SuperAngkor News | Cambodia News | Khmer News | World News | News | Health | Technoloy | Star | Travel

មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈ បានអះអាងថា នៅឆ្នាំ២០១៤ ខាងមុខនេះ ក្រសួងមានគម្រោងបង្កើតរោងកុនថ្មី ចំនួន ៣ នៅរាជធានីភ្នំពេញ ខណៈដែលស្ថានភាពវិស័យភាពយន្តកម្ពុជា មានលក្ខណៈប្រសើរជាងមុន ហើយអ្នកដែលចូលចិត្តប្រកបអាជីពវិស័យភាពយន្ត បានចាប់អារម្មណ៍ងាកមកគិតគូការផលិតភាពយន្តឡើងវិញ។

លោក ឃឹម សារិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ បានលើកឡើងថា ក្នុងដំណាក់កាលបច្ចុប្បន្ននេះ ភាពយន្តពិតជាមានតួនាទីសំខាន់ណាស់ ក្នុងការរួមចំណែកដល់ការអភិវឌ្ឍន៍សង្គម និងសេដ្ឋកិច្ចជាតិ ព្រោះតែដូច្នេះ ហើយទើបរាជរដ្ឋាភិបាលនិយាយជារួម និងដោយឡែកក្រសួងវប្បធម៌ និងវិចិត្រសិល្បៈ បានយកចិត្តទុកដាក់ស្តារ និងអភិវឌ្ឍន៍វិស័យភាពយន្តឡើងវិញ បន្ទាប់ពីធ្លាក់ចុះមួយរយៈកន្លងមកនេះ។

លោក ឃឹម សារិទ្ធ បន្ថែមថា ផ្តើមពីនោះ ដើម្បីអោយវិស័យភាពយន្តមានចីរភាព និងរីកចំរើននោះ ក្រសួងមានផែន ការបង្កើតរោងភាពយន្តថ្មីៗ ចំនួន ៣ នៅរាជធានីភ្នំពេញ ក្នុងនៅចុងឆ្នាំ២០១៣នេះ នឹងសម្ពោធដាក់អោយប្រើ ប្រាស់នូវរោងភាពយន្តថ្មីទំនើបមួយ នៅតំបន់ទួលគោក ដែលមាន ៣បន្ទប់ និងមានចំណុះសរុប ៦៥០ កៅអី ហើយនៅដំណាច់ឆ្នាំ២០១៤ ក៏នឹងមានរោងភាពយន្តថ្មី ២កន្លែងទៀត នៅតំបន់កោះពេជ្រ នឹងចាប់ផ្តើមដំណើរការ ដែលអាច មានចំណុះកៅអីប្រមាណ ៣០០០ កៅអី។ លោករដ្ឋលេខាធិការ ក៏បានអំពាវនាវផងដែរដល់ផលិតករភាពយន្តទាំង អស់ត្រូវយកចិត្តទុកដាក់ និងពង្រឹងការផលិតភាពយន្តអោយឈានដល់កម្រឹតអន្តរជាតិ ដើម្បីឆ្លើយតបនឹងទីផ្សារភាពយន្តអាស៊ាន សម្រាប់ឆ្នាំ២០១៥ ខាងមុខ។

ទន្ទឹមនោះក្រសួង ក៏ត្រូវខិតខំជំរុញការបណ្តុះបណ្តាលជំនាញវិជ្ជាជីវៈបន្តបន្ទាប់ទៀត ដើម្បីឆ្លើយតបទៅនឹងតម្រូវការនៃការរីកចម្រើននូវបច្ចេកវិទ្យាថ្មី ពិសេសដើម្បីទាក់ទាញក្រុមហ៊ុនបរទេស អោយមកថតខ្សែភាពយន្ត នៅក្នុងប្រទេសយើងកាន់តែច្រើន។ លោករដ្ឋលេខាធិការ ក៏បានបញ្ជាក់ថា យ៉ាងណាក៏ដោយលោករំពឹងថា នាពេលខាងមុខទីផ្សារ ភាពយន្តកម្ពុជានឹងធ្វើដំណើរយ៉ាងសន្សឹមៗ និងដោយរលូន ដើម្បីទៅប្រឡូកក្នុងវិស័យភាពយន្តអន្តរជាតិ៕