SuperAngkor News | Cambodia News | Khmer News | World News | News | Health | Technoloy | Star | Travel

ទីក្រុងអូស (Osh) គឺជាទីក្រុងវ័យចំណាស់មួយ ក្នុងចំណោមទីក្រុងវ័យចំណាស់ជាច្រើន ក្នុងតំបន់អាស៊ីកណ្តាល ហើយអ្នករស់នៅក្នុងទីក្រុងនេះអះអាងថា ទីក្រុងនេះមានវ័យចាស់ជាងទីក្រុងរ៉ូមរបស់អ៊ីតាលីទៅទៀត។ ការអះអាងនេះប្រហែលនៅមិនឆ្ងាយប៉ុន្មានពីការពិតនោះទេ ខណៈដែលរបស់សេសសល់ពីប្រវត្តិសាស្ត្របានចង្អុលបង្ហាញថា ការតាំងទីលំនៅរបស់មនុស្សនៅទីនេះមានតាំងពីសតវត្សរ៍ទី ៥ មុនគ.ស.។

គេមិនដឹងច្បាស់ថាតើទីក្រុងនេះកើតឡើងដោយរបៀបណានោះទេ ប៉ុន្តែក៏មិនខ្វះទ្រឹស្តីអំពីកំណើតវានោះដែរ។ ទ្រឹស្តីមួយចំនួននិយាយថា ស្តេច សូឡូម៉ុន បានបញ្ជាឲ្យសាងសង់ទីក្រុងនេះ ចំណែកទ្រឹស្តីដទៃទៀតបានលើកឡើងថា ជាព្រះចៅអធិរាជអាឡិចសង់ឌឺ គឺជាអ្នកសាងសង់។ គ្មានអ្វីជាមន្ទិលសង្ស័យនោះទេដែលទីក្រុងអូសធ្លាប់ជាទីសំចតដ៏សំខាន់នៅតាមផ្លូវស៊ីល (Silk Road) ឬផ្លូវកំណាត់សូត្រ។ នៅត្រឹមសតវត្សរ៍ទី ៨ ទីក្រុងនេះត្រូវបានចាត់ទុកថាជាមជ្ឈមណ្ឌលសំខាន់មួយក្នុងចំណោមមជ្ឈមណ្ឌលសំខាន់បំផុតជាច្រើនសម្រាប់ផលិតផលកំណាត់សូត្រ។ ទីក្រុងនេះក៏ធ្លាប់ជាទីតាំងដ៏សំខាន់សម្រាប់ពូជសេះហ្វឺចហាណា (Ferghana) ដែលណែនាំដោយលោក ម៉ាកូ ប៉ូឡូ (Marco Polo) និង ត្រូវបានចាត់ទុកថាមានតម្លៃបំផុតដោយក្រុមអ្នកជំនួញចិននៅទិសខាងកើត។

សព្វថ្ងៃ កេរ្តិ៍តំណែលរបស់ផ្លូវកំណាត់សូត្រនេះបានបន្សល់ទុកនៅផ្សារជេម៉ា បាហ្សា (Jayma Bazaar) ដ៏អស្ចារ្យ ដែលបច្ចុប្បន្ននៅតែជាផ្សារមួយក្នុងចំណោមផ្សារដ៏ធំបំផុតនៅតំបន់អាស៊ីកណ្តាល និង មានភាពមមាញឹកបំផុតនៅព្រឹកថ្ងៃអាទិត្យ។ ផ្សារនេះគឺជាទីកន្លែងល្អបំផុតដើម្បីទិញរបស់របរផ្សេងៗមានចាប់ពីកូនកាំបិតផលិតក្នុងស្រុករហូត ដល់មួកប្រពៃណីពណ៌សខ្មៅវែងឈ្មោះថា កាល់ប៉ាក់ (kalpak) ដែលនិយមពាក់ដោយបុរសជនជាតិកៀរគីស្ថាន។ ផ្សារនេះពេញហៀរដោយផលិតផលផ្លែឈើតាមរដូវកាលដែលដឹកមកពីដីសម្បូរជីជាតិនៃតំបន់ជ្រលងហ្វឺហ្គាណា (Fergana Valley) ជាតំបន់មួយក្នុងចំណោមតំបន់កសិកម្មចាស់ជាងគេបំផុតលើពិភពលោក។

