SuperAngkor News | Cambodia News | Khmer News | World News | News | Health | Technoloy | Star | Travel

តារាសម្តែងក្មេងខ្ចី កញ្ញា ចរិយា ពេជ្រ ជាអតីតកញ្ញាឯកប្រ៊ីដស្តុនលេខ២ ឆ្នាំ២០១២ នៅក្នុងជំនួបកាលពីថ្ងៃទី១៧ខែកញ្ញាឆ្នាំ២០១៣ ដោយបានអះអាងថា ទាល់តែចូលវ័យ ២៥ឆ្នាំ ទើបមានការគិតគូររឿងប្តីសី ហើយបុរសដែលនាងចង់បាន គឺត្រូវមានអាយុ ៣០ឆ្នាំឡើង ។

តារាដ៏ស្រស់ស្អាតបែបសិចស៊ី កញ្ញា ចរិយា ពេជ្រ មុននេះបន្តិច មានទស្សនាវដ្ដី ក្នុងស្រុកមួយ ដែលបានចុះផ្សាយថា នាងមានឧកញ៉ាឧបត្ថម្ភប្រាក់ឲ្យនាងកែដើមទ្រូង និងធ្វើខួបកំណើតឲ្យ តែអ្វីៗត្រូវបាននាងបដិសេធចោលទាំងអស់ ព្រោះការលើកឡើងនេះជារឿងមិនពិត ។

ស្រីស្រស់ ចរិយា ពេជ្រ បានបង្ហើបប្រាប់ថា “ពេលនេះមិនខ្វះទេ អ្នកតាមស្រឡាញ់ តែខ្ញុំមិនបានគិតគូរទេ ទាល់តែខ្ញុំមានវ័យ២៥ឆ្នាំទើបសម្រេចចិត្តជ្រើសរើសយកគូស្រករ ទៅពេលអនាគត ។ បុរសដែលខ្ញុំពេញចិត្តត្រូវមានចរិកល្អ ចេះស្រឡាញ់ក្រុមគ្រួសារ ចេះអធ្យាស្រ័យ អត់មានជាប់ពាក់ព័ន្ធស្រីផ្សេង ជាពិសេសត្រូវអាយុចាប់ ៣០ឆ្នាំឡើង។

ចំពោះការសម្រេចចិត្តដូច្នេះ ត្រូវបានស្រីស្អាតរូបនេះបន្តថា ការសម្រេចចិត្តឋិតលើខ្លួនឯង ព្រោះបើដល់វ័យ ២៥ នឹងវាអាចគិតបានវែងឆ្ងាយជាង ហើយឪពុកម្តាយ ក៏មានចំណែកក្នុងនោះដែរ។ រឿងនេះ ក៏គ្មានអ្នកណាមកបង្ខំយើងបានដែរ ព្រោះជាសុភមង្គលរបស់យើងអស់មួយជីវិត។ តារាសម្តែងដែលចូលប្រឡូកសិល្បៈបានមួយឆ្នាំ បច្ចុប្បន្នកំពុងតែត្រូវបានអ្នកម្ចាស់ផលិតកម្មក្នុងស្រុកមួយទាក់ទងនាងឲ្យថតរឿងថ្មី និងស្ប៉តមួយចំនួន ។ មួយរយៈនេះដែរ មានការមមាញឹកនឹងការងារសិល្បៈទាំងការថត និងសម្តែង ។

សូមរំលឹកថា កញ្ញា ចរិយា ពេជ្រ ជាអតីតកញ្ញាឯកប្រ៊ីតស្ដុនលេខ២ឆ្នាំ២០១២ ។ តារាស្រីដែលមានដើមកំណើតពីខេត្តកណ្ដាលម្នាក់នេះ មានបងប្អូន៦នាក់ ប្រុស៣ ស្រី៣ ដោយមានតែនាងម្នាក់ដែលចូលសិល្បៈ ។ តាំងចូលមកធ្លាប់ថតខ្សែភាពយន្តបានចំនួន៤ រឿងមកហើយ ។ ថ្មីៗនេះដែរនាងទើបតែទទួលបានឱកាសថតជាតួឯករឿងខ្លីក្នុងកម្មវិធី “ជំនុំតារា” និងកម្មវិធី “ផ្ទះលោកតា” របស់ CTN និង My TV ៕