SuperAngkor News | Cambodia News | Khmer News | World News | News | Health | Technoloy | Star | Travel

រហូតមកដល់ពេលនេះ ភាពរកាំរកូសស្នេហ៍ រវាងតារាសម្តែងវ័យក្មេង នាងភិន សុដាលីស និងគូដណ្តឹងលោកប៉ែន តុលា ហាក់នៅមិនទាន់មានពន្លឺ អាចដោះស្រាយបាននៅឡើយទេ ។ សំឡេងឃ្មោះការទំនងជា មិនអាចបន្លឺឡើងតាមកាលកំណត់ឡើយ ខណៈតារាសម្តែងដែលតែងតែ ទទួលតំណែងជាតួឯកជាបន្តបន្ទាប់ នាងភិន សុដាលីស ហាក់រារែកចិត្តនៅក្នុងការ ដោះស្រាយជាមួយគូដណ្តឹង ដោយហេតុផលនាងនៅក្មេង និងជាប់សិក្សា ។

ថ្លែងប្រាប់កោះសន្តិភាពមុនពេលឡើងយន្តហោះចេញទៅថតឈុតមួយចំនួនក្នុងរឿង ម៉ឺនុយធ្នាក់អន្ទាក់ស្នេហ៍ នៅប្រទេសថៃកាលពីពេល ថ្មីៗនេះ ភិន សុដាលីស អះអាងថា នាងហាក់មានសង្ឃឹមតិចតួចក្នុងការដោះស្រាយទំនាស់ជាមួយគូដណ្តឹងដោយសារតែនាងមិនចង់ផ្សះផ្សាឡើងវិញឡើយ ព្រោះតែពន្លកស្នេហ៍ចាប់ផ្តើមដំបូងភ្លាមក៏មានការរកាំរកូសទៅហើយនោះ ។ ដាលីសបញ្ជាក់ថា «គ្រាន់តែរស់នៅជាមួយគ្នារយៈពេលខ្លីសោះមានបញ្ហាទៅហើយ ចុះទម្រាំរស់នៅជាមួយគ្នារហូតទៀត ហេតុនេះខ្ញុំមិនចង់រៀបការឆាប់ឡើយ ម៉្យាងយើងទាំងពីរនាក់សុទ្ធតែរវល់ការងារ រៀងៗខ្លួន ហើយខ្ញុំក៏ជាប់រៀនដែរ» ។

ទោះជាយ៉ាងណាក្តី ភិន សុដាលីស នៅតែអះអាងថា ចំណងស្នេហ៍របស់នាងនៅមិនទាន់កាត់ផ្តាច់ទាំងស្រុងទេ ប៉ុន្តែនាងថាមានភាគរយតិចបំផុតនៅក្នុងការផ្សារភ្ជាប់ការប្រេះស្រាំស្នេហ៍រវាងនាង និងគូដណ្តឹង ។ តារាវ័យក្មេងរូបនេះនិយាយថា «គាត់នៅតែព្យាយាមទាក់ទងមកខ្ញុំដែរ តែខ្ញុំអត់ចង់ទទួលយកឡើយ ដោយសារតែខ្ញុំ និងគាត់ហាក់មិនសូវចុះសម្រុងគ្នា ហើយ ចាស់ៗក៏គាត់មិនលូកលាន់ដែរ ដោយ អ្វីៗអាស្រ័យលើ ក្មេងៗ ។

ខាងគូដណ្តឹងរបស់នាងខ្ញុំមិនចង់កាត់ផ្តាច់ឡើយ ហើយព្យាយាមទាក់ទងឱ្យ ចាស់ៗជួយដោះស្រាយទៅលើបញ្ហានេះ ប៉ុន្តែនាងខ្ញុំមិនចង់ខ្វល់ខ្វាយពីរឿងនេះឡើយ ដោយសារតែនាងខ្ញុំនៅក្មេង និងកំពុងតែបន្តការសិក្សា» ។ នាងភិន សុដាលីស បានទទួលស្គាល់ពីការរិះគន់ពីមហាជនចំពោះបញ្ហានេះ ប៉ុន្តែនាងមិនចាប់អារម្មណ៍ឡើយ ដោយសារតែយល់ថា «រឿងនេះអាស្រ័យលើខ្លួនយើង ប្រសិនបើយើងបន្តរស់នៅជាមួយគ្នាខ្លាចការរិះគន់ តែការរស់នៅមិនចុះសម្រុងគ្នា តើយើងរស់នៅបានប្រយោជន៍អ្វី» ។

ក្នុងវ័យ១៨ឆ្នាំ ភិន សុដាលីស ហាក់បង្ហាញជំហររឹងមាំមិនមានការខូចចិត្តអ្វីឡើយ ប្រសិនបើក្នុងករណីស្នេហារបស់នាងពិតជាត្រូវកាត់ផ្តាច់មែននោះ ដោយហេតុផលថា រវាងនាង និងគូដណ្តឹងមិនមានប្រវត្តិស្នេហាជាមួយគ្នាច្រើនឡើយ ពោលគឺស្គាល់គ្នាតាមរយៈចាស់ទុំណែនាំប៉ុណ្ណោះ ។

ភិន សុដាលីស បានភ្ជាប់ពាក្យជាមួយតារាសម្តែងដូចគ្នា លោកប៉ែន តុលា កាលពីថ្ងៃទី៣១ មីនា ឆ្នាំ២០១៣ ។ អ្នកទាំងពីរគ្រោងនឹងចូលរោងការនៅដំណាច់ឆ្នាំនេះ ប៉ុន្តែបានពន្យារពេលវិញ បន្ទាប់ពីភាពរកាំរកូសរវាងអ្នកទាំងពីរកើតចេញពីការមិនយល់ចិត្តគ្នា។ លោកហុិន សុភិន ជាឪពុកបង្កើតរបស់នាងភិន សុដាលីស ធ្លាប់អះអាងថា ពិធីមង្គលការកូនស្រីរបស់លោកអាចកើតមាន ឬមិនអាចនោះអាស្រ័យលើកូន ។ ក្នុងនាមលោកជាឪពុក គឺត្រៀមខ្លួនធ្វើ អ្វីៗដើម្បីតម្រូវចិត្តកូន ដោយលោកមិនអាចប្រឆាំងការសម្រេចចិត្តណាមួយរបស់កូនលើបញ្ហាគូស្រករឡើយ ៕