SuperAngkor News | Cambodia News | Khmer News | World News | News | Health | Technoloy | Star | Travel

ផលិតកម្មថោន ដែលជាផលិតកម្មកំសាន្តធំមួយក្នុងចំណោមផលិតកម្មធំៗ៣នៅ ក្នុងប្រទេសកម្ពុជាបាននឹងកំពុងត្រៀមផលិតនូវខ្សែភាពយន្តខ្នាតធំដំបូងរបស់ខ្លួនដើម្បីធ្វើការប្រកួតប្រជេងនៅក្នុងទីផ្សារវិស័យភាពយន្តខ្មែរដែលកំពុងតែមានសកម្មភាពកំរើកឡើងវិញ ។

បើទោះជាមិនទាន់បង្ហាញពីគម្រោងច្បាស់លាស់ក្នុងការផលិតនូវខ្សែភាពយន្តខ្នាតធំក្តី ប៉ុន្តែថ្មីៗ នេះមានប្រភពក្រៅ ផ្លូវការមួយបានទម្លាយអោយដឹងថា ផលិតកម្មថោនបានសម្ងំផលិតនូវខ្សែភាពយន្តខ្នាតធំជាលើកដំបូងរបស់ខ្លួនអស់ជាច្រើនខែមកហើយ ទើបធ្វើមានការរយាលក្នុងការផលិតបទចម្រៀង ។

ប្រភពដដែលបានអះអាងថា វណ្ណកម្មទីមួយរបស់ផលិតកម្មថោនដែលបានចំណាយពេលអស់ជាច្រើនខែក្នុងការផលិតនោះ មានចំណងជើងថា “ ចងចាំ ឬ Remember ” ដែលចូលរួមសម្តែងជាតួឯកដោយតារាចម្រៀងជួរមុខរបស់ផលិតកម្មថោនពីររូបគឺលោក ករុណា ពេជ្រ និងនាង សុគន្ធ នីសា ។

បើតាមប្រភពខាងលើបន្ថែមថា តាមគម្រោង ខ្សែភាពយន្តខ្នាតធំរឿង “ ចងចាំ ឬ Remember ” គ្រោងនឹងបញ្ចប់ការថតរបស់ខ្លួនក្នុងអំឡុងចុងខែវិច្ឆិកាខាងមុខនេះ បន្ទាប់ពីចំណាយពេលរាប់ខែ ក្នុងការចុះទៅថតនៅតាមបណ្តាខេត្ត ក៏ដូចជារមណីយដ្ឋានធម្មជាតិសំខាន់ៗមួយចំនួនមានដូចជា ខេត្តកែប ខេត្តមណ្ឌលគីរី ក្នុងនោះមានតំបន់ទឹកជ្រោះពេជ្ជតា និងទីកន្លែងផ្សេងៗទៀតនៅក្នុងប្រទេសកម្ពុជា ។

ចំពោះអត្ថន័យនៃសាច់រឿងទាំងមូលមិនត្រូវបានប្រភពខាងលើធ្វើការអត្ថាធិប្បាយច្រើននោះទេ គ្រាន់ តែបញ្ជាក់ថា រឿង “ ចងចាំ ឬ Remember ” ចង់បង្ហាញពីស្នេហាស្មោះស្មគ្រនៃគូស្នេហ៍មួយគូរតស៊ូក្រោមឥទ្ធិពលរបបអាណា និគមបារាំងលើប្រទេសកម្ពុជា និងបង្ហាញពីស្នេហ៍ចាំជាតិផងដែរ ។ មានការរំពឹងទុកថា តារាចម្រៀងដែលកំពុងរុំព័ទ្ធទៅដោយការរិះគន់លើរឿងចំលងស្ទីលពីបរទេស លោក ករុណា ពេជ្រ និងតារាចម្រៀងស្រីសំដីផ្អែមនាង សុគន្ធ នីសា ប្រាកដជាអាចបង្កើននូវប្រជាប្រិយ៍ភាពរបស់ខ្លួនកាន់តែខ្លាំងបន្ថែមទៀតលើអាជីពថ្មីនេះ ។ ពាក់ព័ន្ធនឹងបញ្ហានេះខាងផលិតកម្មថោនពិតជាបានទទួលស្គាល់ ប៉ុន្តែមិនបានធ្វើការអត្ថាធិប្បាយអោយបានលំអិតនោះទេ ៕