SuperAngkor News | Cambodia News | Khmer News | World News | News | Health | Technoloy | Star | Travel

ឪពុកម្ដាយគ្រប់រូប គួរតែលុបបំបាត់ចោលហើយ នូវវប្បធម៌ជ្រើសរើសគូរស្រករ អោយកូនប្រុសស្រី រៀបការតាមចិត្តគំនិតរបស់ខ្លួនឯង ឬតាមការយល់ឃើញដោយឯកឯង ដោយមិនមានការសំរេចចិត្ត ពីកូនជាមុនសិននោះ។ មនុស្សគ្រប់រូប រមែងតែងកំណត់លក្ខខណ្ឌខុសៗពីគ្នា ក្នុងការ រើសបុរសឬស្ត្រីដែលខ្លួនចង់បានជាគូអនាគត។ ជា ទូទៅ កម្រមានអ្នកណាម្នាក់ ដែលពេញចិត្តឲ្យអ្នកដទៃ រើសគូស្រករជំនួសខ្លួនណាស់។

ការជ្រើសរើសគូរស្រករ វាមិនមែនជារឿងសាមញ្ញធម្មតាទេ ដែលតំរូវអោយបុគ្គល មិនមែនជាសាមីខ្លួន ធើ្វការសំរេច ចិត្ត តាមតែការនឹកឃើញ ជំនួសខ្លួននោះឡើយ។ មនុស្សម្នាក់ៗ គ្រប់រូប កើតមកតែងតែចង់បានសិទ្ធិសេរីភាព ក្នុង ការរស់នៅ ក៏ដូចជា ការសំរេចចិត្តជ្រើសរើសគូរស្រករ របស់គេរៀងៗខ្លួនផងដែរ បើទោះបីជាការសំរេចចិត្តជ្រើស រើសនោះ ត្រូវឬខុសក៏ដោយ ក៏គេនៅតែទទួលយកលទ្ធផល ដែលកើតចេញពីការ សំរេចចិត្តរបស់គេ ដោយមិនធ្វើការបន្ទោស ទៅលើនរណាម្នាក់ឡើយ ក្រៅពីខ្លួនគេទេ ប្រសិនបើការសំរេចចិត្តនោះ វាខុស។ ផ្ទុយទៅវិញប្រសិន បើឪពុកម្ដាយ ជាអ្នកជ្រើសរើសអោយ ហើយការរស់នៅរបស់ពួកគេ ក្រោយជីវិតអាពាហ៍ពិពាហ៍ មិនបានប្រកប ដោយ សុភមង្គលទេនោះ កំហុសធ្ងន់ គឺធា្លក់ទៅលើឪពុកម្ដាយ ហើយអ្វីដែលអាក្រក់បំផុត គឺធ្វើអោយឪពុកម្ដាយខ្លួនឯងផ្ទាល់ មានវិប្បដិសារីមួយជីវិត។

ពាក្យចាស់តែងពោលថា ឪពុកម្ដាយគ្រប់រូប មិនដែលចង់អោយកូនៗ លំបាកនិងវេទនានោះទេ ប៉ុន្តែយើងធ្វើការចោទសួរទៅវិញថា បើការជ្រើសរើសគូរស្រករ អោយកូនដោយមិនបានសួរចិត្តកូន ជាមុន ឬក៏ការជ្រើសរើស មិន មែនជាមនុស្សដែលកូនស្រលាញ់ពេញចិត្ត ឬមិនកំណត់តាមលក្ខខណ្ឌ ដែលកូនចង់បាន តើវាដូចគ្នាឬទេទៅនឹងការធ្វើអោយកូនលំបាកនោះ?។

កាលពីមុន គេឃើញមានឪពុកមា្ដយ ភាគច្រើន តែងនិយមផ្សំផ្គុំកូនប្រុសស្រី ដោយការត្រូវរ៉ូវគ្នាដោយសំលឹងទៅលើទ្រព្យសម្បត្តិ មាសប្រាក់ បុណ្យសក្តិ ដោយមិនផ្ដោតសំខាន់ឡើយ ទៅលើបញ្ហាចំណេះវិជ្ជា ហើយធ្វើការចាប់ផ្សំផ្គុំ អោយកូនរៀបការ ទាំងអ្នកខ្លះ មិនដែលនឹងបានជួបមុខគ្នាម្ដង ឬក៏បានស្វែងយល់ចិត្តគ្នាទៅវិញទៅមកផងក៏មាន។

