SuperAngkor News | Cambodia News | Khmer News | World News | News | Health | Technoloy | Star | Travel

តារាចម្រៀងចំណូលថ្មី របស់ផលិតកម្មសាន់ដេ គឺលោកអ៊ីណូ កំពុងតែទទួលបាន ការគាំទ្រច្រើនគួរសម ពីយុវវ័យតាមរយៈបទ «ពុទ្ធព្រះអើយ» និងបទ «បេះដូងស្នេហ៍ផ្ទុះ Boom Boom» ។ លោកអ៊ីណូ មិនត្រឹមតែជាតារាចម្រៀងទេ ក៏ជាអ្នកនិពន្ធបទចម្រៀង របស់ផលិតកម្មសាន់ដេផងដែរ ។ ពេលនេះលោកត្រូវសមាគម នៃប្រទេសកូរ៉េអញ្ជើញរួមជាមួយកញ្ញាយូរី និងលោកអាន គុណកូឡា ទៅច្រៀងនៅប្រទេសកូរ៉េ ។

លោកអ៊ីណូ ប្រាប់កោះសន្តិភាពកាលពីពេលថ្មីៗនេះថា លោកសប្បាយចិត្តណាស់ដែលបានចេញទៅច្រៀងនៅប្រទេសកូរ៉េ បន្ទាប់ពីមុននេះលោកបានចេញទៅច្រៀងនៅប្រទេសថៃ ។ ការធ្វើដំណើរចេញទៅច្រៀងនៅប្រទេសកូរ៉េគឺនៅថ្ងៃទី២ សីហា ឆ្នាំ២០១៣ ។ លោកទៅច្រៀងនៅទីនោះរយៈពេល៤ថ្ងៃ ព្រោះប្រញាប់មកវិញចូលរួមសម្តែងភាពយន្តឱ្យផលិតកម្មសាន់ដេ រឿង «ព្រាយក្បាលប្រាំបី» ដោយអ្នកដឹកនាំរឿងតម្រូវឱ្យដើរតួជាបងធំប្រចាំភូមិ ផ្ទុយពីចរិតពិតរបស់លោក ។

លោកអ៊ីណូ និងមិត្តរួមការងារសិល្បៈ២នាក់ទៀត គឺកញ្ញាយូរី និងលោកអាន គុណកូឡា សង្ឃឹមថា នៅពេលទៅច្រៀងនៅប្រទេសកូរ៉េ នឹងទទួលបានការគាំទ្រច្រើនពីទស្សនិកជនមិនខាន ។ លោកអ៊ីណូ មានឈ្មោះពិតសាន្ត ពេជ្រសុភារិទ្ធ ស្រុកកំណើតនៅខេត្តបាត់ដំបង ។ ឪពុកលោកជាមន្ត្រីរាជការ និងម្តាយជាគ្រូបង្រៀន ហើយលោកជាកូនទី២នៅក្នុងចំណោមបងប្អូន ស្រីម្នាក់ និងប្រុស៣នាក់ ។

លោកអ៊ីណូ ចូលប្រឡូកក្នុងពិភពសិល្បៈតាំងពីឆ្នាំ២០០៨មក បន្ទាប់ពីប្រឡងជាប់ចំណាត់ថ្នាក់លេខ២ផ្នែកចម្រៀង ក្នុងកម្មវិធីរបស់ស្ថានីយទូរទស្សន៍បាយ័ន ។ បន្ទាប់ពីនោះមក លោកបានច្រៀងនៅតាមក្លឹបកម្សាន្ត និងបានចូលច្រៀង និងធ្វើជាអ្នកនិពន្ធនៅផលិតកម្ម Diamond Music ។ បន្ទាប់ពីចប់កិច្ចសន្យាជាមួយផលិតកម្ម Diamond Music លោកត្រូវផលិតកម្មសាន់ដេទាក់ទងឱ្យចូលច្រៀង ។ ពេលនេះលោកអ៊ីណូ កំពុងតែទទួលបានការចាប់អារម្មណ៍តាមរយៈបទ «ពុទ្ធព្រះអើយ» និងបទ «បេះដូងស្នេហ៍ផ្ទុះBoom Boom» ៕