យបានសមរម្យផងដែរ។ គេមិនទាន់វាស់វែងទំហំដី និងផ្ទៃទឹកសមុទ្រ ប៉ុន្មានគីឡូម៉ែត្រ ដែលត្រូវកសាងក្រុងទេសចរណ៍មួយនេះ ឲ្យសំរេចតាមគោលដៅនៅឡើយទេ។ ដូច្នេះវាពាក់ព័ន្ធមន្ត្រី ដែនដីនគរូបីយកម្ម បរិស្ថាន ក្រុមប្រឹក្សាអភិវឌ្ឍន៍កម្ពុជា និងអាជ្ញាធរខេត្ត។

កំពង់ផែទេសចរណ៍មួយ គ្រោងនឹងបង្កើត ក្រោមថវិការគាំទ្រដោយធនាគារ ពិភពលោក( ADB)។ មានកំពង់ផែបង្កើតក្រោមថវិការគាំទ្រដោយ ADB។ មានកំពង់ផែនេះ មួយអាចភ្ជាប់ខ្សែទេសចរ ចេញ-ចូលពីកោះភូគួក តាមផ្លូវសមុទ្រមកកំពត និងពីភាគខាងត្បូងថៃ មកខេត្តកំពត ផងដែរ។

គេនឹងកសាងឆ្នេរខ្សាច់មួយ ចាប់ពីព្រែកជីកស្រែអំបិល មកដល់ព្រែកក្បាលរមាស។ ហើយត្រូវបានកែលំអ កោះស្មៅមួយឲ្យទៅជាឧទ្យានសមុទ្រដែលគេឲ្យឈ្មោះថា កោះផ្កាយ និងកូនកោះមួយជាប់កោះស្មៅ ឲ្យក្លាយទៅជាកោះនិម្មិតមួយឈ្មោះហៅថា កោះព្រះច័ន្ទ និងមានរចនាសម្ព័ន្ធជាច្រើនទៀតរួមគ្នា ដោះស្រាយ ជាមួយស្ថាប័នពាក់ព័ន្ធ។

មន្ត្រីខេត្តកំពត បានលើកឡើងថាៈ តំបន់នេះ បើយើងមិនយកទៅធ្វើការអភិវឌ្ឍន៍ឲ្យស្របច្បាប់ទេនោះ នឹងក្លាយទៅជាការអភិវឌ្ឍន៍មួយពោរពេញដោយភាព អនាធិប តេយ្យ។ ដូច្នេះក្រសួងទេសចរណ៍ រួមនឹងអាជ្ញាធរខេត្ត និងស្ថាប័នទាំងអស់ ត្រូវឆក់ឱកាស ចាប់យកគោលដៅនេះ ឲ្យបានសំរេចនៅឆ្នាំ២០១៨។

លោក ថោង ខុន បានប្រាប់ទៅអង្គប្រជុំថាៈ បើយើងគ្មានផលិតផលទេសចរណ៍ថ្មីទេ គឺមិនអាចស្រូបយកភ្ញៀវទេសចរ ឲ្យបានច្រើននោះទេ។ ហើយបើយើងអភិវឌ្ឍន៍ នូវក្រុងទេសចរណ៍កំពតថ្មីនេះបាន អាចចាត់ទុកថា ជាគំរូថ្មីមួយសំរាប់ឲ្យអាជ្ញាធរខេត្ត រាជធានីដទៃៗទៀត រៀនសូត្រតាម។ មិនឲ្យមានការអភិវឌ្ឍន៍ជាន់ឈ្លីបំផ្លាញ លើការអភិរក្សសំណង់ ស្ថាបត្យកម្មចាស់ៗ នោះបានទេ៕