ដោយដើរកាត់ទីក្រុងនេះ អ្នកនឹងដើរកៀកស្មាជាមួយមនុស្សមកពីអាស៊ីកណ្តាលខុសៗគ្នាជាច្រើននាក់មិនគួរឲ្យជឿ រួមមានជនជាតិ អ៊ុយបេគីស្ថាន កៀរគីស្ថាន និង តាជីគីស្ថាន។ ស្ត្រីៗស្លៀកពាក់សម្លៀកបំពាក់ចម្រុះពណ៌របស់ពួកគេសម្រាប់ថ្ងៃដើរផ្សារ ចំណែកបុរសៗក្នុងស្រុកវិញធ្វើការនៅរោងជាងដែកនៅតាមច្រកផ្លូវតូចៗ។ វាមិនអាចទៅរួចនោះទេដែលចាកចេញពីផ្សារបាហ្សាដោយមិនបានភ្លស្សរសជាតិសាច់អាំងឈ្មោះកេបាប (kebab) និង នំប៉័ងដុតស្រស់ៗឈ្មោះថា ណាន (Nan)។

ទីតាំងប្រវត្តិសាស្ត្រសំខាន់បំផុតក្នុងទីក្រុងអូសគឺផ្ទាំងសិលាឈ្មោះថាសូឡូម៉ុនស្រូន (Solomon's Throne) ជាផ្ទាំងថ្មខ្ពស់មួយដែលមានកម្ពស់ខ្ពស់ជាងអគារខ្ពស់ៗរបស់ទីក្រុងនេះទៅទៀត និង ត្រូវបានគេគិតថាជាទីតាំងបញ្ចុះសពរបស់ស្តេចសូឡូម៉ុន។ ទីតាំងនេះក៏ជាទីកន្លែងសំខាន់នៃធម្មយាត្រារបស់អ្នកកាន់សាសនាអ៊ីស្លាមដែរ ព្រោះពួកគេជឿថាព្យាការីមហាម៉េតបានថ្វាយបង្គំនៅទីនេះ។ ក្នុងឆ្នាំ ១៤៩៧ ស្តេចនៃអាណាចក្រហ្វឺហ្គាណាព្រះនាម បាបួរ (Babur) បានសាងសង់ព្រះវិហារអ៊ីស្លាមនៅជាប់នឹងភ្នំមួយកន្លែង ហើយជាមួយអ្នកដែលមានសួត និង ជើងខ្លាំង គឺគេអាចឡើងទៅដល់ទីកំពូលក្នុងរយៈពេលតែ ២០ នាទីប៉ុណ្ណោះ និងថតយកទិដ្ឋភាពដ៏ស្រស់បំព្រងនៃទីក្រុងអូស។

ទីក្រុងអូសគឺជាទីក្រុងដែលមានទិដ្ឋភាពស្រស់ស្អាតបំផុតមួយក្នុងតំបន់អាស៊ីកណ្តាល ហើយទីក្រុងនេះសក្តិសមនឹងឲ្យគេចំណាយពេលវេលាពេញមួយថ្ងៃ ដើរមើលផ្លូវដែលពោរពេញដោយសឹ្លកឈើ និងផ្លូវធំៗ នៅតាមមាត់ទន្លេណាស់។ អំឡុងថ្ងៃបុណ្យជាតិនានា អ្នកអាចទស្សនាល្បែងប្រណាំងសេះប្រពៃណី និង ការប្រកួតបរបាញ់សត្វឥន្ទ្រី។ ចេញពីកន្លែងនេះ អ្នកអាចចំណាយពេលធ្វើដំណើរពេញមួយថ្ងៃទៅកំពូលភ្នំឡេនីន (Lenin Peak) កម្ពស់ ៧,១៧៥ ម៉ែត្រ ជាតំបន់អស្ចារ្យបំផុតសម្រាប់អ្នកចូលចិត្តដើរភ្នំ និង អ្នកចូលចិត្តឡើងភ្នំ៕