SuperAngkor News | Cambodia News | Khmer News | World News | News | Health | Technoloy | Star | Travel

សំបុកជំងឺឆ្លងផ្តាសាយបក្សីមួយបង្កឡើងដោយវីរុសអម្បូរថ្មី H7N1 ត្រូវបានរកឃើញលើសត្វអូទ្រីស នៅទ្វីបអាហ្វ្រិក ធ្វើឲ្យកក្រើកក្តីបារម្ភអំពីការផ្ទុះឡើងគ្រោះមហន្តរាយសាកលលោក ពេលចំនួនមនុស្សស្លាប់ដោយសារផ្តាសាយ H7N9 នៅចិន គិតមកដល់ថ្ងៃទី១០ ខែមេសា បានឡើងដល់ ៩ នាក់ ។

តាមព័ត៌មានថ្មីបំផុត លទ្ធផលត្រួតពិនិត្យសំណកពីបណ្តាកសិដ្ឋាននៅជិត Oudtstroorn មជ្ឈមណ្ឌលរបស់វិស័យឧស្សាហកម្មនាំចេញសត្វអូទ្រីសអាហ្វ្រិកខាងត្បូង បង្ហាញថា មានវត្តមានវីរុស H7N1 ។ ថ្វីត្បិតដូច្នេះ រដ្ឋអំណាចនៅកន្លែងកើតមានសំបុកផ្តាសាយ A\H7N1 ប្រកាសថា វីរុសនេះឆ្លងរាលដាលតែក្នុងសត្វ និងមិនឥទ្ធិពលដល់មនុស្សទេ។

ថ្ងៃទី៩ មេសា ក្រសួងកសិកម្មខេត្ត Cape ខាងលិច ឲ្យដឹងថា ជំងឺផ្តាសាយបង្កការរារាំងដល់ការរស់នៅរបស់ពពួកបក្សីធំៗ និងវិស័យផលិតកម្មនៅតំបន់នេះ ។ នាង Marna Sinclair ពេទ្យសត្វរដ្ឋមួយរូប នៅ Oudtstoon បានឲ្យដឹងថា តំបន់នេះធ្លាប់លេចចេញវីរុស H7N1 តែពុំទាន់មានសញ្ញាណាបង្ហាញថា អម្បូរវីរុសនេះ មានពាក់ព័ន្ធដល់សំបុកជំងឺ H7N9 នៅប្រទេសចិនបច្ចុប្បន្ន, ក្រៅពីនេះ វីរុសមិនឆ្លងមកមនុស្ស។

២ឆ្នាំមុន អាហ្វ្រិកខាងត្បូងបានកម្ទេចសត្វអូទ្រីស ១០,០០០ ក្បាល ក្រោយការផ្ទុះជំងឺផ្តាសាយបក្សីមួយមិនឥទ្ធិពលដល់មនុស្ស, តម្រូវឲ្យប្រទេសនេះត្រូវផ្អាកការនាំចេញសាច់អូទ្រីសជាបណ្តោះអាសន្ន ទៅកាន់សហគមន៍អឺរ៉ុប។

ក្នុងការវិវត្តន៍ប្រែប្រួលមួយផ្សេង H7N9 បានសម្លាប់មនុស្ស ៩ នាក់ នៅប្រទេសចិន, ៣១ នាក់ ឆ្លងជំងឺ គិតត្រឹមថ្ងៃទី១០ មេសា យោងតាមតួលេខផ្លូវការពីគណៈកម្មការសុខភាព និងផែនការគ្រួសារជាតិចិន។

Reuters បានឲ្យដឹងដែរថា ក្នុងថ្ងៃទី១០ មេសា នេះ ចិនបានចាប់ខ្លួនមនុស្សតិចបំផុត ១០ នាក់ ដែល "បង្ហោះព័តមានមិនពិត" អំពីជំងឺផ្តាសាយ H7N9 លើបណ្តាញអ៊ីនធើណែត បង្កឲ្យកើតមានភាពចលាចល។

ក្នុងពេលពួកអ្នកវិទ្យាសាស្ត្រពិភពលោក បានថ្លែងសរសើរចិនថា ប្រឹងប្រែងយ៉ាងពេញទំហឹងក្នុងការគ្រប់គ្រងសំបុកជំងឺ H7N9 នោះប្រជាជនចិនខ្លួនឯងបែរជាកំពុងមន្ទិលសង្ស័យអំពីព័ត៌មានផ្តល់ដោយរដ្ឋាភិបាល ។ មុននេះ១០ឆ្នាំ ប្រទេសនេះ បានប្រឹងប្រែងបិទបាំងសំបុកជំងឺ SARS ដែលផ្ទុះឡើងក្នុងឆ្នាំ២០០៣ បណ្តាលឲ្យ SARS ក្លាយជាគ្រោះមហន្តរាយឆ្លងរាលដាលដល់មនុស្សជាង ៨០០០ នាក់ លើទូទាំងពិភពលោក។

សហគមន៍អ៊ីនធើរណែតបានចោទជាសំណួរថា ហេតុអ្វីរដ្ឋាភិបាលរង់ចាំដល់ ១ សប្តាហ៍ ទើបប្រកាសពីជំងឺឆ្លង? ចម្លើយដែលទទួលបាន គឺពួកមន្ត្រីសុខាភិបាលត្រូវការមានពេលវេលា ដើម្បីកំណត់ប្រភេទរីរុស ដែលមុននេះពុំទាន់ធ្លាប់ឆ្លងមកមនុស្ស ៕