ក្រៅពី​មមាញឹក​រៀបចំ​ហេដ្ឋារចនាសម្ព័ន្ធ​ផ្លូវថ្នល់ សួនច្បារ លូទឹក ដើម្បី​ឆ្ពោះទៅ​រៀបចំ​បុណ្យ​សមុទ្រ​នៅ​ចុងឆ្នាំ​២០១៣​នេះ ខេត្ត​កែប បាន​និង​កំពុង​រៀបចំ​ចាក់​ខ្សាច់​ថ្មី នៅលើ​ឆ្នេរ​ចាស់ ដើម្បី​ឲ្យ​ភ្ញៀវ​អាច​លេង​ទឹក​នៅ​ឆ្នេរ​នេះ​បាន​វិញ​។​
​ ​
​លោក​ម៉ម ទូច ប្រធាន​មន្ទីរ​សាធារណការ​ខេត្ត​កែប បាន​ឲ្យ​ដឹង​នៅ​ថ្ងៃទី​៣ ខែឧសភា ឆ្នាំ​២០១៣ ថា ឆ្នេរសមុទ្រ​ចាស់​នៅ​ក្រុងកែប មុខ​ដំណាក់ កំពុង​ត្រូវ​បានរៀបចំ​ចាក់​ខ្សាច់​ថ្មី ដោយនៅ​ក្នុងឆ្នាំនេះ ត្រូវធ្វើ​ឲ្យ​បាន​ប្រវែង ៣៧០​ម៉ែត្រ​។ ខ្សាច់​ដែល​ត្រូវ​ចាក់​នោះ គឺ​ដឹក​មកពី​ក្នុង​សមុទ្រនៅ​ខេត្ត​ព្រះសីហនុ និង​ខេត្តកំពត​។​
​ ​
​លោក​ម៉ម ទូច បាន​ឲ្យ​ដឹង​ទៀតថា ខ្សាច់​ត្រូវ​ចាក់​ចូលទៅក្នុង​សមុទ្រ មាន​ចម្ងាយ​៥០​ម៉ែត្រ (​ពី​ឆ្នេរ​ទឹកជោរ​ដល់​) និង​មាន​កម្រាស់​ពី ០,៤ ម៉ែត្រ រហូតដល់​ជាង ២ ម៉ែត្រ ដើម្បី​ឲ្យ​ភ្ញៀវ​លេង​ទឹក​នៅ​ឆ្នេរ​នេះ​បាន​។ ឆ្នេរ​នេះសព្វថ្ងៃមាន​ថ្ម​ច្រើន និង​ទឹក​ជ្រៅ​។ ចំណែកឯ​ការងារ​ចាំបាច់​ដែល​មន្ទីរ​សាធារណការ និង​ខេត្ត​កែបកំពុង​យកចិត្តទុកដាក់​ធ្វើ​យ៉ាង ខ្លាំងនៅពេលនេះ ត្រូវបាន​លោក​ម៉ម ទូច បញ្ជាក់ថា គឺ​ផ្លូវ​លេខ​៣៣​អា ចាប់ពី​រង្វង់​មូល​សេះស ដល់​ផ្សារ​ក្តាម ដែល មាន​ប្រវែង​៧.៨០០ ម៉ែត្រ ដោយ​ត្រូវ​ពង្រីក​តួ​ផ្លូវ​ឲ្យ​បាន​ដល់ ៣៣​ម៉ែត្រ ចាក់​កៅស៊ូ ទទឹង ២៧​ម៉ែត្រ​។ ដើមឈើ (​ក្ងោក​) នៅ​កណ្តាលផ្លូវ​នេះ ត្រូវបាន​គាស់​រំ​កឹ​ល​ទៅ​ដាំ​នៅ​ចិញ្ចើមផ្លូវ​វិញ​។ ផ្លូវ​នេះ​មាន​សួនច្បារ​នៅ​ចំ​កណ្តាល ទទឹង​បី​ម៉ែត្រ​។ ផ្លូវ​៣៣​អានេះ ត្រូវធ្វើ​ឲ្យ​បាន​រួចរាល់ មុន​ពិធីបុណ្យ​សមុទ្រ​នៅ​ចុងឆ្នាំ​នេះ​មកដល់​៕