SuperAngkor News | Cambodia News | Khmer News | World News | News | Health | Technoloy | Star | Travel

ប្រធានមន្ទីរទេសចរណ៍រាជធានីភ្នំពេញ បានអះអាងថា ភ្ញៀវទេសចរអន្តរជាតិដែលចូលមកទស្សនាកម្ពុជានៅតែមានកំណើននៅក្រោយការបោះឆ្នោត បើទោះជាស្ថានភាពនយោបាយមានបញ្ហាខ្លះៗក៏ដោយ ។ លោក តាំង សុចិត្តគ្រឹស្នា ប្រធានមន្ទីរទេសចរណ៍រាជធានីភ្នំពេញ បានអះអាងប្រាប់កោះសន្តិភាព កាលពីពេលថ្មីៗនេះថា ភ្ញៀវទេសចរអន្តរជាតិដែលចូលមកសម្រាកកម្សាន្តនៅកម្ពុជាមិនមានការថយចុះទេ គឺនៅតែមានកំណើនគួរឱ្យកត់សម្គាល់នៅក្រោយការបោះឆ្នោតជ្រើសតាំងតំណាងរាស្ត្រនីតិកាលទី៥ កាលពីថ្ងៃទី២៨ កក្កដា ២០១៣ ។

លោក តាំង សុចិត្តគ្រឹស្នា បញ្ជាក់ថា ក្នុងរយៈពេល២ខែគឺខែមិថុនា និងខែកក្កដា កន្លងមក ភ្ញៀវទេសចរអន្តរជាតិចូលមកទស្សនាក្នុងរាជធានីភ្នំពេញមានចំនួន៣.៩៨៧នាក់ កើនឡើងប្រមាណ៤,៩៥% បើប្រៀបធៀបនឹងរយៈពេលដូចគ្នាក្នុងឆ្នាំមុន ។ ទន្ទឹមនោះ ចាប់ពីក្រោយពេលបោះឆ្នោតមកភ្ញៀវទេសចរអន្តរជាតិនៅតែបន្តចូលមកទស្សនាកម្ពុជា សំខាន់ទស្សនារាជធានីភ្នំពេញ ក្នុងចំនួនច្រើនដដែល បើទោះជាមន្ទីរមិនទាន់បានបូកសរុបចំនួនភ្ញៀវសម្រាប់ខែសីហានេះក៏ដោយចុះ ។ ប៉ុន្តែលោកហ៊ានអះអាងថា ចំនួនភ្ញៀវគឺកើនឡើងច្រើនជាងបើប្រៀបធៀបនឹងរយៈពេលដូចគ្នានៃឆ្នាំមុន ។

លោកប្រធានមន្ទីរបានអះអាងទៀតថា បើទោះជាក្រោយការបោះឆ្នោតបញ្ហានយោបាយនៅកម្ពុជា មើលទៅហាក់ដូចជាមានបញ្ហាខ្លះៗ ប៉ុន្តែមិនប៉ះពាល់ដល់កំណើនភ្ញៀវទេសចរអន្តរជាតិនោះទេ ។ យ៉ាងណាក៏ដោយលោកក៏បានទទួលស្គាល់ថា វិស័យទេសចរណ៍នៅតែជួបបញ្ហាខ្លះៗនៅឡើយ ដែលគប្បីរៀបចំធ្វើការកែសម្រួលឡើងវិញ ។ បញ្ហាប្រឈមរួមមាន ការផ្គត់ផ្គង់ខណៈពេលដែលភ្ញៀវមានចំនួនកាន់តែច្រើន ហើយការផ្គត់ផ្គង់នៅមានកម្រិត ។ បញ្ហាបរិស្ថានក៏ជាកត្តាសំខាន់ដែលត្រូវកែលម្អដែរ ព្រោះថាភ្ញៀវទេសចរអន្តរជាតិភាគច្រើនមកពីបណ្តាប្រទេសជឿនលឿន ។ ដូច្នេះគេត្រូវការបរិស្ថានល្អក្នុងពេលសម្រាកកម្សាន្តនៅតំបន់រមណីយដ្ឋានទេសចរណ៍ ។ ទន្ទឹមនោះបញ្ហាសន្តិសុខសង្គមក៏ជាបញ្ហាសំខាន់បំផុត ព្រោះបើស្រុកយើងមិនមានសន្តិសុខគ្រប់គ្រាន់ទេនោះ ភ្ញៀវទេសចរគេនឹងមានការរារែកក្នុងការមកកម្សាន្តនៅកម្ពុជា ។

ប៉ុន្តែបញ្ហាប្រឈមទាំងអស់នោះ លោកប្រធានមន្ទីររាជធានីភ្នំពេញបានអះអាងថា ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោជាប្រមុខ និងក្រោមការគ្រប់គ្រងរបស់ក្រសួងទេសចរណ៍ នោះអ្វីៗដែលជាបញ្ហាប្រឈម នឹងត្រូវកាត់បន្ថយជាបណ្តើរៗ និងឈានដល់ការលុបបំបាត់ទាំងស្រុងជាមិនខាននៅពេលខាងមុខ ៕