SuperAngkor News | Cambodia News | Khmer News | World News | News | Health | Technoloy | Star | Travel

ពាក្យចាស់ពោលថា “ធ្វើស្រែទាន់ក្តៅដី” រីឯតារាសម្តែង កញ្ញា មាស សម្ផស្ស ដោយមិនទាន់នឹងរលត់ភ្លើងស្នេហ៍បាត់ហុយផ្សែងផង នាងផ្លាស់ប្តូរស្នេហ៍ដូចប្តូរសម្លៀកបំពាក់ ទទួលយកប្រុសស្នេហ៍ថ្មី ដើម្បីបង្ក្រាបការឈឺចាប់នាពេលកន្លងមក។

យើងឃើញនៅក្នុងកម្មវិធីខួបកំណើតតារាសម្តែង និងពិធីករ បញ្ញា សិទ្ធ កាលពីសប្តាហ៍មុន តារាសម្តែង មាស សម្ផស្ស បានបណ្តើរប្រុសស្នេហ៍ថ្មី ដោយបើកចំហរបង្អូតមិត្តភ័ក្កិ និងអ្នកសារព័ត៌មាន ប៉ុន្តែគូស្នេហ៍ថ្មីនោះ មិនឲ្យអ្នកថតរូបនោះទេ។ គូស្នេហ៍ថ្មី របស់នាងខ្ពស់ មានវ័យប្រមាណ ៣០ឆ្នាំ និងសង្ហាមិនចាញ់តារាសម្តែងប៉ុន្មានឡើយ។

នាងមិនទាន់បញ្ជាក់លម្អិតអំពីអត្តសញ្ញាណគូស្នេហ៍ថ្មីនៅឡើយ ប៉ុន្តែនាងទទួលស្គាល់ថា គឺពិតជាប្រុសស្នេហ៍ថ្មីរបស់នាងមែន ហើយទើបនឹងចាប់ផ្តើមទំនាក់ទំនងគ្នា កាលពីពេលថ្មីៗនេះប៉ុណ្ណោះ ពោលគឺក្រោយពេលនាងចែកផ្លូវគ្នាដើរជាមួយលោក គីម។

មានសិល្បការិនីតិចណាស់ ដែលបានជួបនឹងស្នេហ៍ខកបំណងម្តងហើយ ព្យាយាមប្រកាស និងបើកបេះដូង ទទួល យកស្នេហ៍ថ្មីនោះ។ កន្លងមក ទំនាក់ទំនងស្នេហារវាងតារាសម្តែង មាស សម្ផស្ស និងគូស្នេហ៍ជាច្រើនបន្តកន្ទុយគ្នា ត្រូវបានគេលាតត្រដាង ហើយចំណងស្នេហ៍ទាំងនោះ មិនមានអាយុកាលយូអង្វែងឡើយ។

នាងធ្លាប់ធ្លាយចំណងស្នេហ៍ជាច្រើន ដែលមានទាំងបុរសក្នុងស្រុក និងបុរស នៅឯនាយសមុទ្រ ហើយនាង ក៏ខកចិត្តមិនតិចដងដែរ ព្រោះនាងស្នេហ៍ប៉ះចំបុរស ដែលជាប្តីគេ និងបុរសដែលឪពុកម្តាយនាងមិនពេញចិត្ត។

ចំណងស្នេហ៍ចុងក្រោយ ជាមួយបុរសឈ្មោះ គីម ជាអ្នកជំនួញជនជាតិកូរ៉េ ត្រូវបាននាង និងមិត្តភក្តិ យល់ថា អាចជាស្នេហាពិតប្រាកដនោះ នៅតែមិនអាចគង់វង្សបាន គឺឈានដល់តំណាក់កាលចែកផ្លូវគ្នាដើរក្រោយរួមរស់ក្នុងផ្ទះតែមួយនៅកាំកូស៊ីធីក្រោម ហេតុផលថា បុរសម្នាក់នេះ រករឿង និងប្រចណ្ឌនាងបែកផ្សែង។

ការឈឺចាប់នឹងរឿងស្នេហ៍ មិនសមបំណងម្តងហើយម្តងទៀតនេះ មិនបានធ្វើឲ្យតារាស្រីសម្បូរមន្តស្នេហ៍ មាស សម្ផស្ស រៀងចាលនឹងស្នេហាដូចបណ្តាសិល្បការិនី ជាច្រើនទេ។ ដោយសារនាងយល់ថា បន្លាមុតត្រូវយកបន្លាជួស ហើយរូបសម្រស់ ស្រស់ស្អាតដូចនាងដែរ គេមិនជឿថាអាចស្វែងរកបុរសស្មោះស្នេហ៍ មិនបាននោះទេ។

កន្លងមកតារាស្រីរូបនេះ ធ្លាប់និយាយថា នាងមិនរត់ទៅបួស ហើយក៏មិនសម្លាប់ខ្លួន ព្រោះតែប្រុសអស់ចិត្តនោះដែរ ផ្ទុយទៅវិញគឺនាងនឹងនៅតែរឹងប៉ឹង ហើយបើកទូលាយទទួលយកស្នេហាថ្មី។ ប្រសិនបើប្រុសនោះ មានលក្ខណៈសម្បត្តិអាចឲ្យនាងទទួលយកបាន។

ឆ្លងកាត់បទពិសោធន៍ស្នេហ៍ច្រើនលើកច្រើនសារនេះ អាចនឹងធ្វើឲ្យនាង កាន់តែប្រុងប្រយ័ត្នក្នុងការជ្រើសរើសបុរសក្រោយទៀត។ ប៉ុន្តែគេមិនទាន់ដឹងទេថា តើរងើកភ្លើង ស្នេហាថ្មីរបស់នាងមួយនេះអាចឆាបឆេះបានយូរប៉ុណ្ណានោះទេ ហើយគេក៏នៅរង់ចាំនាងបង្ហាញអត្តសញ្ញាណប្រុសស្នេហ៍ថ្មីមួយនេះដែរ។ គេនៅតែរំពឹងដែរថា ថ្ងៃណាមួយនាង អាចនឹងរកបានបុរសម្នាក់ ដែលអាចធ្វើជាស្មាសម្រាលការលំបាក និងជូតទឹកភ្នែក ពេលនាងជួបវិបត្តិ៕