SuperAngkor News | Cambodia News | Khmer News | World News | News | Health | Technoloy | Star | Travel

តារាសម្តែងច្រមុះស្រួច មានដើមទ្រូងមូលក្បំ កញ្ញា រស់ សាវ៉ាត់បាទី ដែលកន្លងមក ធ្លាប់តែគ្រងបានតំណែងជាតួរង កាចឆ្នាសឆ្នើម ឈ្នានីសគេ តែពេលនេះ នាងប្តូរមកសមែ្តងជាតួអាបលើកដំបូងដោយមានអារម្មណ៍ភ័យខ្លាច ។

តារាសម្តែងស្រីតាមរយៈរឿង "អាបពាក់មួកសុវត្ថិភាព" ដែលមានឈ្មោះបោះសំឡេងគួរសម កញ្ញា រស់ សាវ៉ាត់បាទី បានឲ្យដឹងថា ក្នុងមួយរយៈពេលចុងក្រោយនេះ នាងមានការមមាញឹកច្រើនគួរសម ជាមួយការធ្វើជាពិធីការិនី នៅ តាមកម្មវិធីជប់លៀងខាងក្រៅ និងការថតរឿងច្រើន ។ ហើយថ្មីៗនេះ នាងទើបតែចេញថតរឿងថ្មី ប្រភេទរឿងខ្មោចអាប តែនាងសុំមិនបង្ហើបពីចំណងជើងរឿងទេ ព្រោះចង់លាក់សិន ។

ស្ថិតក្នុងអារម្មណ៍ភ័យខ្លាច ពិធីការិនីស្រី សម្បុរខ្មៅស្រអែមស្រស់រូបនេះ បាននិយាយថា " នៅក្នុងរឿងថ្មីនេះ អ្នកដឹក នាំរឿង តម្រូវឲ្យខ្ញុំសម្តែងជាតួអាប ហើយនេះគឺជាលើកដំបូង ដែលខ្ញុំសម្តែងបែបនេះ មានអារម្មណ៍ថាភ័យបុកពោះ ខុសប្លែកពីការសម្តែងរឿងមុនៗ ។ ខ្ញុំមិនធ្លាប់សម្តែងជាតួខ្មោច ឬអាបអីទេ តែពេលនេះ ខ្ញុំបានតំណែងតួអាប គឺមានការលំបាកខ្លះៗក្នុងការសម្តែង" ។

កញ្ញា សាវ៉ាត់បាទី បានឲ្យដឹងបន្ថែមទៀតថា បច្ចុប្បន្ន រឿងនេះ នាងថតបានប្រមាណជា ៣០ទៅ៤០ ភាគរយហើយ ។ ទោះជានាងដើរជាតួអាបក៏ពិតមែន តែអាបដែលនាងសម្តែង គឺស្លូត មិនដែលធ្វើបាបអ្នកណាម្នាក់ទេ ។ តែលទ្ធផលចុងក្រោយ អាបម្នាក់នេះ គឺត្រូវគេធ្វើបាបខ្លាំងណាស់ ហើយនៅពេលរឿងនេះថតចប់ ក្នុងពេលឆាប់ៗនេះ នឹងមានគម្រោងដាក់បញ្ចាំងនៅរោងកុនថែមទៀតផង ។

ពិធីការិនី និងជាតារាសមែ្តងសម្បុរស្រអែម កញ្ញា រស់ សាវ៉ាត់បាទី មួយរយៈចុងក្រោយនេះ ហាក់ដូចជា កាក់កបនឹងកម្មវិធីក្រៅប៉ុស្តិ៍ច្រើនជាង ។ បច្ចុប្បន្ន តារាសម្តែងរូបនេះ ហាក់កំពុងតែកាក់កបនឹងការងារ នៅតាមកម្មវិធីរបស់ក្រុមហ៊ុនផ្សេងៗទៅវិញ ។ ហើយនាងធ្លាប់បាត់បង់ឱកាសសម្តែងជាតួឯកនៅក្នុងផលិតកម្មមួយ នាពេលកន្លងទៅ ដោយសារតម្រូវឲ្យស្លៀកពាក់សិចស៊ីខ្លាំងពេក ។

សូមបញ្ជាក់ថា កញ្ញា រស់ សាវ៉ាត់បាទី ក្រៅពីអាជីពជាពិធីការិនី និងតារាសម្ដែង នាងជាតារាបង្ហាញម៉ូដថែមទៀត នៅក្នុងក្រុម Sun Super Model តាំងពីឆ្នាំ២០១០មក និងស្ថិតក្នុងក្រុម B ។ ក្រៅពីនេះ នាងជាកីឡាការិនីតេក្វាន់ដូឆ្នើមម្នាក់ ធ្លាប់នាំមេដាយជូនជាតិថែមទៀតផង ។ បច្ចុប្បន្ន នាងបានបញ្ចប់ការសិក្សានៅសាកលវិទ្យាល័យជាតិគ្រប់គ្រងផ្នែកភាសាអង់គ្លេស៕