SuperAngkor News | Cambodia News | Khmer News | World News | News | Health | Technoloy | Star | Travel

រាជធានីភ្នំពេញ ៖ ជាយូរឆ្នាំមកហើយដែលអ្នកនាងអម្ពរ ទេវី ចាកចេញពីអាជីពសម្តែងភាពយន្ត ទៅសាងជីវិតថ្មីនៅលើទឹកដីអាមេរិក ។ ឆ្លើយតបការទទូចចង់ឱ្យចូលរួមសម្តែងសាជាថ្មីម្តងទៀតពីមហាជននោះ ថ្មីៗកន្លងមកមានដំណឹងច្បាស់ការណ៍ទម្លាយឱ្យដឹងថា អ្នកនាងអម្ពរ ទេវី នឹងមកចូលរួមសម្តែងក្នុងខ្សែភាពយន្តមួយ ។

តារាសម្តែងអម្ពរ ទេវី ថ្វីដ្បិតតែចាកឃ្លាតពីអាជីពសម្តែងយូរមកហើយក្តី តែអ្នកទស្សនាចាំមិនភ្លេចទេ ព្រោះនាងបានចូលរួមចំណែកយ៉ាងសំខាន់ក្នុងវិស័យសិល្បៈភាពយន្ត។ ទោះបីជាជោគជ័យល្បីឈ្មោះខ្ចរខ្ចាយ តែអ្នកនាងអម្ពរ ទេវី បានបន្សាត់ខ្លួនពីការសម្តែងយ៉ាងស្ងប់ស្ងាត់ ។ ជាង១០ឆ្នាំមកហើយដែលអតីតតារាសម្តែងស្រីល្បីឈ្មោះក្នុងអំឡុងទសវត្សរិ៍ទី៩០ អម្ពរ ទេវីចាកចេញពីកម្ពុជាទៅរស់នៅសហរដ្ឋអាមរិក ហើយក្រោយមកនាងបានរៀបការគូថ្មី ។

កន្លងទៅតារាសម្តែងអម្ពរ ទេវី បានបង្ហាញវីដេអូឃ្លីបជាលើកដំបូងក្រោយពីស្នាដៃសម្តែងរបស់នាង និងលោកទេព រិនដារ៉ូ ត្រូវស្ថានីយទូរទស្សន៍ក្នុងស្រុកមួយប្រមូលចាក់បញ្ចាំងជាថ្មី ប៉ុន្តែនាងមិនបានបង្ហើបពីគម្រោងវិលមកចូលរួមសម្តែងភាពយន្តនៅកម្ពុជាវិញទេ ។ ថ្មីៗកន្លងមក អ្នកធ្លាប់ទាក់ទងគ្នាជិតដិតទម្លាយឱ្យដឹងថា អ្នកនាងអម្ពរ ទេវី គ្រោងវិលមកកម្ពុជាក្នុងអំឡុងពិធីបុណ្យចូលឆ្នាំថ្មីប្រពៃណីជាតិ ដើម្បីសាកសួរសុខទុក្ខសាច់ញាតិ អតីតស្វាមី ពិសេសចូលរួមសម្តែងខ្សែភាពយន្តខ្នាតធំថ្មីមួយ។ ប្រភពនោះមិនបញ្ជាក់អំពីផលិតកម្ម និងចំណងជើងខ្សែភាពយន្តទេ ។

ប្រភពព័ត៌មាននិយាយថា «អ្វីដែលធ្វើឲ្យតារាសម្តែងវ័យ៤៥ឆ្នាំរូបនេះសម្រេចចិត្តឆ្លៀតពេលមកសម្តែងខ្សែភាពយន្តជាថ្មី ព្រោះតែផលិតករ និងអ្នកនាងអម្ពរ ទេវី ស្គាល់គ្នាជិតដិត ហើយវាស្របតាមការទទូចរបស់អ្នកគាំទ្រចង់ឲ្យនាងវិលមកចូលរួមសម្តែងជាថ្មី ។ ចំពោះតម្លៃខ្លួននៃការថតខ្សែភាពយន្តនេះ គឺមិនខ្ពស់កប់ពពកឡើយ ព្រោះតែការសម្តែងនេះគឺជាគោលបំណងស្របគ្នារបស់ផលិតករ និងតារាសម្តែងស្រីរូបនេះក្នុងការជួយជំរុញ លើកកម្ពស់វិស័យភាពយន្តនៅកម្ពុជា ហើយនាងក៏មិនស្ថិតក្នុងតំណែងជាតួឯកដែរ ។ តាមគម្រោងនាងនឹងត្រូវចំណាយពេលជាច្រើនខែដើម្បីសម្រាកលំហែកម្សាន្ត បូករួមទាំងការសម្តែងភាពយន្តថ្មីនេះ» ។

