SuperAngkor News | Cambodia News | Khmer News | World News | News | Health | Technoloy | Star | Travel

តារាសម្តែងស្រគត់ស្រគំ មានសម្រស់មិនថមថយ សឿ សុធារ៉ា ហាក់មានទីផ្សាសិល្បៈឡើងវិញ នាដំណាច់ចុងឆ្នាំ២០១៣នេះ។ បើទោះបីជា នាងបានប្រកាសវិលចូលអុកឡុកក្នុងពិភពសិល្បៈក្តី តែនាងនៅតែមិនអាចច្បាមនូវប្រជាប្រិយភាព បានច្រើនណាស់ណាទេ ព្រោះបន្ទាប់ពីសម្រាកកាយអស់មួយរយៈពេលមក សន្ទុះនៃតារាស្រករក្រោយបានរីកព្រោងព្រាត ដែលជាដើមចម ឲ្យនាងមិនអាចឆក់បានឱកាសល្អឡើយ។

តែនៅចុងឆ្នាំ២០១៣ នេះ តារាសាច់សខ្ចី ដែលរងនូវពាក្យចចាមអារាម មិនចេះអស់មិនចេះហើយ អំពីរពត៌មានៃការបែកបាក់ស្នេហ៍ ដែលនឹងអាចឈានទៅដល់ផ្លូវបំបែកនោះ ត្រូវបានសាបរលាបបន្តិចម្តងៗ បន្ទាប់ពីតារាចាយរាង សឿ សុធារ៉ា និងតារាចម្រៀង ក្នុងទ្រនំហង្សមាស សាពូន មីដាដា បានទៅគោរពវិញ្ញាណក្ខន្ធព្រះបរមរតនៈកោដ្ឋ កាលពីថ្ងៃទី១៥តុលា កន្លងទៅ និងរូបភាពបែបជាលក្ខណៈគ្រួសារផ្សេងៗទៀត ដែលតារាស្រីរូបនេះ បានបង្ហាញក្នុងបណ្តាញទំនាក់ទំនងសង្គមហ្វេសប៊ុក។

តាមរយៈសង្គមហ្វេសប៊ុកតារាសម្តែង ដែលក្រសោបបានប្រជាប្រិយភាពយ៉ាងក្រាសក្រែល ក្នុងអំឡុងឆ្នាំ២០០៧ សឿ សុធារ៉ា បានបង្ហាញរូបថតប៉ុន្មានសន្លឹក នៃសកម្មភាពថតរឿងថ្មីរបស់នាង ជាធម្មតា តារាស្រីរូបនេះ មិនមានទម្លាប់ផ្តល់សម្ភាសន៍ដល់អ្នកសារព័ត៌មានឡើយ តែតាមសកម្មភាព ដែលនាងបានបង្ហាញនោះ គឺជាសកម្មភាពថតខ្សែភាពយន្តភាគឲ្យស្ថានីយទូរទស្សន៍បាយ័ន ដែលរួមសម្តែងជាមួយតារាចម្រៀង យ៉ែម សំអូន។

ជាប្រធានក្រុមហ៊ុន ដែលត្រូវបុគ្គលិកខ្លួនឯងតាមស្រលាញ់ សឿ សុធារ៉ា ដែលជាតារាសម្តែងដែលមានភាពប៉ិន ប្រសព្វក្នុងការសម្តែង ត្រូវបានម្តាយឪពុករារាំងមិនឲ្យបានជួបគូស្នេហ៍ ដែលជាកូនចៅខ្លួនឯង នេះជាការឲ្យដឹងពីសាច់រឿងត្រួសៗ ពីតារាចម្រៀង ដែលឈោងចាប់បានអាជីពជាតារាសម្តែងលោក យ៉ែម សំអូន ដែលបានឲ្យស៊ីអ៊ីអិនដឹងតាមទូរស័ព្ទ កាលពីពេលថ្មីៗនេះ៕