SuperAngkor News | Cambodia News | Khmer News | World News | News | Health | Technoloy | Star | Travel

អាល្លឺម៉ង់ជាប្រទេស ដែលមានប្រជាប្រិយបំផុត នៅលើពិភពលោក បើទោះបីជាមានការតវ៉ាប្រឆាំង របស់ខ្លួនចំពោះវិធានការក្បិតក្បៀត នៅក្នុងសហភាពអឺរ៉ុបក៏ដោយ ។ នេះបើយោងតាម ការអង្កេតប្រចាំឆ្នាំ ដោយសារព័ត៌មាន BBC ចេញផ្សាយកាលពី ថ្ងៃទី២៣ ឧសភា ឆ្នាំ២០១៣ ។

ប្រជាជនជាង ២៦.០០០នាក់ មកពីជុំវិញពិភពលោក ត្រូវបានគេសួរនាំ ឲ្យកំណត់ចំណាត់ថ្នាក់ ប្រទេសចំនួន ១៦ថា តើឥទ្ធិពលពិភពលោក មានភាពវិជ្ជមាន ឬអវិជ្ជមាន ។ ប្រមាណជា ៥៩% នៃអ្នកដែលបានអង្កេត បានផ្តល់ចំណាត់ថ្នាក់ ប្រទេសអាល្លឺម៉ង់ថា មានឥទ្ធិពលវិជ្ជមាន ខណៈដែលប្រទេសអឺរ៉ង់ ស្ថិតនៅចំណាត់ថ្នាក់ចុងក្រោយដែលមានតែ ១៥% ដែលចាត់ទុកប្រទេសនេះថា មានលក្ខណៈអនុគ្រោះ ។

សូម្បីតែនៅប្រទេសអេស្ប៉ាញ ដែលជាប្រទេសទទួលរងឥទ្ធិពល ពីវិធានការក្បិតក្បៀត ដោយសារកញ្ចប់ថវិកាសង្គ្រោះហិរញ្ញវត្ថុរបស់អាល្លឺម៉ង់ក៏ដោយ ក៏ប្រជាជន ៦៨% និយាយថា គេមានអារម្មណ៍ថា អាល្លឺម៉ង់មានឥទ្ធិពលវិជ្ជមាននៅលើពិភពលោក ។

អ្នកឆ្លើយតបជាច្រើន នៅប្រទេសក្រិច ដែលគេឃើញថា បានតវ៉ាប្រឆាំងអាល្លឺម៉ង់ ចាត់ទុកលោកស្រី អធិការបតីអង់ហ្គេឡា មើគែលថា ជាពួកណាហ្ស៊ី ដោយសារលោកស្រី តវ៉ានឹងការកាត់បន្ថយ ការចំណាយសាពើពន្ធ ។ ហេតុដូច្នេះហើយ ទើបប្រជាជនក្រិច ៥២% ផ្តល់ចំណាត់ថ្នាក់អាល្លឺម៉ង់ ជាប្រទេសមានឥទ្ធិពលអាក្រក់ ។

ប្រទេសអាល្លឺម៉ង់បានជំនួសកន្លែង ប្រទេសជប៉ុនមកនៅលើតារាង ដែលកាលពីឆ្នាំទៅ ប្រទេសដែលមានប្រជាប្រិយ នៅអាស៊ីមួយនេះ ធ្លាក់ពី ៥៨% មកនៅ ៥១% ។ ប្រទេសកាណាដា និងប្រទេសអង់គ្លេស ជាប់ចំណាត់ថ្នាក់លេខ២ និងលេខ៣ ។ ប្រទេសទាំងពីរ ទទួលបានចំណាត់ថ្នាក់ វិជ្ជមាន ៥៥% ខណៈដែលប្រទេសប៉ាគីស្ថាន និងកូរ៉េខាងជើង ជាប់នៅបាតតារាង ។ ការអង្កេតនេះ ត្រូវបានធ្វើឡើងដោយអង្គការ GlobeScan and PIPA សម្រាប់សារព័ត៌មាន BBC ហើយបានសួរសំណួរប្រជាជន ដែលបានជ្រើសរើសនៅក្នុង ២៥ប្រទេស ៕