SuperAngkor News | Cambodia News | Khmer News | World News | News | Health | Technoloy | Star | Travel

រមណីយដ្ឋានធម្មជាតិ អាងទឹកត្រពាំងថ្ម ក្នុងអំឡុងពេលបុណ្យ ចូលឆ្នាំថ្មីប្រពៃណីជាតិ (១៤ដល់១៦មេសា ២០១៣) ដែលទើបរំលងទៅនេះ មានមនុស្សម្នា ទៅកម្សាន្ដច្រើនកុះករ គឺច្រើនជាងឆ្នាំទៅមិញ។ នៅក្នុងផ្ទៃទឹកដេរដាស ដោយអ្នកទេសចរ លេងទឹកកម្សាន្ដ ជាមួយពោង ពោះវៀនកង់រថយន្ដ ។ រមណីយដ្ឋាននេះស្ថិតក្នុងស្រុកភ្នំស្រុក ខេត្ដបន្ទាយមានជ័យ ។

អាជ្ញាធរមូលដ្ឋាន និងសមត្ថកិច្ចឱ្យដឹងថា ភ្ញៀវទេសចរដែលទៅកម្សាន្ដនៅអាងទឹកត្រពាំងថ្មមានទាំងអ្នកក្នុងខេត្ដ និងមកពីខេត្ដផ្សេងៗ ។ តាមការប៉ាន់ប្រមាណ គឺក្នុងអំឡុងពេលបុណ្យចូលឆ្នាំថ្មីប្រពៃណីជាតិនាឆ្នាំនេះ គឺមានភ្ញៀវទេសចរទៅកម្សាន្ដនៅអាងទឹកត្រពាំងថ្មច្រើនជាងឆ្នាំទៅមិញ ។

ចំពោះបញ្ហាសន្ដិសុខ សណ្ដាប់ធ្នាប់គឺមានលក្ខណៈល្អប្រសើរ ដោយសារកម្លាំងការពារសន្ដិសុខមាននគរបាលទេសចរខេត្ដ នគរបាលស្រុក កងរាជអាវុធហត្ថស្រុក និងកម្លាំងប្រជាការពារយកចិត្ដទុកដាក់ក្នុងភារកិច្ចរបស់ខ្លួន ។

សមត្ថកិច្ចរក្សាបានសណ្ដាប់ធ្នាប់ល្អជូនប្រជាពលរដ្ឋដែលទៅលេងកម្សាន្ដនៅអាងទឹកត្រពាំងថ្ម ។ ចំពោះម្ហូបអាហារនៅទីនោះ មានតម្លៃសមរម្យដែលភ្ញៀវទេសចរអាចទទួលយកបាន ។

បើគេធ្វើដំណើរតាមផ្លូវជាតិលេខ៦ ពីខេត្ដសៀមរាប ដល់ភូមិព្រៃមាន់ ឃុំរហាល ស្រុកព្រះនេត្រព្រះ ខេត្ដបន្ទាយមានជ័យ បត់ខាងស្ដាំដៃ ឬបើធ្វើដំណើរចេញពីទីរួមខេត្ដបន្ទាយមានជ័យ តាមផ្លូវជាតិលេខ៦ បត់ខាងឆ្វេងដៃ ឃើញរូបសំណាកយាយរវៃសូត្រ នោះនឹងមានផ្លូវមួយឆ្ពោះទៅខាងជើងគឺជាផ្លូវចូលទៅអាងទឹកត្រពាំងថ្ម មានចម្ងាយពីទីរួមស្រុកភ្នំស្រុកប្រមាណ ៧ទៅ៨គីឡូម៉ែត្រ ។

អាងទឹកត្រពាំងថ្មមានផ្ទៃទឹកធំល្វឹងល្វើយផ្ដល់សក្ដានុពលផ្នែកកសិកម្មចំនួន២ស្រុក គឺស្រុកភ្នំស្រុក និងស្រុកព្រះនេត្រព្រះ ។ ក្រៅពីនេះអាងទឹកត្រពាំងថ្មជារមណីយដ្ឋានធម្មជាតិមានសត្វក្រៀលកក្រហម ដែលជាសត្វដ៏កម្រនៅលើពិភពលោក ។ រមណីយដ្ឋានដ៏ប្រណីតនេះ ទាក់ទាញភ្ញៀវទេសចរជាតិ និងអន្ដរជាតិច្រើនទៅលេងកម្សាន្ដ ខណៈមានផ្លូវកៅស៊ូងាយស្រួលធ្វើដំណើរ ៕