SuperAngkor News | Cambodia News | Khmer News | World News | News | Health | Technoloy | Star | Travel

ចំពោះលោកអ្នកដែលមានបញ្ហាដំណេកអាចស្ដែងចេញឲ្យឃើញថាជាជម្ងឺគេងមិនលក់ ជាមធ្យមលោកអ្នកគប្បីគេងឲ្យបានពី ៧ ម៉ោងទៅ ៨ ម៉ោងក្នុងមួយថ្ងៃ ទើបសុខភាពមានលក្ខណៈប្រសើរអាចប្រឆាំងនឹងការបៀតបៀននៃជម្ងឺដទៃ ទាំងសុខភាពផ្លូវកាយ និងសុខភាពផ្លូវចិត្ដ។ ការគេងធ្វើឲ្យរាងកាយ និងចិត្ដបានសម្រាក និងជួយឲ្យលោកអ្នកមានអារម្មណ៍ស្រស់ស្រាយនៅពេលព្រឹកព្រលឹម។

- អ្វីទៅជាជម្ងឺគេងមិនលក់?

ជម្ងឺប្រភេទមួយដែលមានបញ្ហាចំពោះដំណេក បង្កឲ្យលោកអ្នកគេងមិនបានស្រួល ធ្វើឲ្យលែងមានអារម្មណ៍ស្រស់ស្រាយ នៅពេលក្រោកពីដំណេក។ លោកអ្នកមួយចំនួនមានការលំបាកនឹងគេងឲ្យលក់ ខ្លះភ្ញាក់ពីព្រឹកព្រលឹមពេក ហើយមិនអាចគេងលក់ទៅវិញ។ លោកអ្នកខ្លះទៀតនោះអាចគេងភ្ញាក់ៗក្នុងមួយយប់ៗច្រើនដង។ ជាដំណោះស្រាយចំពោះបញ្ហានេះ មានលោកអ្នក មួយចំនួនសម្រេចជ្រើសរើសការប្រើប្រាស់ថ្នាំងងុយគេង ហើយអាចញៀនថ្នាំងងុយគេង។

- ផលប៉ះពាល់នៃជម្ងឺគេងមិនលក់

ជម្ងឺគេងមិនលក់បណ្ដាលឲ្យលោកអ្នកមានអារម្មណ៍ធីងធោងនៅពេលថ្ងៃ អស់កម្លាំង ធ្វើឲ្យការផ្ដោតអារម្មណ៍ និងការគិតទៅលើបញ្ហាអ្វីមួយមិនបានល្អ មានអារម្មណ៍រកាំចិត្ដ និងឆាប់ខឹងមួម៉ៅ ហើយការគិតពិចារណា និងដោះស្រាយចំពោះរឿងអ្វីមួយមិនបានច្បាស់លាស់។ ទាំងនេះសុទ្ធតែស្ដែងចេញឲ្យឃើញនៅពេលដែលលោកអ្នកមានជម្ងឺគេងមិនលក់។

- មូលហេតុដែលបណ្ដាលឲ្យមានជម្ងឺគេងមិនលក់៖

ជាទូទៅជម្ងឺគេងមិនលក់បណ្ដាលមកពីបញ្ហាជាច្រើនដែលបង្កឱ្យមានជម្ងឺនេះកើតមានឡើងមានដូចជា ៖

-ទទួលទានគ្រឿងស្រវឹង៖ លោកអ្នកដែលពិសាគ្រឿងស្រវឹងភាគច្រើនតែងកើតមានជម្ងឺគេងមិនលក់ ដោយសារតែបញ្ហាគេងមិនសូវបាននៅពេលដែលស្រវឹង ហើយទម្លាប់ភ្ញាក់ពីព្រឹកព្រលឹមដោយហេតុតែមានរោគសញ្ញានៃការផ្ដាច់ស្រា។

-មានជម្ងឺផ្លូវចិត្ដ៖ មូលហេតុមួយទៀត គឺដោយសារបុគ្គលនោះមានជម្ងឺផ្លូវចិត្ដ ដូចជាជម្ងឺធ្លាក់ទឹកចិត្ដ ឬជម្ងឺថប់អារម្មណ៍។ មួយវិញទៀតគឺបណ្ដាលមកពីការប្រើប្រាស់ថ្នាំងងុយគេងខុសប្រក្រតី ដោយមិនមានវេជ្ជបញ្ជាប្រើប្រាស់ឲ្យបានត្រឹមត្រូវ។

-មានជម្ងឺទូទៅ៖ មូលហេតុចុងក្រោយ គឺបណ្ដាលមកពីបញ្ហាផ្នែកជម្ងឺទូទៅ ជាពិសេសបញ្ហាដែលបណ្ដាលឲ្យមានការឈឺចាប់ ដូចជាការរងរបួសដោយគ្រោះថ្នាក់អ្វីមួយ ពិបាកដកដង្ហើម ជម្ងឺខ្សោយបេះដូង ឬជម្ងឺរលាកផ្លូវទឹកនោមដែលបណ្ដាលឲ្យនោមញឹកញាប់ នៅពេលដែលទទួលទានដំណេក។

ប្រភពពី៖ healtcambodia