ថ្មីៗនេះទស្សនិកជនក្នុងស្រុកចាប់ផ្តើមចាប់អារម្មណ៍ពីខ្សែភាពយន្តខ្មែរ ហើយស្ថានីយទូរទស្សន៍អាស៊ីអាគ្នេយ៍បានប្រមូលទិញភាពយន្តចាស់ៗដែលសម្ដែងដោយអ្នកនាងអម្ពរ ទេវី និងលោកទេព រិនដារ៉ូ ពីអតីតកាលយកចាក់ផ្សាយ។ អ្នកនាងអម្ពរ ទេវី បានបង្ហាញវីដេអូឃ្លីប ខ្លីមួយ ស្វាគមន៍សាទរចំពោះការចាក់ផ្សាយជាថ្មី ខ្សែភាពយន្តដែលនាងចូលរួមសម្តែង ។

និស្សិតសាកលវិទ្យាល័យភូមិន្ទភ្នំពេញ ផ្នែកអក្សរសាស្ត្រឆ្នាំទី៤កញ្ញាលីន សម្ជស្ស និយាយថា នាងសប្បាយរីករាយគ្រាដែលដឹងថា អ្នកនាងអម្ពរ ទេវី នៅតែមានចិត្តចង់ចូលរួមក្នុងវិស័យសិល្បៈភាពយន្ត ហើយលៃលករកពេលវេលាចូលរួមសម្តែង ។ អម្ពរ ទេវី ជាតារាគំរូម្នាក់ដែលស្រឡាញ់សិល្បៈ ទោះជាទៅដល់កន្លែងមានក្តីសុខក្នុងជីវិត តែមិនភ្លេចទីកន្លែងធ្លាប់ស្រូបយកភាពល្បីល្បាញ ។ និស្សិតស្រីរូបនេះនិយាយថា «ខ្ញុំចង់ឲ្យសិល្បករទាំងអស់ជារលកក្រោយដែលបន្តវេនក្នុងសិល្បៈគួរតែពង្រឹងសមត្ថភាព ហើយខំសម្តែង រៀនមើលរៀមច្បង ស្តាប់គ្រូ ស្តាប់មេកោយ គោរពពេលវេលា និងពង្រឹងអត្តចរិតឲ្យល្អ កុំមើលស្រាលមនុស្សជុំវិញខ្លួន កាន់តែខ្ពស់កាន់តែឱននោះប្រជាប្រិយភាពមិនសាបសូន្យឡើយ ប្រៀបដូចបងស្រីអម្ពរ ទេវី លោកទេព រិនដារ៉ូ ទៅដល់ទីណាគេនឹកដល់ទីនោះ ក៏ព្រោះតែពួកគាត់មិនឆ្មើងឆ្មៃ នេះជាតារាសិល្បៈកម្ររកមែន» ។

បច្ចុប្បន្នអតីតតារាសម្តែងអម្ពរ ទេវីកំពុងរស់នៅជាមួយកូនពីរនាក់ គឺកូនប្រុសច្បងឈ្មោះភិរុណ ឥន្ទបុត្រ អាយុ១៤ឆ្នាំ និងកូនស្រីឈ្មោះភិរុណ លក្ស្មី ទេវី អាយុ៦ឆ្នាំ ។

នៅចុងទសវត្សរ៍ទី៨០ និងក្នុងទសវត្សរ៍៩០ ស្នាដៃសម្តែងភាពយន្តរបស់អ្នកនាងអម្ពរ ទេវី មិនតិចជាង១០០រឿងទេ ដោយរឿង ល្បីៗមាន រឿង «សម្ដីចុងក្រោយ» រឿង «ឆ្អឹងអណ្ដែត» រឿង «ចុងស្រល់» និងរឿង «ជើងមេឃដាច់ស្រយាល» ជាដើម ។

តាមរយៈការបង្ហាញស្នាដៃសម្តែងសាជាថ្មីនាពេលខាងមុខនេះនឹងទាក់ទាញម្តងទៀតមិនខានឡើយ គ្រាដែលកំពូលតារាសម្តែងអម្ពរ ទេវី ធ្លាប់ធ្វើឲ្យមហាជនទទួលស្គាល់រួចទៅហើយ ពីទេពកោសល្យសម្តែងរបស់នាង ។ ទស្សនិកជននឹងរង់ចាំទស្សនាស្នាដៃថ្មីរបស់អ្នកនាងអម្ពរ ទេវី ៕