SuperAngkor News | Cambodia News | Khmer News | World News | News | Health | Technoloy | Star | Travel

អង្គចូឡាមណីចេតិយដ៏ធំ ឬហៅថាចេតិយភ្នំយ៉ាត មានបាតប្រវែង ១៦ម៉ែត្រគុណនឹងកម្ពស់២៧ម៉ែត្រ កសាងឡើងនៅសតវត្សទី១៩ក្នុងឆ្នាំ១៩២៥ ដោយជនជាតិភូមា(កូឡា) ក្នុងគោលបំណងដើម្បីតម្កល់ ព្រះសារីរិកធាតុរបស់ព្រះសមណគោតម ។ ចេតិយនេះមានអាយុកាលជិត ១០០ឆ្នាំ មកហើយ តែបានជួសជុលនៅថ្ងៃទី២១ តុលា ២០១០ ដោយជនជាតិភូមា(កូឡា) សហការជាមួយអាជ្ញាធរខេត្ដប៉ៃលិន ។

ចេតិយភ្នំយ៉ាតត្រូវអាជ្ញាធរខេត្ដរៀបចំសំណុំឯកសារបញ្ជូនទៅថ្នាក់លើ ដើម្បីឱ្យស្នើសុំដាក់បញ្ចូលជាបេតិកភណ្ឌពិភពលោក ។ ព្រះសង្ឃនាមផៃ ចាន់សេរីរ័ត្ន ព្រះជន្ម៥១វស្សា គង់នៅក្នុងវត្ដគិរីរតនៈ ហៅវត្ដភ្នំយ៉ាត មានថិរដីកាឱ្យដឹងថា អង្គចូឡាមណីចេតិយ ហៅចេតិយភ្នំយ៉ាត ជាកន្លែងគោរពបូជា សាងសង់នៅលើភ្នំយ៉ាត តែដោយមានសភាពទ្រុឌទ្រោមពុកផុយក៏មានការគាំទ្រឧបត្ថម្ភប្រាក់ និងបច្ចេកទេសជួសជុលឡើងវិញ ដោយសប្បុរសជនសហភាពមីយ៉ាន់ម៉ាតាំងពីថ្ងៃទី២១ តុលា ២០១០ រហូតរួចរាល់មានគុណភាពរឹងមាំល្អ ដើម្បីអភិរក្សទុកជាកេរដំណែលប្រវត្ដិ សាស្រ្ដវប្បធម៌ឱ្យបានគង់វង្សជាប្រយោជន៍សម្រាប់អ្នកជំនាន់ ក្រោយៗទៀត ។

អង្គចូឡាមណីចេតិយប្រារព្ធពិធីបុណ្យឆ្លងរៀបចំដោយក្រសួងវប្បធម៌ និងវិចិត្រសិល្បៈ និងសាលាខេត្ដប៉ៃលិន បន្ទាប់ពីជួសជុលរួចកាលពីថ្ងៃទី៤ មីនា ២០១២ ក្រោមអធិបតីភាពលោកជំទាវ ម៉ែន សំអន ឧបនាយករដ្ឋមន្ដ្រីប្រចាំការ និងជារដ្ឋមន្ដ្រីទំនាក់ទំនងរដ្ឋសភា ព្រឹទ្ធសភា និងអធិការកិច្ច លោកហ៊ឹម ឆែម រដ្ឋមន្ដ្រីក្រសួងវប្បធម៌ និងវិចិត្រសិល្បៈ លោក អ៊ី ឈាន អភិបាលខេត្ដ និងលោក ថូរ៉ា អូមីនម៉ោង រដ្ឋមន្ដ្រីក្រសួងធម្មការ និងសាសនានៃសហភាពមីយ៉ាន់ម៉ា អគ្គរាជទូត និងគណៈប្រតិភូនៃសហភាពមីយ៉ាន់ម៉ា និងលោក ព្យុង ម៉ោងម៉ោង អគ្គនាយកក្រុមហ៊ុនស៊ីណេតតិចណូឡូជី ជាអ្នកជួយឧបត្ថម្ភក្នុងការជួសជុលចេតិយនេះ ព្រមទាំងមន្ដ្រីរាជការ ប្រជាពលរដ្ឋចូលរួមយ៉ាងច្រើនកុះករ ។

