SuperAngkor News | Cambodia News | Khmer News | World News | News | Health | Technoloy | Star | Travel

យោងតាមទីភ្នាក់ងារសារព័ត៌មានកូរ៉េខាងត្បូង YONHAP ថា ក្រុងសេអ៊ូលបានស្នើកាលពីថ្ងៃទី២០ សីហា រៀបចំធ្វើនាថ្ងៃទី២៥ កញ្ញាខាងមុខនេះ នូវការចរចាស្តីពីលទ្ធភាពនៃការបើកទេសចរណ៍ឡើងវិញ នៅតំបន់ភ្នំ KUMGANG របស់កូរ៉េខាងជើង ។ ក្រសួងបង្រួបបង្រួមកូរ៉េខាងត្បូងឱ្យដឹងថា ការចរចានឹងត្រូវធ្វើនាថ្ងៃទី២៥ កញ្ញា ក្រោយពីរៀបចំឱ្យមានការជួបជុំគ្រួសារ ដែលព្រាត់គ្នាក្នុងឱកាសនៃបុណ្យ CHUSEOK ដែលជាបុណ្យប្រពៃណីកូរ៉េមួយ ។ បុណ្យនោះឆ្នាំនេះនឹងរៀបចំធ្វើនាថ្ងៃទី១៩ កញ្ញា ។

ដំណើរទេសចរណ៍នៅតំបន់ភ្នំ KUMGANG ត្រូវផ្អាកចាប់តាំងពី៥ឆ្នាំមកហើយ ។ ក្នុងសេចក្តីប្រកាសព័ត៌មានមួយ ក្រសួងបង្រួបបង្រួមកូរ៉េខាងត្បូងនិយាយថា ចាំបាច់ត្រូវលើកឡើងពីបញ្ហានេះដោយប្រុងប្រយ័ត្នសំដៅស្វែងរកដំណោះស្រាយមួយ ដែលអាចនាំទៅរកការអភិវឌ្ឍជាបន្តបន្ទាប់នូវទីតាំងទេសចរណ៍នោះ ។ សេចក្តីប្រកាសបន្តថា ដោយអ្វីៗមិនបាច់ប្រញាប់ប្រញាល់ពេក រដ្ឋាភិបាលចង់រៀបចំការចរចាយឺតពេលបន្តិច ដោយផ្តោតជាបឋមលើការជួបជុំរបស់បណ្តាគ្រួសារដែលព្រាត់គ្នា ។

សេចក្តីប្រកាសគូសបញ្ជាក់ថា ផ្តល់អាទិភាពខ្ពស់ដល់ការជួបជុំរបស់បណ្តាគ្រួសារដែលព្រាត់គ្នា ជារឿងចម្បង ព្រោះមនុស្សជាច្រើនចង់ជួបជាមួយសាច់ញាតិ គ្រួសារដែលពេលនេះកាន់តែមានវ័យចាស់ពុំអាចមានពេលច្រើនទៀតឡើយ ។ ការជួបជុំសាច់ញាតិដែលព្រាត់ប្រាសគ្នា ត្រូវបានរដ្ឋាភិបាលចាត់ទុកថាជារឿងមនុស្សធម៌ ។

ក្នុងចំណោមពលរដ្ឋកូរ៉េខាងត្បូងចំនួន៧៣.០០០នាក់ ដែលស្នើសុំជួបជាមួយសមាជិកគ្រួសាររស់នៅកូរ៉េខាងជើង ប្រមាណជា៨០% មានអាយុលើសពី៧០ឆ្នាំទៅហើយ ។ សរុបកន្លងមក មានការរៀបចំឱ្យមានការជួបជុំគ្រួសារព្រាត់គ្នា១៨លើក ដែលលើកចុងក្រោយគឺកាលពីដំណាច់ឆ្នាំ២០១០ ។ ក្រសួងបង្រួបបង្រួមកូរ៉េខាងត្បូងសង្ឃឹមថា ការខិតចូលជិតគ្នារវាងកូរ៉េទាំង២ ចំពោះបញ្ហាទាំងឡាយនឹងផ្អែកលើការជឿទុកចិត្តគ្នាទៅវិញទៅមក ។

ប្រទេសកូរ៉េខាងជើងមុននេះបានទាក់ទងមកកូរ៉េខាងត្បូង តាមរយៈខ្សែគមនាគមន៍រួមបង្កើតឡើងនៅភូមិប៉ានមុនហ្សូម ដោយស្នើដល់ក្រុងសេអ៊ូលឱ្យឆ្លើយតបនាសប្តាហ៍នេះនូវសំណើរបស់ខ្លួន ធ្វើការចរចាពីរឿងភ្នំ KUMGANG និងការជួបជុំរបស់បណ្តាគ្រួសារដែលព្រាត់គ្នា ។ ក្រុងព្យុងយ៉ាងនិយាយថា ចង់រៀបចំការចរចាអំពីគ្រួសារដែលព្រាត់គ្នានាថ្ងៃទី២៣ សីហា ហើយចរចាអំពីភ្នំ KUMGANG ១ថ្ងៃមុននេះគឺនៅថ្ងៃទី២២ សីហា ។

ក្រុងព្យុងយ៉ាងនិយាយទៀតថា ការចរចាទាំង២នោះគួរធ្វើនៅភ្នំ KUMGANG ទោះបីមុននេះក្រុងសេអ៊ូលស្នើឱ្យការចរចាពីគ្រួសារដែលព្រាត់គ្នាគួរធ្វើក្នុងផ្នែកកូរ៉េខាងត្បូងនៃភូមិបានមុនហ្សូមក្តី ។ ទោះបីជាក្រុងសេអ៊ូលទទូចថា បញ្ហាទេសចរណ៍នៅភ្នំ KUMGANG និងបញ្ហាជួបជុំគ្រួសារជាបញ្ហា២ដាច់ដោយឡែកពីគ្នា ក៏ក្រុងព្យុងយ៉ាងនៅតែទទូចថា បញ្ហាទាំង២នោះ មានការទាក់ទងគ្នា ដោយឱ្យដឹងថា កូរ៉េខាងជើងចង់ដោះស្រាយបញ្ហាទាំង២នោះរួមគ្នាផង ៕