SuperAngkor News | Cambodia News | Khmer News | World News | News | Health | Technoloy | Star | Travel

កញ្ញាចម្រើន សុភ័ក្រគឺជាអ្នកសិល្បៈវ័យក្មេងមានជំនាញខាងចម្រៀងប្រពៃណី មហោរី យីកេ របាំបុរាណ និងរបាំប្រពៃណី ។ នាងមានអាយុត្រឹមតែ២២ឆ្នាំ ប៉ុណ្ណោះ តែទេពកោសល្យរបស់នាងមិនចាញ់អ្នករបាំជើងចាស់ប៉ុន្មានទេ ។ ជាពិសេសដោយសារតែសំឡេងនាងពីរោះ ក៏ត្រូវលោកអៀង ស៊ីធុល ជាគ្រូរបស់នាងនាំដើរច្រៀងនៅក្នុងពិធីមង្គលការស្ទើរគ្រប់ទីកន្លែង ។

ពេលសុភាស្រែកច្រៀងគឺពីរោះគ្រលួចធ្វើឱ្យអ្នកឆ្លងកាត់ទីនោះចោលភ្នែកសំឡឹងមើលនាង និងដាក់អារម្មណ៍ស្ដាប់នាងយ៉ាងយកចិត្ដទុកដាក់។ នៅពេលនាងច្រៀងចប់ អ្នកទស្សនាទះដៃសម្ដែងការគាំទ្រដល់រូបនាង ។ លើសពីនេះនាងធ្លាប់ទទួលបានចំណាត់ថ្នាក់លេខ១ ខណៈពេលប្រឡងនៅស្ថានីយទូរទស្សន៍ CTN និងចំណាត់ថ្នាក់លេខ២នៅស្ថានីយទូរទស្សន៍បាយ័ន ។

កញ្ញាចំរើន សុភ័ក្រ រៀបរាប់ឱ្យដឹងថា នាងមានស្រុកកំណើតនៅភូមិបាក់ខែង ឃុំបាក់ខែង ស្រុកមុខកំពូល ខេត្ដកណ្ដាល តែឪពុកម្ដាយរបស់នាងបានផ្លាស់ទៅរស់នៅភ្នំពេញតាំងពីឆ្នាំ២០០០មកម៉្លេះ ព្រោះតែឪពុកម្ដាយរបស់នាងចង់ឱ្យបងប្អូនរបស់នាងទាំងបីនាក់ចូលហាត់រៀនសិល្បៈ ។

កញ្ញាចំរើន សុភ័ក្រ មានឪពុកឈ្មោះហូល ចំរើន ជាអនុប្រធានការិយាល័យសៀករហស្សកម្ម ចំណែកឯម្ដាយឈ្មោះឡាច រ៉ានី ជាមេផ្ទះ ។ នាងមានបងប្អូនជាអ្នកសិល្បៈទាំងបីនាក់ គឺស្រី២នាក់ និងប្រុសម្នាក់ ហើយនាងជាកូនទី២ក្នុងគ្រួសារ ឆ្នាំនេះអាយុ២២ឆ្នាំ ។ បច្ចុប្បន្នសុភ័ក្រកំពុងបន្ដការសិក្សានៅសាកលវិទ្យាល័យភូមិន្ទវិចិត្រសិល្បៈផ្នែកចម្រៀងបុរាណ ។

កញ្ញាចំរើន សុភ័ក្រ រៀបរាប់ពីដំណើរជីវិតក្នុងវិស័យសិល្បៈរបស់នាងថា នាងបានចូលហាត់រៀនសិល្បៈតាំងពីឆ្នាំ២០០២មកក្នុងវ័យ១២ឆ្នាំ នៅក្នុងសមាគមបណ្ដុះបណ្ដាលសេដ្ឋកិច្ចកុមារកំព្រាទីទ័លក្រជនបទរបស់លោកអៀង ស៊ីធុល ។ ពីដំបូងនាងហាត់ផ្នែករបាំប្រពៃណី របាំបុរាណ និងផ្នែកចម្រៀងបុរាណ ។

អ្នករបាំ និងចម្រៀងរូបនេះឱ្យដឹងទៀតថា នាងហាត់រៀនជាមួយលោកអៀង ស៊ីធុល បានតែ១ឆ្នាំប៉ុណ្ណោះ ក្រុមរបស់នាងក៏ទៅចូលរួមជាមួយក្រុមអង្គការសិល្បៈខ្មែរអមតៈ ។ ពួកនាងបានហាត់រៀននៅទីនោះរហូតដល់ឆ្នាំ២០០៤ ទើបចេញសម្ដែងនៅតាមកម្មវិធីនានាទាំងនៅក្នុងស្រុក ក៏ដូចនៅតាមបណ្ដាខេត្ដនានា ។

រហូតដល់ឆ្នាំ២០០៧ សុភ័ក្របានចេញទៅសម្ដែងនៅប្រទេសអង់គ្លេស និងឆ្នាំ២០១១នាងចេញទៅសម្ដែងនៅសហរដ្ឋអាមេរិក ។ នៅចុងឆ្នាំ២០១២ នាងបានចេញទៅសម្ដែងនៅប្រទេសវៀតណាម ។ ចំរើន សុភ័ក្រប្រាប់ថា សព្វថ្ងៃនេះនាងឆ្លៀតពេលច្រៀងភ្លេងការ និងចម្រៀងសម័យជាមួយលោកអៀង ស៊ីធុល តាមកម្មវិធីផ្សេងៗ ។

អ្នករបាំ និងចម្រៀងរូបនេះរំលឹកឱ្យដឹងពីជោគជ័យរបស់នាងថា កាលពីឆ្នាំ២០០៨និង២០០៩នៅស្ថានីយទូរទស្សន៍ CTN ក្នុងកម្មវិធី «កេរមរតកដូនតា» មានការប្រឡងចម្រៀងបុរាណ ។ ពេលនោះដោយមានការលើកទឹកចិត្ដពីលោកគ្រូ អ្នកគ្រូ និងឪពុកម្ដាយ ហើយខ្លួននាងផ្ទាល់ក៏ចង់ឱ្យគេទទួលស្គាល់សំឡេងរបស់នាងផងនោះ ក៏ដាក់ពាក្យប្រឡងហើយបានប្រឡងជាប់ចំណាត់ថ្នាក់លេខ១ ផ្នែកចម្រៀងប្រពៃណី ។ ក្រោយមកហេតុតែចិត្ដស្រឡាញ់ផ្នែកចម្រៀងបុរាណ និងចង់ដឹងពីភាពរីកចម្រើនផ្នែកចម្រៀងយីកេរបស់នាងផងនោះនាងដាក់ពាក្យប្រឡងនៅស្ថានីយទូរទស្សន៍បាយ័នក្នុងកម្មវិធី «ស្នាមញញឹមនៃវប្បធម៌» បានប្រឡងជាប់ចំណាត់ថ្នាក់លេខ២ ។

កញ្ញាចំរើន សុភ័ក្រ សំណូមពរដល់យុវវ័យឱ្យជួយគាំទ្រសិល្បៈបុរាណដែលជាកេរមរតកដូនតា ព្រោះកាលណាបើមានចរិតប្រកាន់យកអ្វីដែលថ្មី ហើយបោះបង់អ្វីដែលចាស់ៗចោលនោះវាមិនមែនជាការល្អទេ ៕