SuperAngkor News | Cambodia News | Khmer News | World News | News | Health | Technoloy | Star | Travel

ខណៈពេលផលិតកម្មសាន់ដេកំពុងមមាញឹក ទាំងការរៀបចំបទចម្រៀង ឱ្យតារាចម្រៀងថ្មី និងរវល់ថតរឿង «ព្រាយក្បាលប្រាំបី» នោះ នាង ផាន់ ម៉ូនីកា តារាចម្រៀងប្រចាំផលិតកម្មនេះ ដែលធ្លាប់ទទួលបាន ភាពល្បីល្បាញគួរសម ពីមុននោះបែរជាបាត់មុខឈឹង ។ មិនមានបទចម្រៀងថ្មីៗ របស់ផាន់ ម៉ូនីកា ទេ ជាងនេះទៅទៀត នៅក្នុងថ្ងៃធ្វើពិធីក្រុងពលីថតរឿង «ព្រាយក្បាលប្រាំបី» ក៏មិនឃើញវត្តមានរបស់នាងចូលរួមដែរ ធ្វើឱ្យគេសង្ស័យថា នាងប្រហែលជារួមរស់ជាមួយស្វាមី លែងខ្វល់ពីសិល្បៈទៀតហើយ ។

យោងតាមប្រភពព័ត៌មានមួយឱ្យដឹងកាលពីពេល ថ្មីៗនេះថា ផាន់ ម៉ូនីកា មិនបានលាឈប់ពីសិល្បៈទេ ហើយមូលហេតុដែលបាត់មុខរបស់នាងមួយរយៈនេះ គឺដោយសារតែនាងសម្ងំពពោះនៅផ្ទះ មិនចង់ឱ្យអ្នកណាបានដឹងថា នាងមានផ្ទៃពោះឡើយ ព្រោះខ្លាចប៉ះពាល់ដល់ការងារសិល្បៈរបស់នាង ។ ទាក់ទិនទៅនឹងបញ្ហានេះ ផាន់ ម៉ូនីកា ប្រាប់កោះសន្តិភាពឱ្យដឹងតាមទូរស័ព្ទកាលពីថ្ងៃទី២៥ កក្កដា ២០១៣ថា នាងមិនបានលាឈប់ពីសិល្បៈទេ ជាក់ស្តែងពេលនេះក្រុមហ៊ុនបានហៅនាងឱ្យទៅច្រៀងបទ ថ្មីៗដែរ តែនាងមិនទាន់បានទៅដោយសារតែរវល់រកស៊ីពេក ។ ពេលនេះនាងកំពុងតែរកឱកាសទៅច្រៀងវិញ ព្រោះតែនាងនៅតែស្រឡាញ់សិល្បៈ គឺនាងមិនបោះបង់ចោលទេ ។

ម៉ូនីកាបញ្ជាក់ថា មូលហេតុដែលនាងមិនបានចូលរួមពិធីក្រុងពលីថតរឿងរបស់ផលិតកម្មសាន់ដេ គឺដោយសារតែនាងមិនបានចូលរួមសម្តែងក្នុងរឿងនោះឡើយ ។ មូលហេតុដែលនាងមិនសម្តែងក្នុងរឿង «ព្រាយក្បាលប្រាំបី» គឺដោយសារតែអ្នកដឹកនាំតម្រូវឱ្យនាងសម្តែងជាតួខ្មោច ដូច្នេះនាងមិនចង់សម្តែងទេ ព្រោះតែកន្លងមកនាងធ្លាប់សម្តែងរឿងខ្មោចរួចទៅហើយ ។ ការសម្តែងជាតួអង្គខ្មោច គឺលំបាកខ្លាំងណាស់ ម៉្យាងត្រូវតុបតែងខ្លួនអាក្រក់មើល ហើយទីតាំងដែលសម្តែងជាកន្លែងគួរឱ្យភ័យខ្លាច និងងងឹតថែមទៀត ។ ជួនកាលនាងថតមួយយប់ទល់ភ្លឺ ដូច្នេះសម្រាប់រឿងថ្មីនេះ នាងមិនសម្តែងទេ ព្រោះតែនាងមានការភ័យខ្លាច ។

ចំណែករឿងមានផ្ទៃពោះ ផាន់ ម៉ូនីកា បញ្ជាក់ថា មិនពិតដូចពាក្យចចាមអារ៉ាមទេ នាងនិងស្វាមីមិនទាន់គិតគូរនៅឡើយ ប្រហែលជាយូរទៀតទើបគិតអំពីបញ្ហានេះ ។ ពេលនេះនាងទុកពេលយកចិត្តទុកដាក់លើមុខរបររបស់នាងឱ្យរីកចម្រើន ។ មានការលេចឮថា ផាន់ ម៉ូនីកា និងស្វាមីមានគម្រោងបើកពង្រីកសាខាស៊ុបគីស៊ុបបន្ថែមទៀត តែនាងបញ្ជាក់ថា គ្រាន់តែជាការគិតប៉ុណ្ណោះ មិនទាន់ច្បាស់លាស់នៅឡើយទេ ៕