SuperAngkor News | Cambodia News | Khmer News | World News | News | Health | Technoloy | Star | Travel

ពិធីការិនីក្នុងកម្មវិធីរាត្រីកម្សាន្តរបស់ស៊ីធីអិន នាងគង់ វង្សយ៉ាទី ដែលជាប់ឈ្មោះជាតារាសម្តែងបែបឆ្នាសឆ្នើម ថ្មីៗនេះមានការទម្លាយព័ត៌មានថា នាងត្រូវគេជ្រើសរើសជាតួឯកក្នុងរឿងភាគមួយឱ្យស៊ីធីអិន។ ដំណឹងរីករាយនេះ យ៉ាទី ឯកភាពទទួលយក តែពេលនាងស៊ើបដឹងថា មានការចូលរួមសម្តែងដោយលោកចា រិទ្ធី ដែរនោះ នាងក៏សុំដកខ្លួនវិញ ដោយសារតែធ្លាប់ជួបប្រទះព័ត៌មានចចាមអារ៉ាមថាពាក់ព័ន្ធស្នេហាក្រៅឆាកជាមួយគ្នាធ្វើឱ្យកក្រើកពិភពសិល្បៈទម្រាំតែនាងរលាស់ខ្លួនរួច ។

ខ្សែភាពយន្តភាគថ្មីមួយដែលមានចំណងជើងថា «ព្រហ្មលិខិត» ដែលកំពុងតែសម្រុកថត ដើម្បីដាក់បញ្ចាំងនាពេលខាងមុខនោះរួមសម្តែងដោយតារាថ្មីចាស់ជាច្រើនដួងដូចជាលោកសាយ សៀរ៉ា លោកចា រិទ្ធី លោកស៊ឹម សោភ័ណ កញ្ញាតូតា កញ្ញាអាង សូនីតា ជាដើម ។ តាមការឱ្យដឹងតួឯកស្រីដំបូងត្រូវអ្នកដឹកនាំរឿងជ្រើសរើសនាងគង់ វង្សយ៉ាទី ប៉ុន្តែដោយសារតែនាងដឹងថា មានវត្តមានលោកចា រិទ្ធី ជាតួអង្គសំខាន់ត្រូវគេទាក់ទងឱ្យសម្តែងដែរនោះ នាងក៏ប្រញាប់ដកថយវិញយ៉ាងលឿន ព្រោះខ្លាចមានពាក្យចចាមអារ៉ាមធ្ងន់ណាមួយ ប៉ះពាល់អារម្មណ៍នាង និងក្រុមគ្រួសារខាងលោកចា រិទ្ធី។

ការដកចិត្តមិនទទួលថតនេះដោយសារតែកន្លងមកនៅពេលស្រីស្រស់មានកែវភ្នែកស្រទន់គួរឱ្យទាក់ចិត្តនាង យ៉ាទី ចូលពិភពសិល្បៈភ្លាម បានជំពប់ព័ត៌មានចចាមអារ៉ាមអាស្រូវធ្ងន់ជុំវិញចំណងស្នេហ៍ក្រៅឆាកជាមួយលោកចា រិទ្ធី ក្រោយពីបានរួមសម្តែងជាមួយគ្នានៅទូរទស្សន៍ប៉ុស្តិ៍លេខ៥ក្នុងរឿង«នាងឈូកស» រហូតល្បីលេចឮថា នាងមានកូន១ទៀតផង ។ ម៉្លោះហើយ យ៉ាទី បង្ខំចិត្តងាកចេញពីការសម្តែងក្នុងរឿងភាគនោះទាំងអារម្មណ៍សោកស្តាយ ដោយអ្នកដឹកនាំរឿងប្តូរដាក់កញ្ញាម៉ាក សែនសូនីតា វិញ ។

ក្នុងជំនួបនៅស៊ីធីអិន កាលពីពេល ថ្មីៗនេះ យ៉ាទី លើកឡើងថា នាងបានចរចាជាមួយអ្នកដឹកនាំរឿងនៅស៊ីធីអិន កាលពីមួយរយៈមុនមែន ដើម្បីសហការគ្នាថតរឿងភាគថ្មីក្រោមចំណងជើងថា «ព្រហ្មលិខិត» តែដល់ពេលសួរនាំដឹងថា មានតួណាខ្លះលេង គេថាមានតួចាស់ តួថ្មី ហើយស្រាប់តែមានលោកចា រិទ្ធី ដែរ ទើបនាងប្រកែកសុំដកខ្លួនវិញ ដោយសារតែខ្លាចមានពាក្យគេនិយាយពីនាងបែបនេះបែបនោះពេលចេញផ្សាយនាំឱ្យនាងពិបាកទទួលយក ។ យ៉ាទីបានលើកមូលហេតុបញ្ជាក់ទៀតថា នាងពិតជាខ្លាចរអារឿងរ៉ាវដែលមានការពាក់ព័ន្ធជាមួយលោកចា រិទ្ធី ម្តងទៀតណាស់ ព្រោះកាលពីលើកមុនផ្ទុះព័ត៌មានស្នេហាត្រីកោណយ៉ាងកងរំពងពេញពិភពសិល្បៈ ដែលសូម្បីតែខ្លួននាងផ្ទាល់មិនបានចូលទៅលូកលាន់សោះឡើយ ។

លើសពីនេះគេថានាងថែមទាំងបង្កើតកូនលួចលាក់ទៀតពេលបាត់មុខមួយរយៈ ។ អ៊ីចឹងហើយនាងមានអារម្មណ៍សោកស្តាយជាខ្លាំងដែលបាត់បង់ឱកាសថតរឿងភាគថ្មីនៅស៊ីធីអិន ដែលជាទូរទស្សន៍ធំមួយមានអ្នកគាំទ្រច្រើន ដើម្បីគេចឱ្យផុតពីបញ្ហាដែលនាងមិនចង់ជួប ពិសេសពាក្យចចាមអារ៉ាមមិនល្អ ។

គង់ វង្សយ៉ាទី រំពឹងថា នាងនឹងក្តាប់ឱកាសលើកក្រោយទៀត សម្រាប់ការថតរឿងនៅទូរទស្សន៍ដែលនាងធ្វើការនោះ ។ នាងនិយាយថា មិនអីទេនាងនៅតែជឿថា ថ្ងៃក្រោយពិតជាមានរឿងថ្មីណាមួយដែលមានមុខនាងសម្តែង ទោះជាពេលនេះធ្លាក់ទៅលើដៃគេក៏នាងមិនអន់ចិត្តដែរព្រោះឆ្លងផុតពីរឿងរ៉ាវឈឺក្បាលដែលនាងរលាស់ខ្លួនផុតយ៉ាងលំបាកបំផុតនោះ ៕