SuperAngkor News | Cambodia News | Khmer News | World News | News | Health | Technoloy | Star | Travel

រហូតមកទល់ពេលនេះ (ខែកក្កដា ២០១៣) តារាចម្រៀងយេៗនិយមស្លៀកពាក់សិចស៊ី ឆៃលី ដាឡែន ដែលធ្វើឱ្យមហាជនរិះគន់យ៉ាងខ្លាំងពីរឿងបញ្ចេញដើមទ្រូងសិចស៊ីហួសហេតុ កាលពីទៅសម្តែងនៅអាមេរិកនោះ នៅតែមិនទាន់ឃើញចេញមុខច្រៀងតាមទូរទស្សន៍ឡើយ បើទោះជាកែប្រែការស្លៀកពាក់មកបែបសុភាពវិញក្តី ។

មានការលើកឡើងថា អ្នករៀបចំកម្មវិធីសិល្បៈទូរទស្សន៍មិនខ្លាចហៅនាងសម្តែងដូចមុនទេ តែមកពីខ្លាចប៉ះពាល់ដល់ទូរទស្សន៍របស់គេ ព្រោះនាងត្រូវហាមមិនឱ្យឡើងសម្តែងជាសាធារណៈតាមកញ្ចក់ទូរទស្សន៍ ដោយសារតែរឿងរ៉ាវដែលនាងបានប្រព្រឹត្តកន្លងមក ហើយគេពិបាកទប់ទល់ជួយនាង ។ ដោយសារបែបនោះហើយ ទើបនាងនៅតែគ្មានសង្ឃឹមបង្ហាញមុខតាមទូរទស្សន៍ ។

គិតរហូតមកទល់ពេលនេះមានរយៈពេលជាច្រើនខែហើយដែលតាមវេទិកាសម្តែង ឆៃលី ដាឡែន ធ្លាប់មានឱកាសបង្ហាញខ្លួនជារឿយៗនោះ បែរជារកផ្លូវចេញបង្ហាញមុខមិនឃើញដូចមុនឡើយ ។ កត្តានេះដោយសារតែនាងបង្អួតភាពសិចស៊ីជ្រុល រហូតមិនអាចទទួលយកបានពីមហាជនទូទៅ ។ រឿងនោះធ្វើឱ្យដាឡែន បានក្លាយជាផ្ទាំងស៊ីបនៃការរិះគន់រហូតបាក់អំនួតក្នុងការបញ្ចេញភាពសិចស៊ី ។

គេនៅចាំបានថា ក្រោយរឿងនោះកើតឡើង ឆៃលី ដាឡែន ភ្ញាក់ខ្លួន ព្រោះស្ថានីយទូរទស្សន៍ឈប់ហៅឱ្យឡើងសម្តែង ។ ដូច្នេះហើយ នាងព្យាយាមរំងាប់ប្រតិកម្មលើរូបនាង ដោយសន្យាថា នាងនឹងមិនលេងខ្លួនសិចស៊ីដូចមុនទៀតឡើយ ហើយនាងនឹងបង្ហាញតែសកម្មភាពណាមានលក្ខណៈ ឆ្លុះបញ្ចាំងពីប្រពៃណីជាតិវិញ ។ តាំងពីនោះមក គ្រប់សកម្មភាពនៅខាងក្រៅឆាករបស់តារាចម្រៀងប្រចាំផលិតកម្មរៃមាស ដាឡែន គេឃើញស្លៀកពាក់បែបនារីខ្មែរដូចជាសំពត់បត់ អាវប៉ាក់ ។

ទោះជាជម្រុះចោលភាពសិចស៊ីមកជារូបភាពបែបស្រគត់ស្រគំវិញក្តី ក៏អ្នកចម្រៀងធ្លាប់តែមានមោទនភាពរឿងស្លៀកពាក់សិចស៊ី ឆៃលី ដាឡែន នៅតែមិនអាចប៉ះប៉ូវភាពអាម៉ាស់កាលពីមុនបានដដែល ហើយនាងនៅតែគ្មានមុខឡើងឆាកសម្តែង ក្រៅពីជ្រកក្រោមកម្មវិធីច្រៀងក្នុងមង្គលការ និងច្រៀងក្នុងក្លឹបកម្សាន្តដែលពិបាកបំផុតក្នុងការស្រូបយកការទាក់ទាញពីមហាជន។

មិត្តភក្តិក្នុងរង្វង់សិល្បៈរបស់ដាឡែន និយាយថា នោះជារឿងស៊យរបស់នាង ព្រោះតែមិនបានគិតឱ្យបានគ្រប់ជ្រុងជ្រោយ ក្នុងសកម្មភាពសិល្បៈរបស់ខ្លួន ។ នាងទទួលស្គាល់កំហុសរបស់ខ្លួនហើយ តែនៅតែមិនមានមុខឡើងឆាកដដែល ដូច្នេះយូរ ឬឆាប់គង់តែនឹងបាត់ឈ្មោះពីក្នុងទំព័រសិល្បៈ ។

ប្រភពដដែលនិយាយថា តារា ម្នាក់ៗមិនមែនចេះតែឡើងកូដ បានល្បីដោយ ស្រួលៗទេ ទាល់តែព្យាយាមតស៊ូគ្រប់រូបភាព ជម្នះឧបសគ្គ ពេលខ្លះគេងឱបពាក្យអាស្រូវគ្មានការពិតខ្លះក៏មាន ។ ម៉្លោះហើយទើបគេមិនចង់ឱ្យបាត់បង់កេរ្តិ៍ឈ្មោះ ស្របពេលសព្វថ្ងៃនេះក្នុងពិភពសិល្បៈមានរលកថ្មីៗកំពុងរីកដូចផ្សិត ។ ករណីរបស់ ឆៃលី ដាឡែន ជាបទពិសោធន៍មួយសម្រាប់តារាថ្មី គឺកុំចង់ល្បីលេងស្ទីលបញ្ចេញសាច់សខ្ចីចំហទ្រូង ប្រយ័ត្នបិទផ្លូវខ្លួនឯង ។ ប្រការសំខាន់ ក្រៅពីមានសម្រស់ស្រស់ស្អាត គឺត្រូវពឹងលើទេពកោសល្យនៃការសម្តែង មិនត្រូវពឹងលើភាពសិចស៊ីឡើយ ៕