SuperAngkor News | Cambodia News | Khmer News | World News | News | Health | Technoloy | Star | Travel

តារាសម្តែងចំណូលថ្មីវ័យក្មេងសាច់ខ្ចី កញ្ញានៅ ម៉ារីសា បន្ទាប់ពីប្រឡង ជាប់ស្រីស្អាតប្រុសស្អាត ក្នុង ចំណោម ១០ នាក់ របស់ផលិតកម្មមហាហង្ស សព្វថ្ងៃ ដូចជា មានប្រជាប្រិយគ្រាន់បើ។ ថ្មីៗនេះ នាងបានប្រាប់ថា នាងមិនទាន់ចង់គិតចង់ប្រឡូករឿងស្នេហាទេ គឺចង់យកពេលទំនេរពីការសិក្សាទៅចាប់អាជីពសិល្បៈ និងខំប្រឹងកសាងកេរ្តិ៍ឈ្មោះ ឲ្យល្បី មានអ្នកគាំទ្រច្រើនជាមុនសិន។

ស្ថិតនៅក្នុងវ័យ ១៩ឆ្នាំ កញ្ញា នៅ ម៉ារីសា បានប្រឡូកវិស័យសិល្បៈ បានរយៈពេលប្រមាណមួយឆ្នាំ ដែលក្លាយជាតារាសម្តែងវ័យក្មេង ដើរតួរង ដែលមានចរិតកាចឆ្នាស់ឆ្នើមក្នុងរឿង “រលកបោកខ្សាច់”។ មុននេះ នាងទើបតែបញ្ចប់ការប្រឡងថ្នាក់វិទ្យាល័យ ហើយក៏កំពុងមានបំណងចង់បន្តទៅថ្នាក់មហាវិទ្យាល័យទៀត។

នាងធ្លាប់បានប្រកាសផ្អាកពីការងារសិល្បៈ ចង់ទុកពេលវេលាសម្រាប់ការសិក្សា។ តែពេលនេះនាងមានពេលទំនេរអាចទទួលការងារបាន ព្រោះថាក្រៅពីថតរឿងថ្មី “ម៉ឺនុយធ្នាក់អន្ទាក់ស្នេហ៍” ឲ្យផលិតកម្ម មហាហង្ស នាងមានពេលទំនេរច្រើន។

កញ្ញា នៅ ម៉ារីសា បានប្រាប់ឲ្យដឹងថា បច្ចុប្បន្នក្រៅពីការងារសិល្បៈ និងកំពុងសិក្សា នាងមិនទាន់ចង់គិតពីរឿងអ្វីផ្សេងទេ ជាពិសេសរឿងស្នេហា ព្រោះនាងមានវ័យក្មេងពេក ខ្លាចដើរលើផ្លូវស្នេហានេះខុស ប៉ះចំស្នេហាត្រីកោណ ស្នេហាប្តីគេជាដើម ប្រាកដជាបាត់បង់អនាគត។ ណាមួយនាងទើបតែចូលប្រឡូកមិនចង់យកខ្លួនទៅពាក់ព័ន្ធក្នុងរឿងស្នេហានោះទេ ។ នៅក្នុងវិថីសិល្បៈវាងាយនឹងពើបប្រទះព័ត៌មាន មិនល្អ និងរឿងរ៉ាវស្នេហាខ្លាំងណាស់។

ភាពស្រស់បំព្រងតារារះថ្មី ម៉ារីសា បន្តថា ទោះយ៉ាងណា នាងមិនទាន់ចង់គិតចង់ប្រឡូករឿងស្នេហាទេ គឺចង់យកពេលទំនេរពីការសិក្សាទៅចាប់អាជីពសិល្បៈ និងខំប្រឹងកសាងកេរ្តិ៍ឈ្មោះឲ្យល្បីមានភាពលេចធ្លោបន្ថែមទៀតសិន។

នាងបន្ថែមថា មិនចង់ឲ្យជួបប្រទះនោះ គឺរឿងស្នេហាត្រីកោណ ព្រោះស្នេហាទាំងនេះ សុទ្ធតែអនាគតស្វាមី មានទ្រព្យសម្បត្តិតាមផ្លូវកាត់ដែលប៉ះចំប្តីគេ ឬក៏មានឈ្មោះថាប្រពន្ធចុងនោះ។ ស្នេហាបែបនេះ អនាគតគ្មានអ្នកណាម្នាក់មើលដឹងទេ ថាទៅថ្ងៃក្រោយបែបណា។

គួររំលឹកថា មុននឹងចូលក្នុងការងារសិល្បៈ កញ្ញា ម៉ារីសា បានដាក់ពាក្យប្រឡងនៅផលិតកម្មមហាហង្ស នៅពេលនោះ បានដឹងតាមរយៈការផ្សព្វផ្សាយ ហើយក៏បានដាក់ស៊ីវីទៅប្រឡងនឹងគេ។ ការប្រឡងនេះ មិនមានចំណាត់លេខ១ទេ ដោយខាងផលិតកម្ម រើសយកវគ្គទី១ តារាស្រី ៥នាក់ តារាប្រុស ៥នាក់ និងវគ្គទី២ តារាស្រី ១០ តារាប្រុស ១០នាក់ ហើយកញ្ញាបានជាប់នៅក្នុងវគ្គទី២។

ស្រីស្រស់សាច់ស កញ្ញា នៅ ម៉ារីសា ជាកូនច្បងក្នុងគ្រួសារ ហើយ មានបងប្អូន៤នាក់ ស្រីបីនាក់ ប្រុសម្នាក់។ ឱពុកម្តាយរបស់កញ្ញាមិនមានជាប់ឈាមជ័រ ជាអ្នកសិល្បៈអីនោះទេ ប៉ុន្តែដោយសារស្រឡាញ់ចូលចិត្តលើការសម្តែង កញ្ញាក៏ចូលប្រឡូកតែម្តងទៅ៕