SuperAngkor News | Cambodia News | Khmer News | World News | News | Health | Technoloy | Star | Travel

លទ្ធផលរបស់ក្រុមអ្នកស្រាវជ្រាវ២ប្រទេសរួមគ្នាគឺ ដាណឺម៉ាក និងអាមេរិកបានបង្ហាញថា ការមើលទូរទស្សន៍ត្រឹមតែជាង២ម៉ោងក្នុង១ថ្ងៃអាចនាំទៅរកសេចក្តីស្លាប់ឆាប់រហ័សដោយជំងឺទឹកនោមផ្អែមប្រភេទ២ដល់២០ភាគរយ ខណៈអត្រាប្រឈមនឹងជំងឺបេះដូងមាន១៥ភាគរយ ។ រីឯអត្រាប្រឈមនឹងការស្លាប់ដោយមូលហេតុផ្សេងៗទៀតមាន១៣ភាគរយ ។

វេជ្ជបណ្ឌិត Anders Grontved មកពីសាកលវិទ្យាល័យ University of Southern ប្រទេសដាណឺម៉ាក និងវេជ្ជបណ្ឌិត Frank Hu មកពីសាកលវិទ្យាល័យហាវើដ សហរដ្ឋអាមេរិកបាននិយាយថា កង្វះខាតការធ្វើលំហាត់ប្រាណគួបផ្សំនឹងការទទួលទានអាហារដែលគ្មានប្រយោជន៍ដល់រាងកាយអំឡុងមើលទូរទស្សន៍សុទ្ធតែជាកត្តាប្រឈមយ៉ាងធ្ងន់ធ្ងរ ។

ទោះជាយ៉ាងនេះក្តី តាមលោកវេជ្ជបណ្ឌិតMaureen Talbot មកពីមូលនិធិជំងឺបេះដូងអង់គ្លេសបាននិយាយថា ការសិក្សាលើកនេះមិនទាន់មានភ័ស្តុតាងជាក់ច្បាស់ដែលថា មើលទូរទស្សន៍អាចបង្កើនឱកាសកើតជំងឺទឹកនោមផ្អែមប្រភេទ២ ឬក៏ជំងឺបេះដូងនោះទេ ។ លោកបានបន្តថា៖«ខ្ញុំជឿជាក់ថា ពួកយើងនឹងបាត់បង់ពេលល្ងាចដ៏សែនមនោរម្យសម្រាកលើសាឡុងនៅមុខទូរទស្សន៍ ញ៉ាំអាហារ និងផឹកស្រា ។ ប៉ុន្តែរឿងសំខាន់នោះគឺយើងមិនត្រូវឱ្យរឿងទាំងនេះក្លាយជាសកម្មភាពទៀងទាត់រាល់ថ្ងៃនោះទេ ។ យើងគួរតែចេះជ្រើសរើសយកចំនួនពេលវេលាប៉ុន្មានដែលយើងចំណាយលើការមើលទូរទស្សន៍ ហើយព្យាយាមធ្វើឱ្យរាងកាយមានសកម្មភាពជាប់ជានិច្ច ។ យើងត្រូវធ្វើឱ្យរាងកាយមានសកម្មភាពយ៉ាងហោចណាស់មួយថ្ងៃ៣០នាទីរយៈពេល៥ថ្ងៃក្នុង១សប្តាហ៍ទើបធ្វើឱ្យបេះដូងមានសុខភាពល្អ» ។

ដោយឡែក ក្រុមអ្នកស្រាវជ្រាវរបស់ប្រទេសហូឡង់បានរកឃើញថា ការមើលទូរទស្សន៍រាល់យប់អាចបណ្តាលឱ្យរឹងសរសៃឈាមក្រហម ហើយដែលនេះគឺជាសញ្ញានៃជំងឺបេះដូងទៅថ្ងៃខាងមុខ ។ ការពិសោធលើបុរស-ស្ត្រីវ័យពី៣២ដល់៣៦ឆ្នាំប្រមាណ៣៧៣នាក់បានបង្ហាញថា អ្នកដែលចំណាយពេលជាង២០នាទីមើលទូរទស្សន៍រាល់យប់ ធ្វើឱ្យសរសៃចែកចាយឈាមសំខាន់ទៅកាន់ក្បាល និងមានសភាពរឹងខ្លាំង ៕