SuperAngkor News | Cambodia News | Khmer News | World News | News | Health | Technoloy | Star | Travel

ភ្ញៀវទេសចរជាតិ និងអន្តរជាតិ ដែលចូលទៅទស្សនាតំបន់រមណីយដ្ឋាន ប្រាសាទសំបូរព្រៃគុហ៍ ខេត្តកំពង់ធំ នឹងមានចំនួនកើនឡើងខ្លាំង នៅក្រោយពេលដែលគម្រោងសាងសង់ផ្លូវក្រាលកៅស៊ូ ចូលទៅដល់ប្រាសាទនេះប្រវែង ២៨ គីឡូម៉ែត្រត្រូវបានសាងសង់រួចរាល់នៅឆ្នាំ២០១៤ខាងមុខនេះ។

លោក សេង អាន ប្រធានមន្ទីទេសចរណ៍ខេត្តកំពង់ធំ មានប្រសាសន៍ថា សម្រាប់ភ្ញៀវទេសចរដែលចូលមកទស្សនានៅក្នុងតំបន់រមនីយដ្ឋាន ប្រាសាទសំបូរព្រៃគុហ៍ ខេត្តកំពង់ធំនេះ ក្នុងមួយថ្ងៃគឺមានប្រហែលជាង ១០០ នាក់។ លោកបន្តថានៅក្រោយពេលដែលគម្រោងសាងសង់ផ្លូវក្រាលកៅស៊ូចូលប្រាសាទនេះ ត្រូវបានស្ថាបនារួចរាល់ហើយនោះ គឺលោករំពឹងថានឹងមានភ្ញៀវទេសចរចំនួនប្រហែលជាង ៤០០ នាក់ក្នុងមួយថ្ងៃ នឹងចូលមកទស្សនារមណីយដ្ឋាននេះជាក់ជាមិនខាន។

ចំណែកឯលោក សុខ សុគន្ធ ប្រធាននាយកដ្ឋានអភិវឌ្ឍន៍ផែនការនៃក្រសួង ទេសចរណ៍ និងជាប្រធានគម្រោងលើក កម្ពស់លទ្ធភាពទទួលបានទីផ្សារ សម្រាប់ពលរដ្ឋក្រីក្រ នៅភាគកណ្ដាលប្រទេសកម្ពុជាបានលើឡើងថា យោងតាមការ ព្យាករណ៍របស់ក្រសួងទេសចរណ៍ នៅឆ្នាំ២០២០ ខាងមុខនេះ ភ្ញៀវទេសចរអន្តរជាតិ ដែលមកទស្សនារមនីយដ្ឋានប្រាសាទសំបូរព្រៃគុហ៍ គឺនឹងមានចំនួនប្រមាណជាង ១៥ ម៉ឺននាក់ក្នុងមួយឆ្នាំ។

ការព្យាករណ៍នេះត្រូវបានលោក អះអាងថា ភ្ញៀវទេសចរនឹងកាន់តែមានភាពងាយ ស្រួលជាងមុន ដោយហេតុថា គម្រោងសាងសង់ផ្លូវក្រាលកៅស៊ូពីផ្លូវជាតិលេខ ៦ ចូលមកប្រាសាទគឺកំពុងតែស្ថាបនាជិតរួចរាល់ហើយ។ ម្យ៉ាងទៀត ភ្ញៀវទេសចរអាចស្នាក់នៅក្នុងសហគមន៍នេះបាន តាមរយៈផ្ទះសហគមន៍ ដែលបានធ្វើឡើងនៅក្នុងភូមិចំនួន ៧ ជុំវិញប្រាសាទនេះផងដែរ។

បញ្ហាផ្លូវចូលមកប្រាសាទគឺជាក្ដីកង្វល់មួយរបស់អ្នកទេសចរដែលចង់ចូលមកទស្សនានៅ តំបន់រមនីយដ្ឋាន ប្រាសាទសំបូរព្រៃគុហ៍ នេះ។ នេះគឺជាកាលើកឡើងរបស់លោក ធៀម លី មេឃុំសំបូរ ស្រុកសំបូរ ដោយលោកបានបញ្ជាក់ថា ប្រសិនបើផ្លូវនេះត្រូវបានសាងសង់រួចរាល់នោះ ចំនួនភ្ញៀវទេសចរនឹងកាន់តែច្រើនឡើងៗទៀត នឹងចូលមកទស្សនាតំបន់ប្រាសាទសំបូរព្រៃគុហ៍នេះ។

គួរបញ្ជាក់ថា គម្រោងសាងសង់ផ្លូវចូលប្រាសាទសំបូរព្រៃគុហ៍ ប្រវែង ២៨ គីឡូម៉ែត្រ ដែលភ្ជាប់ពីតំបន់ប្រាសាទសំបូរព្រៃគុហ៍ ទៅផ្លូវជាតិលេខ៦ នេះ គឺជាផ្នែកមួយនៃគម្រោងកែលម្អផ្លូវជនបទ នឹងបង្កើនលទ្ធផាពទីផ្សារ និងសេវាសង្គមតាមរយៈការ សាងសង់ផ្លូវជនបទប្រវែង ៥០៥,៤ គីឡូម៉ែត្រនៅក្នុងខេត្តចំនួន ៧ ក្នុងប្រទេសកម្ពុជា ដែលទទួលបានហិរញ្ញប្បទានពីធនាគារអភិវឌ្ឍន៍អាស៊ី ADB ៕