ចំណែកលោកលឹម ប៊ុនហេង ប្រធានមន្ទីរវប្បធម៌ និងវិចិត្រសិល្បៈខេត្ដឱ្យដឹងថា សំណង់ចេតិយភ្នំយ៉ាតដ៏ចំណាស់នេះ កសាងឡើងនៅសតវត្សទី១៩ ដោយជនអន្ដោប្រវេសន៍មកពីប្រទេសភូមា(កូឡា)ដែលកាលពីមុន ពួកគេមករស់នៅលើទឹកដីខេត្ដប៉ៃលិន និងរកស៊ីថ្កុំថ្កើងក្លាយជាឈ្មួញធំ ។ សំណង់ចេតិយភ្នំយ៉ាតមានរចនាបថដ៏អស្ចារ្យស្រដៀងទៅនឹងចេតិយជាច្រើនដែលគេសាងសង់នៅប្រទេសភូមា(បច្ចុប្បន្ន មីយ៉ាន់ម៉ា) ។ សំណង់ចេតិយនេះមានកំពូលចំនួន៥ ក្នុងនោះគេសង្កេតឃើញកំពូលធំមួយមានកម្ពស់ប្រហែល២៧ម៉ែត្រ ទទឹង១៦ម៉ែត្របួនជ្រុង និងកំពូល តូចៗចំនួន៤ មានកម្ពស់៤,៥ម៉ែត្រ ទទឹង១,៥ម៉ែត្រដែលមានសរសេរឈ្មោះ អ្នកជួយឧបត្ថម្ភកសាងជាភាសាភូមា ។

យោងតាមប្រតិទិនរបស់ជនជាតិភូមា ចេតិយ តូចៗទាំង៤កសាងនៅក្នុងឆ្នាំ១៩២៥ ។ សំណង់ចេតិយធំ គេជឿថា បានកសាងមុនចេតិយ តូចៗទាំង៤ ព្រោះប្រភេទស៊ីម៉ង់ត៍ដែលប្រើលើចេតិយធំមានសភាពចាស់ជាង និងខុសគ្នាពីប្រភេទស៊ីម៉ង់ត៍ប្រើលើចេតិយ តូចៗទាំង៤ ។ លោកលឹម ប៊ុនហេង បន្ដទៀតថា បច្ចុប្បន្នចេតិយភ្នំយ៉ាតបានក្លាយជាទីកន្លែងសក្ការគោរពបូជាដ៏សំខាន់សម្រាប់ប្រជាជននៅប៉ៃលិន ក៏ដូចជាអ្នកមកពីទីឆ្ងាយ និងក្លាយជាបូជនីយដ្ឋានប្រវត្ដិសាស្រ្ដដ៏ល្អឯកមួយនៅក្នុងខេត្ដ ។

ឆ្លងកាត់ពេលវេលាយ៉ាងយូរ និងខ្វះការថែទាំ ចេតិយភ្នំយ៉ាតខូចខាតយ៉ាងដំណំដែលចាំបាច់ត្រូវសង្គ្រោះបន្ទាន់ ។ ក្នុងស្ថានភាពបែបនេះ សប្បុរសជនប្រទេសមីយ៉ាន់ម៉ា លោក ព្យុងម៉ោងម៉ោង ជួយឧបត្ថម្ភជាប្រាក់ប្រមាណ១២១.០៤៧ដុល្លារអាមេរិក សម្រាប់ជួសជុល ចាប់ផ្ដើមពីខែតុលា ឆ្នាំ២០១០ ទៅតាមដំណាក់កាល នីមួយៗ និងតាមគោលការណ៍បច្ចេកទេសត្រឹមត្រូវ ក្រោមកិច្ចសហការយ៉ាងជិតស្និទ្ធជាមួយក្រុមការងារបេតិកភណ្ឌនៃក្រសួងវប្បធម៌ និងវិចិត្រសិល្បៈ និងកិច្ចគាំទ្រសម្របសម្រួលពីសាលាខេត្ដប៉ៃលិន រហូតបានរួចរាល់មានភាពល្អប្រសើរទុកជានិមិត្ដរូបមួយនៃក្រុងប៉ៃលិន ៕