SuperAngkor News | Cambodia News | Khmer News | World News | News | Health | Technoloy | Star | Travel

ផ្អែកតាមការសិក្សារបស់អាមេរិកបានបង្ហាញថា គូស្វាមីភរិយាដែលមានផ្ទុកខ្លាញ់កូឡេស្តេរ៉ូលកម្រិតខ្ពស់អាចប្រឈមនឹងការប្រើពេលវេលាយូរឆ្នាំដើម្បីមានកូនបើធៀបទៅនឹងគូស្វាមីភរិយាដែលមានកម្រិតខ្លាញ់ប្រភេទនេះទាប ។

អ្នកដឹកនាំការស្រាវជ្រាវ Enrique Schisterman មកពីវិទ្យាស្ថានជាតិសម្រាប់ការអភិវឌ្ឍសុខភាពកុមារនិងមនុស្សធំ Eunice Kennedy Shriver សហរដ្ឋអាមេរិកបានថ្លែងថា នេះគឺជាលើកទី១ដែលកម្រិតខ្លាញ់កូឡេស្តេរ៉ូលត្រូវបានគេរកឃើញក្នុងនាមជាកត្តាប្រឈមមួយដែលប៉ះពាល់ទៅលើការមានផ្ទៃពោះ ។

វិទ្យាស្ថានសុខភាពបេះដូង សួត និងឈាមរបស់សហរដ្ឋអាមេរិកបានឱ្យដឹងថា កូឡេស្តេរ៉ូលគឺជាសារធាតុក្រមួនដែលអាចប្រមូលផ្តុំក្នុងបណ្តាសរសៃឈាម ។ បញ្ហាហ្សែន និងប្រវត្តិគ្រួសារបានដើរតួនាទីយ៉ាងសំខាន់ចំពោះកម្រិតកូឡេស្តេរ៉ូល(ទាបឬខ្ពស់) ។

លោក Schisterman បានកត់សម្គាល់ថា ខណៈបុរសនិងស្ត្រីជាគូស្វាមីភរិយាសុទ្ធតែមានកម្រិតខ្លាញ់កូឡេស្តេរ៉ូលខ្ពស់ ដូច្នេះវាធ្វើឱ្យពួកគេត្រូវប្រើពេលយូរក្នុងការមានកូន ។ លោកបានបន្តថា ប្រសិនបើស្ត្រីជាភរិយាផ្ទុកខ្លាញ់កូឡេស្តេរ៉ូលកម្រិតខ្ពស់ រីឯបុរសជាប្តីស្ថិតក្នុងកម្រិតធម្មតា អីុចឹងពួកគេនៅតែត្រូវចំណាយពេលយូរក្នុងការមានកូន ប៉ុន្តែប្រសិនជាទាំងពីរនាក់ប្តីប្រពន្ធសុទ្ធតែផ្ទុកខ្លាញ់នេះខ្ពស់ដូចគ្នានោះ ពួកគេរឹតតែចំណាយពេលយូរទ្វេដង ។ ផ្ទុយមកវិញ ប្រសិនជាបុរសផ្ទុកកូឡេស្តេរ៉ូលកម្រិតខ្ពស់ រីឯស្ត្រីស្ថិតក្នុងកម្រិតធម្មតាវិញ វាហាក់មិនមានប្រសិទ្ធអ្វីមួយលើការមានកូនឡើយ ។

អ្នកស្រាវជ្រាវដដែលបានឱ្យដឹងបន្តថា ការហាត់ប្រាណ និងរបបអាហារទទួលទានប្រចាំថ្ងៃអាចនឹងជួយធ្វើឱ្យប្រសើរចំពោះពេលវេលាមានកូន ដ្បិតការហាត់ប្រាណត្រូវគេដឹងថា មានប្រសិទ្ធភាពធ្វើឱ្យខ្លាញ់កូឡេស្តេរ៉ូលថយចុះ និងកាត់បន្ថយពេលវេលាមានកូន ។ លោកបន្ថែមថា «ការទទួលទានអាហារដែលផ្តល់អត្ថប្រយោជន៍ដល់សុខភាពគួបផ្សំនឹងការហាត់ប្រាណជាប្រចាំនឹងជួយរក្សាខ្លាញ់កូឡេស្តេរ៉ូលឱ្យស្ថិតក្នុងកម្រិតធម្មតា ហើយបន្ទាប់មក ឱកាសមានផ្ទៃពោះក៏មានច្រើនដែរ ។ អ្វីដែលរឹតតែពិសេសទៀតនោះគឺថា អាហារដែលផ្តល់អត្ថប្រយោជន៍សុខភាព ការហាត់ប្រាណនិងកូឡេស្តេរ៉ូលស្ថិតក្នុងកម្រិតធម្មតានឹងជួយឱ្យសុខភាពកុមាររឹងមាំ» ៕