គំនិតចាស់គំរិលបែបនេះ បានជះឥទ្ធិពលអាក្រក់ខ្លាំងណាស់ ដល់អនាគតរបស់កូន និងសង្គមជាតិគឺថាពេលខ្លះត្រូវបង្ខំកូនអោយលះបង់ពីការសិក្សា ទៅយកប្ដីយកប្រពន្ធ ដោយមិនបានទុកពេលវេលាអោយកូនសិក្សាអោយបានចប់ចុងចប់ដើម ជាមុនសិន។ រីឯពេលខ្លះ ធ្វើការគៀបសង្កត់ផ្លូវចិត្តផ្លូវកាយ ដល់ថ្នាក់កូនទ្រាំលែងបាន ត្រូវបង្ខំចិត្តរត់ចេញពីផ្ទះផង ក៏មាន។

លោក មាស សុវណ្ណៈ អាយុ២៤ឆ្នាំ ជានិស្សិតឆ្នាំទី៤ នៃសាកលវិទ្យាល័យមួយ នៅភ្នំពេញ បាននិយាយប្រាប់ CEN ថា ៖ ឳពុកម្ដាយខ្លះ សុខចិត្តបំបែកកូនៗ ដែលស្រឡាញ់គ្នា ហើយចូលចិត្តធ្វើតាមគ្នា ដែលចង់អោយកូនស្រី ទៅរៀបការជាមួយ តែអ្នកមានជាងខ្លួន។

លោកបានបន្តទៀតថា លោកមិនមែនផ្តោតលើឳពុកម្ដាយទាំងអស់ សុទ្ធតែបែបនេះនោះទេ គឺថាឪពុកម្ដាយមួយ ចំនួនខ្លះ និយមប្រកាន់វណ្ណៈណាស់ ហើយពួកគាត់មិនបានពិចារណាថា ដល់ថ្ងៃក្រោយកូនប្រសាអ្នកមាននោះអាចរស់នៅជាមួយកូនរបស់គាត់ ប្រកបសុភមង្គល ឬក៏អត់នោះទេ។

លោកក៏បានបន្ថែមទៀតថា“ខ្ញុំសូមផ្តាំទៅឪពុកម្តាយទាំងអស់ថា កូនមិនមែនសម្រាប់លក់ទេកុំបង្ខំកូនអោយរៀបការ ដើម្បីតែផលប្រយោជន៍ និងមុខមាត់របស់ខ្លួន”។

លោក ចាន់ ចំរើន អាយុ៤៥ឆ្នាំ ជាអ្នករត់ម៉ូតូរ៉ឺម៉ក នៅម្ដុំផ្សារធំថ្មី រាជធានីភ្នំពេញ បានប្រាប់ CEN អោយដឹងដែរថា ក្នុងនាមលោកជាឳពុកម្នាក់ គឺមិនដែលគិតថារកគូស្រករអោយកូនឆាប់រៀបការនោះទេ លោកចង់ឃើញកូនរៀនអោយបានខ្ពស់សិន ហើយរឿងគូស្រករគឺ ទុកអោយកូនរបស់គាត់ ជាអ្នកសំរេចចិត្តដោយខ្លួនឯង ថាត្រូវរៀបការពេលណានោះ គឺលោកមិនបង្ខំកូនទេ។

លោកស្រី សាស្ត្រាចារ្យ ដែលបង្រៀនក្នុងសាកលវិទ្យាល័យមួយ នៅរាជធានីភ្នំពេញម្នាក់ សុំមិនបញ្ចេញឈ្មោះបាននិយាយដែរថា ជាគោល ការណ៍ការរៀបការទៅបាន លុះត្រាតែមានឆន្ទះរួម ឬត្រូវគ្នារវាងបុរស និងនារី ដែលមានអាយុ១៨ឆ្នាំឡើង អញ្ចឹងឆន្ទះវាសំខាន់សំរាប់ការរៀបការ។ បើសិនពួកគេ គ្មានឆន្ទះចង់រស់នៅ ជាមួយគ្នា ហើយពួកគេធ្វើតាមការបង្ខំ ពីឳពុកម្ដាយនោះ ការរស់នៅរបស់ពួកគេ ទៅអនាគត ក៏មិនប្រាកដថា អាចនឹងមានក្ដីសុខនោះដែរ។

ថ្វីត្បិតតែឳពុកម្ដាយ ជាអ្នកមានគុណ ដែលបង្កើត និងចិញ្ចឹមបីបាច់កូន តាំងពីតូចក៏ពិតមែន ប៉ុន្តែការរៀបចំអនាគត និងការជ្រើសរើស គូស្រករ គួរតែទុកកាតព្វកិច្ច អោយកូនជាអ្នកសំរេចចិត្ត ជៀសវាងការជួបនូវបញ្ហានៅថ្ងៃក្រោយ៕