SuperAngkor News | Cambodia News | Khmer News | World News | News | Health | Technoloy | Star | Travel

រឿងគ្រោះថ្នាក់ចរាចរណ៍របស់តារាចម្រៀងលោក ខេមរៈ សិរីមន្ត និងក្រុមអ្នកសិល្បៈមួយចំនួនទៀតមិន ទាន់មានចំណាត់ការ ខណៈដែលលោក សិរីមន្ត អះអាងថា ហេតុការណ៍គ្រោះថ្នាក់ចរាចរណ៍លើកំណាត់ផ្លូវជាតិលេខ៤ នៅខេត្តព្រះសីហនុ កាលពីដើមខែមីនា កន្លងទៅនឹងបញ្ចប់ នៅមុនថ្ងៃបោះឆ្នោតជាតិ អាណត្តិទី៥ ខាងមុខនេះ។

បន្ទាប់ពីករណីគ្រោះថ្នាក់ចរាចរណ៍ នៅខេត្តព្រះសីហនុ ដែលបានអូសបន្លាយរយៈពេលជិតកន្លះឆ្នាំមកនេះ មិនមានដំណោះស្រាយណាមួយពីតុលាការឡើយ។ តែតារាចម្រៀងល្បីឈ្មោះ ក្នុងព្រះរាជាណាចក្រកម្ពុជា បានអះអាងថា អ្វីៗនឹងបញ្ចប់នៅមុនថ្ងៃបោះឆ្នោតជាតិ អាណត្តិទី៥ ធ្វើឡើងនៅចុងខែនេះ គឺថ្ងៃទី២៨ ខែកក្កដា ឆ្នាំ២០១៣ នេះ។

លោក ខេមរៈ សិរីមន្ត បានឲ្យដឹងថា "តុលាការខេត្តព្រះសីហនុ នឹងដោះស្រាយសំណុំរឿងនេះ ឱ្យចប់នៅមុនថ្ងៃបោះឆ្នោតជាតិខាងមុខ។ ប្រការនេះ ធ្វើឱ្យខ្ញុំសប្បាយចិត្ត ហើយសង្ឃឹមថា នឹងមានដំណោះស្រាយមួយល្អ រវាងភាគីទាំងសងខាង"។ នៅក្នុងហេតុការណ៍នោះ តារាចម្រៀងដែលមានសំណាងជាងគេ ក្នុងករណីគ្រោះថ្នាក់ចរាចរណ៍ខាងលើ មិនបានបញ្ជាក់ឱ្យច្បាស់ថា តើតុលាការខេត្តព្រះសីហនុ នឹងកោះអញ្ជើញលោកទៅស្ដាប់សាលក្រម នៅថ្ងៃណាឱ្យប្រាកដនៅឡើយទេ ដើម្បីបញ្ចប់សំណុំរឿងនេះ។

លោក ខេមរៈ សិរីមន្ត គ្រាន់តែបញ្ជាក់ខ្លីថាអ្វីៗ នឹងបញ្ចប់នៅមុនថ្ងៃបោះឆ្នោតជាតិខាងមុខ ។ តារាចម្រៀងរូបនេះ ក៏មិនទាន់ហ៊ានបញ្ជាក់ថា នឹងមានសំណងបែបណានោះដែរ ដោយរង់ចាំលទ្ធផលពីតុលាការនៅចុងខែកក្កដា ឆ្នាំ២០១៣ ខាងមុខសិន។

សូមរំលឹកថា កាលពីយប់ថ្ងៃទី៧ ខែមីនា ឆ្នាំ២០១៣ កន្លងទៅ មានគ្រោះថ្នាក់ចរាចរណ៍មួយដ៏រន្ធត់ បានកើតឡើងនៅលើកំណាត់ផ្លូវជាតិលេខ៤ ដោយបណ្ដាលឱ្យមនុស្សស្លាប់ និងរបួស។ ក្នុងនោះ រួមមាន កូនប្រុសរបស់តារាកំប្លែង នាយ កុយ កូនរបស់លោកស្រី ណយ សំណាង អ្នករាំម្នាក់ទៀត ឈ្មោះ សោម សុវណ្ណារិទ្ធិ រួមទាំងអ្នកបើកបរផងដែរ បានស្លាប់នៅក្នុងហេតុការណ៍នោះ។ ចំណែកលោក ខេមរៈ សិរីមន្ត គ្រាន់តែរងរបួសស្រាល ខណៈអ្នកផ្សេងទៀត រងរបួសធ្ងន់៕