SuperAngkor News | Cambodia News | Khmer News | World News | News | Health | Technoloy | Star | Travel

តារាចម្រៀងថ្ពាល់ខួច មាឌតូចច្រឡឹងពូកែរាំនាង ឡោម លក្ខិណា បានចាកចេញទៅបារាំងកាលពីល្ងាចថ្ងៃ ទី២៤ខែមីនាហើយ ដើម្បីចូលរួមសម្តែងនិងច្រៀងជូនបងប្អូនខ្មែរដែលរស់នៅនោះក្នុងឱកាសបុណ្យចូលឆ្នាំថ្មីប្រពៃណី ជាតិខាងមុខផង។

ដោយសារតែទីផ្សារការងារកាក់កប គ្រាន់បើនាង លក្ខិណា រវល់ស្ទើរតែរកពេលសម្រាកគ្មាន ទាំងការថតចម្រៀងMV ថតខ្សែរភាពយន្ត និង បញ្ចូលចម្រៀងឲ្យផលិតកម្មក្រៅស្រុកមួយចំនួន។ ដូច្នេះហើយបានជាតារាចម្រៀង សាច់សខ្ចីរូបនេះ ប្រឹងប្រែង រហូតដល់ថ្ងៃឡើងយន្តហោះហើយ នៅតែបង្ខំថតខ្សែភាពយន្តបញ្ចប់ដើម្បីកុំឲ្យការងារមានការរាំង ស្ទះ។

ជួបជាមួយCEN នាងលក្ខិណា បានឲ្យដឹងថា ដើម្បីឲ្យការងារចាកចេញទៅក្រៅប្រទេស មានភាពរលូនមិនជាប់ពាក់ ព័ន្ធ និងការងារក្នុងស្រុកទេ។ នាង ត្រូវដោះស្រាយការងារក្នុងស្រុកឲ្យបានចប់សព្វគ្រប់សិនមុននឹងចាកចេញ។ ជាក់ ស្តែង ដូចជាយប់មិញនេះ(ថ្ងៃទី២៣ខែមីនា) តារាចម្រៀង ស្ថិតក្នុងក្រុមរៃមាសនាង លក្ខិណា បានប្រឹងប្រែងបង្ហើយការងារ ជាតារាសម្តែង ដែលខ្លួនបានសម្តែងក្នុងខ្សែរឿងមួយ សម្រាប់ដាក់បញ្ចាំងក្នុងស្ថានីយទូរទស្សន៍CTN នាពេលខាងមុខនេះ ឲ្យរួចរាល់ទាំងយប់តែម្តង។

តារាចម្រៀង លក្ខិណា បានចូលប្រឡូកក្នុងវិស័យសិល្បៈតាំងពីឆ្នាំ ២០០៣ មកម្ល៉េះ ដែលចូលជាសមាជិកក្រុមរៃមាស ។ បច្ចុប្បន្នតារារូបនេះ មានទីផ្សារច្រើនគួរឲ្យកត់សម្គាល់ក្នុងចង្កោមអ្នកសិល្បៈដទៃទៀត។ ក្នុងនោះរួមមាន ការសម្ដែងរឿងភាពយន្ត, កម្មវិធីសិល្បៈនៃស្ថានីយទូរទស្សន៍នានា ឬផលិតកម្មទាំងក្នុង និងក្រៅស្រុកនានាជាដើម។

នេះជាលើកទី ២ ហើយ សម្រាប់តារាចម្រៀង លក្ខិណា ដែលបានឆ្លើយតបតាមការអញ្ជើញរបស់សមាគមខ្មែរ នៅប្រទេសបារាំង។ ក្រៅពីរូបនាង ក៏មានតារាចម្រៀងផ្សេងទៀតដែរ រួមមានតារាចម្រៀង លោក ជិន វឌ្ឍនា និង កញ្ញា ស្រីអាំ សែនច័ន្ទ។ លក្ខិណា ធ្លាប់បានទៅសម្តែងនៅក្រៅប្រទេស ដូចជា អូស្ត្រាលី បារាំង និងជប៉ុន៕